Awe nos ta purba compronde ‘E sabiduria di paden’… cu Gardenia (Gadi) Kock, psicologo spiritual…
Gadi…Kico ta sabiduria pa bo?
Pa mi por conecta cu mi sabiduría interno… mi mester sinja reconoce mi sabiduría interno promer dor di “scucha” of “sinti” ki ora e ta “papia” cu mi. Hopi hende nan dia ta asina yena y ocupa… ta wordu distrai constantemente cu trabou, celular y otro actividadnan, cu nan prioridad no ta pa tuma un descanso den silencio pa re-conecta cu e sabiduría interno, cu ta loke bo alma/espíritu kier comunica na bo.
Nos tur tin sabiduria, no nos tur ta conciente di dje… con facil of dificil ta pa un hende yega eynan?
E por ta mes facil of mes difícil cu bo kier. Yega nos tur tin pa yega na dje un dia. Y ta depende si e persona kier yega liher of poco poco, si e kier yega directo of hasiendo un bocht grandi a yega na e mesun meta. Mi ta confía cu tur hende sa kiko ta traha mihor pa nan desaroyo y kiko nan curpa por tuma.
Por ta asina cu hopi sabiduria a bay perdi? Nos por rescata esakinan ainda?
Sabiduria no ta bai perdi nunca… E ta parti di bo ser/esencia/alma y bo a adkeri’e durante di diferente bidanan y evolución. Loke bo a acumula na sabiduría den bidanan anterior ta keda circula den bo centro di energía. Loke a/ta bai perdi ta e coneccion cu nos sabiduría interno y su uso beneficiario. Y e forma mas fasil pa rescate ta di tuma consciencia bek cu nunca ela bai lagabo. Semper e ta disponibel y semper bo por hasi uso di dje… Y ta abo ta esun cu a desconecta of aleja foi dje. E semper tabata tei y lo keda existi.
Toch, apesar di tanto desaroyo y informacion mi ta sinti cu tin hopi soledad, inseguridad, miedo pa bida, miedo pa comunica, miedo pa stima, miedo pa ta felis…. Durante di e primer 7 anjanan di bo bida bo ta wordu indoctrina y conditiona… Y pa colmo net e hende cu mester a dunabo amor, valor, aprecio, attention y carinjo… kwal ta bo mayornan… ta esun nan cu a hasibo dolor…. Ta esun nan cu e rechasabo… Ta esun nan cu bo ta lagabo sinti a bandonabo… Ta esun nan cu kier pa bo comporta bo mes manera nan ta desea… Y hasta a dunabo sin nan por juda e mal ehempel con pa anda cu emoción… A base di esaki nos ta crea un capa protectivo rond di nos curason… pa niun hende no yega cerca y hasi nos dolor. Nos ta prefera di biba den miedo cu tuma e riesgo di wordu heri, rechasa of bandona… Nos kier sconde nos inseguridad tras di un ctitud ficticio of kosnan material (status, kas grandi, auto caro etc). Nos no ta tuma responsabilidad pa loke nos ta pensa sinti of hasi. Nos no ta comunica for di nos amor, compashon y vulnerabilidad… pero for di e deseo di kier bo aprobashon.. of for di e deseo di impresiona e otro…. Of nos ta defensivo sin cu realmente un hende ta ataka nos. Nos ta bisa cu nos kier ta felis y inconscientemente nos ta pensa, sinti y actua net di e forma contrario. Cu otro palabra… nos no ta actua den concordancia di loke nos kier. Nos ta reactivo enbez di ta responsivo.
Si nos pensa riba muchanan, kico ta nos tarea como adulto pa sinja nan desaroya nan sabiduría di chikito ?
Nos tarea como adulto según mi ta pa re-conecta cu e aspecto di mucha den nos, sana loke tin di sana y di e forma aki re-conecta cu nos amor incondicional, nos jubilo, nos inocencia y nos sabiduría… pa nos por guía y ta e ehempel pa nos jiunan. Jiunan no ta sinja di kiko nos ta ‘bisa’ como mayor, pero di loke nos ta ‘hasi’.
Website di Gady Kock: http://www.thewisdomwithin.net
Cu otro palabra ….’ E ehempel cu nos ta duna’… danki Gadi pa comparti bo sabiduria