Kico bo kier bira ora bo bira grandi? Juda bo yiu descubri su talentonan

What do you want to be when you grow up? Help your child choose a ‘happy’ profesion by Marisol Krosendijk, psychologist … www.comprondiendobida.com

Scirbi pa drs. Marisol Krosendijk, psicologa

Kico bo kier bira ora bo bira grandi? Esaki ta un pregunta cu muchanan ta haya nan mes confronta cun’e na scol of na cas. Hasta muchanan den scol basico ta haja  e pregunta aki. Pero en realidad ta resulta cu hopi tiki hende despues den nan bida ta bai kies pa e trabou cu nan tabata soña cun’e na chikito. Esaki ta si acaso nan por kies.

Aunke bida ta cambia cu tempo y soñonan tin biaha ta keda na un ilushon, toch ainda hopi mucha ta kies pa profesionnan cu ta basa ariba nan imaginacion: bombero, piloto, juffrouw, meneer, hungado profesional di futbol, dokter y hasta mermaid ta algun di e profesionnan mas cotisa.

Bira mama ta un soño cu mucha muhernan ta wak como un profesion riba su mes. Tambe tin mucha cu ta basa nan soño di profesion den futuro riba e profesion di nan mayornan of otro ser keri y te asta riba nan idolonan. Muchanan ta soña di ta mescos cu nan mayornan. Nan ta crea nan soñonan a base di personajenan di television y ta soña hopi biaha cu un bida a base di un realidad fictivo. Dependiendo di nan desaroyo socio-emocional y circumstancianan di bida, nan por yega cerca di locual en realidad nan ta sonja pa hasi den futuro.

Kico bo kier bira ora bo bira grandi? Bo ta corda tempo nan tabata hasi abo e pregunta aki?
Hopi mucha no sa kico pa contesta riba e pregunta aki y toch ora nan yega scolnan secundario nan ta haya nan mes ta scoge pa un vakkenpakket cu hopi biaha ta stipula e direccion cu nan por bai sigui despues.

Decanonan na scol ta yuda guia muchanan den e decisionan grandi aki, pero investigacionnan ta mustra cu toch ta e mayornan tin mas influencia den esaki. Pesey ta importante pa mayornan pone hopi atencion na e talento y soñonan di nan yiu pa su futuro.

Un manera cu un mayor por yuda un mucha ta di analisa e comportacion di e mucha, ya cu esaki tambe mester ser considera ora di guia e mucha den e decisionnan cu e ta tuma pa su futuro. E comportacion di un mucha ta un aspecto cu un mayor hopi biaha  tin mas bista riba dje cu su maestronan di scol. Un mayor por yuda un mucha siña conoce su mes miho y pa expresa su mes mas riba tereno social-emocional.

Algun pregunta cu por yuda:
Bo ta gusta traha den grupo of bo so? Bo ta gusta traha den oficina of pafor di oficina? Bo ta gusta traha den un team of mas tanto riba bo mes? Kico ta bo pasatempo preferi? Kico ta hasi bo felis? Bo gusta ta bezig bo mannan of bo ta gusta lesa y pensa? Abo como mayor por yuda bo yiu dor di puntra nan tipo di preguntanan aki. Asina nan por bai hasi un tiki intro-speccion, esta mira den nan mes y haya sa kico nan gusta of kier den bida. Indirectamente bo por mira esaki tambe dor di observa e comportacion di bo yiu den su bida diario.

Comportacion di un mucha por duna bo un idea di kico un mucha por, kico e gusta. Asina bo ta haya mas idea den ki rumbo abo como mayor por yud’e pa e yega su soño of pa desaroya un talento special cu por ta e mes no ta conciente cu e ta  pose’e. Si bo corda cu un hende ta pasa un gran parti di su bida na trabou, bo sa con balioso ta pa jud’e scoge e profesion cu ta hasi’e felis di berdad…

Leave a Reply