Bida ta un caminda…no un lucha…y con pa cambia nos custumbernan cu ta limita nos…

Bida ta un caminda…no un lucha…y nos tur por cambia nos custumbernan cu ta limita nos…

IngridMi ta dilanti un lift y ta mira e escenario aki mi dilanti: dos conoci ta topa otro net dilanti e lift. Esun ta puntra e otro: “Conbay?”. E otro ta contesta (manera hopi di nos: “Ay, bo mes sa. Luchando!”. E otro ta contesta:”Tanten cu bo tin forsa pa lucha ta bon ainda!”. Si mi haja un chens semper mi ta mete mi mes y bisa: “Stop di lucha…djis biba e bida. Cada biaha cu bo bisa bo mes cu ‘bida ta un lucha’, bo ta ‘hasiendo’ un lucha di bo bida. Pasobra esey ta loke bo ta bisando bo mes y bo subconciencia”. E ora mi ta corda riba cuanto biaha hende ta contesta mescos ora puntra nan ‘con ta bay’!. Cultura y custumbernan ta cosnan cu hasi nos ‘ken nos ta’. Dicon?

Pasobra nos ta hinca nan den nos sistema mental y fisico dor di ripiti nan continuamente, tanto mental como den nos actitud. Nan ta parti di nos socialisacion, esta con nos sociedad ta forma nos y hasi nos ken ‘nan’ kier pa ‘nos’ ta. Te ainda parse cu sociedadnan no por a inventa un manera pa socialisa hende na un forma cu e ta ‘forma’ su propio opinion y ta ‘pensa’ prome cu e ‘adopta’ opinionnan di su mayornan y nan mayornan, di su scol y su maestro, di su iglesia y su pastor y su partido politico y su lider. Un buki cu semper mi ta recomenda pa hasi esaki comprendibel na un forma facil ta ‘the four agreements’ di Don Miguel Ruiz. Den un chat cu un amiga nos a profundisa basta riba e tema di kico ta hasi nos felis como hende. Anto e conclusion tabata cu na momento cu bo por scoge conciente, saliendo for di e pakete di norma y balornan cu bo mes a evalua a base di bo propio cana den bida, bo por hasi escogencianan hopi conciente.

Akinan mi kier a usa e palabra cu casi nos no sa tende mas y esey ta e birtudnan di bida cu supuestamente ta hinca den cada un di nos ora nos a nace. Nos cada un lo a nace puro y limpi, sin mancha y jena cu birtudnan cu Dios a regala cada un di nos. Birtudnan manera pasenshi, benevolencia, caridad, curashi, fe… pero poco di nos ta lanta den un ambiente unda nos ta papia riba e birtudnan aki y unda nos ta stimula nos yiunan pa desaroja nan y biba segun nan. Ta berdad cu nan ta scondi den tur enseñansa spiritul y religioso, pero con nos lo por desaroja nan si nos no conoce nan como ‘producto’? Muchanan awendia ta pidi un refresco cu un normalidad asina grandi, aunke tur hende cu e profundisa nan mes un tiki den nutiricion sa cu entre otro e refresconan gaseoso ta esun cu ta causa hopi daño na e curpa humano ora cu bebe di mas y como un reemplasante pa awa. Supuestamente tur mayor sa esaki tambe…toch nan ta toler’e. Pasobra nan no ta stima nan jiu?. Probablemente esey no ta e causa, pero mas tanto pasobra e la bira un custumber cu a bira automatico pa nos. Anto e ta smaak bon tambe, pasobra e ta yen di sucu. Asina hopi mayor ta matando nan propio jiunan, cu ‘tur bon intencion’, si nos mira e programa ‘Honey, we’re killing the kids’.

Tanten tin demanda lo tin oferta y dia cu e cliente stop di cumpra e productonan lo bin otro producto mas sano na nan lugar di e mesun importadornan. Cambio casi semper ta bin di e massa. Dia e massa bisa ‘ta basta’, cambio lo bin. Y aki te hasta e poder di propaganda por trese un cambio ora cuminsa realisa cu tin e opcion pa cambia e ‘aggressive marketing’ pa ‘goodwill marketing’ unda bo ta contribui na e bienestar di e comunidad cu a duna bo su confiansa. Asina cada biaha nos ta purba di hasi e caminda di bida…un lucha menos…pasobra nos ta scoge conciente pa e cosnan cu ta hasi nos felis… bida ‘no’ ta asina dificil, si nos siña nos mes pa bib’e cu mas conciencia y cu mas birtud.

Hasi bo mes felis, hasi esunnan rond di bo felis…. No hasi na otro loke bo no kier pa un otro hasi cu bo… No obliga otro pa hasi cosnan cu e no por compronde…no dal, no mata, no bende droga na muchanan inocente, no abusa di muchanan inocente…no core descabeja, respeta bo prohimo, stima Dios, bida segun su imagen…pa mi esey ta amor…un dushi caminda sin bida…cu su pruebanan, pero sin lucha…mi ta djis sigi cana, sabiendo ken tin mi man wanta…

Leave a Reply

Your email address will not be published. Required fields are marked *