Crea Abundancia y laga felicidad y placa flow den bo bida…

Crea Abundancia y laga felicidad y placa flow den bo bida…www.comproniendobida.com

Kico ta Abundancia?
Segun Encarta Dictionary ‘Abundancia’ ta: ora cu tin mas cu suficiente di algo disponibel.

Ora nos aplica e leynan spiritual di Abundancia, nos por crea placa, pero tambe salud, felicidad of cualkier otro cos cu ta pone nos sinti nos mes mas completo. Na Aruba tin un grupo grandi cu tin un entrada rond di 1500 Afl pa luna, pues tin hopi espacio pa crea abundancia pa hopi hende.

Ta existi leynan spiritual di Abundancia cu ta hermentnan pa hasi bo soñonan realidad. Pa logra esaki ta importante pa nos siña tende nos bos interno y haya confiansa cu nos por crea loke nos ta desea, tanten cu e ta den harmonia cu e leynan spiritual. Nos tur tin e poder pa crea, pero sea conciente cu bo por crea tanto den un forma positivo, como un forma negativo. Bo ta crea atraves di bo pensamentonan y esaki por ta tanto positivo como negativo, dependiendo di e estado di conciencia cu bo ta bibando aden.

Tur energia den nos universo ta move den olanan y ciclonan, mescos cu lama. Placa tambe, e ta un energia cu ta move, e ta bin y bay. Corda riba e dicho ‘Placa mester lora’, e ta drenta y sali.

Con bo ta traha na e proceso di crea abundancia den bo bida?
Podise e jabi pa crea abundancia den bida ta pa biba cu un curason sincero. Pensa pensamentonan bon… desea bon pa otro hende… hasi bon… juda unda cu bo por…

Pa cuminsa tuma bo propio deseonan na serio y determina kico bo kier.

Gradici pa tur e cosnan bon cu ya ta den bo bida y gradici pa tur esnan cu ta drentando. Desea e mesun cosnan aki tambe pa e resto di mundo.  Aki bo ta compartiendo bon deseonan y ta crea un bala di pensamentonan colectivo positivo. Hasiendo e ehercicio aki pa crea abundancia, bo ta mira cambionan grandi, pasobra bo ta laga pensamentonan bieuw los.

Hunga cu e deseonan na un forma creativo, leve y cu gracia. Sa cu tur cos ta bin na e momento corecto. Sa kico bo kier, laga tur cos los y tuma distancia. Awor bo ta crea espacio pa universo y divinidad traha.

‘Focus’ riba kico bo kier, pero semper den puresa di pensamento. Wak’e, mir’e, hol’e, pint’e, scirbi’e. Den cada forma cu abo por y sa… Esaki ta un cos esencial den crea abundancia.

Bo por usa e principionan aki den tur aspecto di bida.

Bo ta crea abundancia dor di hasi e cosnan cu bo ta gusta, dor di biba den puresa di pensamento y acción. Dor di duna un man unda bo por… dor di stima bo mes y stima otro… dor di desea bon pa bo mes y otro…dor di hasi cosnan cu bo ta encanta pa hasi y cu ta pas cu bo mision di bida.

Majan un articulo riba e rol di afirmacionnan pa crea abundancia…

Leave a Reply

Your email address will not be published. Required fields are marked *