Awe ta dia di bisa danki y honra Bida

Awe ta dia di bisa danki…honra bida…honra bo sonjonan… on www.comprondiendobida.com

Awe ta dia di ‘bisa danki’…
E ta un custumber Mericano…  e ta un bunita pensamento… y mi kier adapta bunita pensamentonan… awe ta dia di bisa danki y nos cada un por sinta y pensa un rato na ken nos kier ‘bisa danki’… por ta na un hende cu tin un nificacion hopi special den bo bida… bo casa, bo pareha, bo yiunan, nietonan, bo mayornan, bo famia y amigonan…

Pero por ta tambe… bisa danki na e hende cu tur dia ta hasi bo cas of oficina limpi… na e dokter cu ta cuida bo salud… esun cu ta jena gasoline pa bo auto… esun cu tur dia ta bisa bo ‘bondia’, maske e no conoce bo…  esun cu a tuma tempo pa scucha bo, ora bo tin mester…

Bisa danki na bida, bisa danki na Dios pa su bunita creacion… na e lama cu ta kita tur bo cansancio y e awa cu bo ta bebe y ta purifica bo…

Bisa danki awe pa bo cuminda di tur dia… bisa danki na bo curpa cu ta sirbi bo pa bo tin bida riba e planeta aki… bisa danki na tur santo of angel of otro ser sagrado cu bo ta kere aden…

Bisa un danki den silencio na tur esnan cu a contribui na bo bida y ya no ta hunto cu bo… bisa danki na Universo cu a crea espacio den su grandesa pa nos por existi…

Bisa danki na bo inteligencia cu ta permiti bo provee pa bo mes y bo famia…y na universo pa su inteligencia divino… na e streanan cu ta lombra tur dia na nos shelo, sin fada ni cansa … pa e solo cu ta calenta nos curpa…

Bisa danki na e persona cu a para keto y duna bo espacio pa ta bo mes y a mira bo jora sin husga bo… na e persona cu a sunchi bo y seca bo lagrimanan…

Bisa danki tambe na e persona cu no a comprondebo… e la inspira bo pa sigi busca… bisa danki na esun cu a papia malo di bo, e la inspira bo pa no hasi mescos…

Bisa danki pa tur momento den bo bida cu a laga bo crese… mira dolornan como oportunidadnan y no como  situacionnan den cua bo ta keda pega… e dolornan, e malesanan… sinja e les y bisa danki pa esaki tambe…

Bisa danki pa tur e amor cu bo a topa y pa tur bo sonjonan cu a bira realidad… y tambe pa esunnan cu ainda bo tin cu sonja….

Asina bo tambe por pensa riba mil y un motibo pa bisa danki… podise hasi’e un custumber di tur dia

Bisa danki pa bo existencia… BO TA UN SER MARAVIJOSO Y ETERNO!

Leave a Reply