Siñando pa bula…creando paraiso riba Tera…

Sunset‘Bida no ta facil’, asina nos a siña. ‘Pero e no ta asina dificil tampoco…’, ta loke podise nos mester cuminsa train pa pensa.  Berdad bida ta un caminda jen di reto, pero e ora ta e cuestion pa nos cuminsa mira e retonan como oportunidadnan. Posibilidadnan pa nos crese y saca beneficio di nan.  Como ser humano, nos tin e tendencia di keda pega den nos pasado y sinti nos mes e victima di loke ‘otronan’ a pone nos sufri. Asina nos por hunga e rol di nan consenshi y laga nan mes sinti nan mes culpable pa loke nan a hasi nos. Nos por bira e cos aki rond y pensa cu no obstante kico hende y bida a hasi nos, nos kier sigi padilanti y mustra cu ‘ami’ ta mi maestro humano di mas grandi. Ami por educa mi mes, pa los di mi pasado.

Los di tur hende rond di mi y crea mi propio paraiso, mi propio soño, mi propio shangri-la. Mi ta e doño di mi destino den e realidad tri-dimensional aki. Aki Dios a duna mi boluntad liber pa mi hasi y deshasi. E la duna nos cada un tambe talentonan di bida, regalonan cu cua nos por traha. Nos mester sa kico nos ta hasi cu nan. Nos por usa nan pa crea y ta exitoso. Nos por usa nan pa destrui of nos por pone nan un banda y hasi nada. Universo y Dios lo provee semper, e lo pone algo of un hende den nos caminda pa cuida nos. A menos cu nos dicidi cu nos boluntad propio cu nos kier experencia kico ta nifica pa ta un bagamundo, anto e ora nos ta bira esey.

Mi a siña den bida cu semper tin un caminda pa nos cana, un escogencia pa nos hasi, maske con dificil e bida ta parse na un cierto momento. Den cada situacion den nos bida tin algo pa siña y momentonan pa crese, ta depende di e escogencia cu bo kier hasi. Tin ora bo mester keda pega den un cierto situacion un rato, pa bo siña di dje. E ora e arte ta pa sa ‘ki momento ta esun corecto pa bula afo’. Ora nos no hasi esaki, nos ta crea nos propio prison y nos ta bira e prisonero di situacionnan y hendenan den nos bida, cu kier nos den nan gara, den e mundo, e soño, e ilushon cu nan a crea pa nan mes. Y nos ta baha y nos ta solidario y nos ta sufri y nos ta miserabel…Y nos ta lubida cu e meta di bida ta pa nos bula halto y crea excelencia den un mundo cu tin hopi necesidad di esaki awor aki.

Nos ta rondona pa un mundo jena cu libertinage. Un mundo unda cu balornan humano a bay den e ultimo di e filekast, full patras. Podise a bira tempo pa rescata e inocentenan y e curasonnan manso cu a resta ainda den e mundo. Esnan cu por duna Dios bek su paraiso cu un dia e la duna nos jen di amor, pa nos cuida y conserva p’e. Ta bon pa nos puntra nos mes, kico ta nos imagen di e paraiso aki y mira con serca of leu nos ta di dje na e momento aki. Y di biaha puntra bo mes ‘Kico AMI por hasi pa rescat’e?’. Si e contesta ta positivo….pone man na obra, mi ruman…!

Leave a Reply

Your email address will not be published. Required fields are marked *