Balor Spiritual di tur bida… Guisela Croes, PHD

Everything in life has its value and is interconnected… by Guisela Croes, PHD

Guisela Croes, PHD
Guisela Croes

Loke ta crea y sostene bida ta un poder, un forma, un energia cu nos no por wak ni mishi, pero si nos ta sinti y experencia su existencia den tur cos bibo y cu ta move.

Un acto di gratitud, aprecio, respet, como tambe un acto di pordon, gracia, misericordia, compasion y sirbishi tin balor spiritual, pasobra nan ta forma parti di nos bida.  Nos por reconoce cu rabia, desapunto, rencor, vengansa, desgusto, tambe di salud, malesa, bida, morto y tin nan balor spiritual.

Pakiko? Pasobra nan tin e balor spiritual di e energia, di e sentimento, di e echo. Nos por y ta sinja slgo for di e experiencia y e ta crea door di e ser humano. Nada ta malo, si nos no dun’e e balor ey di ta malo. Tur loke e Creacion a crea, E’la crea bon. Ta nos tin e libertad pa cambi’e. Y toch, ni maske kiko nos haci cu n’e, su base ta keda meskos. Nada por cambia e Forsa Creador. Ta nos ta dicidi ki balor spiritual nos ta dun’e. Ta nos ta dicidi con nos ta maneh’e, dirigi’e, aplik’e y us’e.

No solamente ta forma parti di e Poder ey y tambe tin’e den nos, pero nos ta comparti’e tambe cu tur hende. Tur cos y tur hende ta sali for di e mesun Fuente. Esaki ta haci cu nos tur tin un balor spiritual inherente den nos y rond di nos.

Si nos admiti y reconoce cu tur bida tin balor spiriual y nos duna e balor spiritual aki, nos lo por biba mas den union y harmonia cu otro hende cu nos planeta y henter e universo.

Tur cos bibo ta sali y tin e Esencia, e chispa di Dios, den dje. E Spirito di Dios ta den tur cos cu ta move y tin bida.  Esaki ta e balor spiritual di tur cos.
Aire, tera, candela, awa, mata y animal  tin balor spiritual, mescos cu planeta y strea. Hende mes, homber y muher, y tambe nan pensamento, emocion, acto, tin balor spiritual. Asina tambe angelnan, santonan , maestronan, tin un balor spiritual. Tur cos cu tin y ta sali for di e movecion di e Spirito tin un balor spiritual, pasobra e mester tin e Spirito di e Creador, Dios, den dje pa e tin bida y sigui procrea bida.

Ora nos sinja reconoce, aprecia y balora e spirito di bida den nos mes y cada persona rond di nos y tur cos bibo y den tur loke ta yuda nos y asisti nos y ta duna nos sirbishi, nos por biba na pas y den harmonia y cu alegria y amor cu otro asina dunando balor na henter Creacion.

Leave a Reply