Silencio cu ta mata. Ingrid Werleman

Silencio cu ta mata, scirbi pa Ingrid Werleman…www.comprondiendobida.com

Nos  ta biba den un mundo yen di desorden y toch hopi biaha ta asina dushi pa nos busca e silencio… e silencio ta trankilisa y ta crea energia nobo. Di otro banda den nos mundo di desorden, silencio por ta tambe un enemigo grandi. Silencio ta libera mes tanto cu e por hinca nos den su prison. Silencio ta bira un prison ora nos no por papia riba cosnan cu ta molestia nos of ta hasi nos dolor. Silencio ta ruman di  secreto y yiu di taboe. Silencio ta stroba palabranan di sali, paso e ta hasi oreanan di un otro dolor. E ta un di e cosnan cu mas ta danja relacionnan, den ki forma cu ta. ‘Mi no kier tende,’ ‘no ta berdad’, ‘bo ta ganja ‘, ‘mi no kier sa’, ‘awo ki no’ y asina ta sigi hui pa berdadnan cu no ta nace nunca paso nos no ta tribi di cana den e sapato di e otro y purba sinti su dolor.

Den e buki ‘Uit Elkaar’ cu ta bay over di yiunan di parejanan divorcia, mi ta corda un pasaje cu ta conta di un mucha muhe cu a conta riba su sentimentonan doloroso di e diborcio di su mayornan. Y un dia e la jega cas y haja un envelop den su brievenbus cu tur su potretnan cu su mama tabatin di dje kibra na pida pida. Un bon ehempel cu no ta duna espacio pa por juda ni bo mes ni un otro hende dor di comparti experencia y dolor. Bida a sinja mi cu un di e cosnan di mas tristo ta ora cu bo no por papia di e cosnan di alma, e emocionnan cu heridanan di bida a laga bo cun’e.

Experencia a sinja mi cu cosnan cu nos no por papia riba dje ta sali den un of otro forma y ta come nos, sea ta nos curpa, nos mente, nos curason of nos alma. Bida a sinja mi tambe cu mi no por cambia niun hende, pero si mi por scoge mi experencia cu mi kier biba. Bida a sinja mi tambe cu papel ta un di mi amigonan di mas grandi, paso e no ta purba imprisiona mi. E tragedia mas grandi ta cu silencio no ta juda niun hende, al contrario kier of no, cada un partido involvi ta crea su propio prison. Esun cu kier papia ta bira un sorto di paria, pasobra e ta kibra e harmonia artificial cu ta existi y esun cu no por papia dificilmente por sana su mes… pasobra e no ta haja espacio ni ocashon pa comparti y expresa su mes…

Silencio ta mata? Tin ora lihe, tin ora poco poco… loke sigur e ta mata ta e ocashon pa sinja scucha e otro, sinja compronde… crese y comunica… Ki lastima di oportunidadnan precioso…te dia cu nos compronde… kico ta nifica pa cana den e sapatonan di e otro…

Unda bo a tende di Comprondiendo Bida?

View Results

Loading ... Loading ...

Leave a Reply

Your email address will not be published. Required fields are marked *