Diabetis y sex…

Diabetes and sex…and what to do… www.comprondiendobida.com

Ta conoci cu malesa por tin su influencia riba e bida sexual di un persona. Esaki por tin di haber cu prestacion sexual, pero tambe cu e deseo y sentimentonan di intimidad. Problemanan sexual cerca hende cu diabetis por tin causanan fisico. Hopi biaha factornan psychico y di relacion por ta hunga un rol. Asina un hende cu caba di haja sa cu nan ta diabetico por haja problema na trabou y por perde gana den sex. Tambe berguensa y sentimentonan di ansha por hunga un rol. Asina nan por tin berguensa di e cambionan den nan curpa of di e pomp di insuline of miedo di faja durante freimento.

Homber cu diabetis:
Ta conoci cu hombernan cu diabetis tin chens mas halto pa haja problema cu ereccion.

Investigacion ta mustra cu mas o menos 50% di homber diabetico por haja problema cu ereccion den transcurso di e malesa. Esaki tin di hasi cu mal circulacion di sanger den e adernan chiquito. Tambe ora e nervionan keda afecta (neuropathie) y e cambio continuo di e nivel di sucu por tin influencia. Ta bon pa sa cu hombernan riba 50 anja por lo general por haja problema cu ereccion y combina cu diabetis e ta bira un dobbel problema. Loke por juda pa soluciona problema cu ereccion ta tuma hangua cu ta habri e adernan of pildonan cu ta stimula ereccion. Esaki naturalmente den consulta cu e dokter di cas.Pa mas informacion por bishita websitenan specifico riba e tema aki den diferente idioma.

Hende muhe cu diabetis:
Pa hopi tempo no a paga hopi atencion na problemanan sexual cerca hende muhe cu diabetis. Nan a pensa cu hende muhe diabetico tin menos problema den intimidad. Investigacionnan recien a mustra sinembargo cu nan por tin menos gana di frei, por haja dolor ora di frei y tin mas chens cu nan vagina no ta lubrica durante freimento. E dos ultimo aki por tin di hasi cu e cambionan cu ta bin dor di e malesa y infeccion di candida. 

Judansa cu problemanan sexual ta start ora e pareha cuminsa papia riba e situacion. Tambe ta importante pa papia cu e dokter di famia of e diabetis-nurse of cu fundacion pa diabetico di Aruba.

Algun website hulandes cu por bishita ta www.erectieplein.nl. , www.seksualiteit.nl  y www.seksuologen-nederland.nl y na Aruba www.witgelekruisaruba.org y Fundacion Diabetico di Aruba.

POR ULTIMO: Si bo ta diabetico ta importante pa bo biba saludabel…y mantene e forma di biba aki. Esaki ta nifica come saludabel, baha peso si mester, haci movecion regularmente y no huma!

Mantene un bida saludabel y biba cu fe…y amor pa bo curpa… bo curpa ta e tempel di bo alma… cuid’e!

Leave a Reply

Your email address will not be published. Required fields are marked *