Un rato pa spiritualidad den temponan moderno

Un rato pa spiritualidad den temponan moderno…

Bibando den tempo moderno, di cibernetico y super hi-tech, ta pone mi corda riba e poesia di Sai Baba cu ta conta na un forma bunita cu “aunke nos t’asina sabi y a inventa de todo pa hasi nos bida mas facil, nos tin menos tempo, nos ta sufri di mas malesa, nos tin mas problema mental y sicologico, nos conoce mas pobreza, mas inhusticia, mas inigualidad cu antes. Nos ta muri relativamente mas tempran cu nos antepasadonan y ta parse cu nos no a logra bira mas felis”. Tur e rikesa material no a trece e satisfaccion cu nos ta anhela. No ta nada straño anto cu rond mundo tin un hamber asina grandi pa asuntonan spiritual.

Hopi hende ta desea mas spiritualidad den nan bida, pero den kiko nan ta busc’e?
Esaki ta un pregunta hopi interesante, pero cu di biaha ta hiba nos na e parti complica di e propio pregunta – pasobra e palabra ‘spiritualidad’ tin asina tanto interpretacion. Y saliendo for di e libertad di escohencia, cada interpretacion na su forma tin derecho di existencia. E diccionario ‘Encarta’ ta describi ‘spiritualidad’ como e abilidad pa ta spiritual. E ta describi e nocion como e ‘relacion cu cosnan di alma y di espirito, contrario na cosnan material’. Tin hopi hende ta busca spiritualidad den misa; otronan ta busc’e den un grupo especial, hasiendo uso di nan libertad di escohencia. Como ciudadano di un pais democratico cu conoce e separacion di estado y religion, nos tin e deber moral di respeta e escohencia di otro. Mihor ta ainda pa pone bo mes na altura di mas tanto filosofia y pensamentonan religioso posibel; pensa profundamente riba nan, pa despues hasi den tur libertad bo propio escohencia – sin hasi daño na e libertad di otro hende.

Ami a scohe pa busca e Creador den mi mes y mir’E tambe den mi prohimonan. Den curso di aña mi a tende demasiado hopi iglesia ‘claim’ cu ta nan so ‘tin e berdad’. “Nos tin e jabi pa drenta shelo y si abo no ta cu nos, lo bo no drenta shelo”. Dilanti di e frase aki, nan ta lubida di pone algun palabra masha importante, esta ‘na nos opinion, nos tin e jabi …… etc.
Spiritualidad p’ami ta purba mas tanto posibel ta e ‘brasa y mannan’ di nos Creador den e mundo aki pa expresa Su amor na e nivel mas halto posibel.
No obstante e frasenan na inicio di e articulo aki, nos por bisa cu nos ta bibando den un temporada hopi afortuna – pasobra awor nos tin acceso na un cantidad grandisimo di informacion (pues, no asina liher nos por ser engaña) den un estado di derecho cu ta garantisa nos libertad pa escohe. Esaki ta e parti bunita di e tempo moderno.

Y asina mes hopi hende ta buscando … un maestro … pafor di nan mes… mientras cu e maestria ta eynan mes… paden di nan mes… na alcanse di nan dede… basta nan kier mir’e…y explor’e…

Leave a Reply

Your email address will not be published. Required fields are marked *