Herencia cultural, un dama cu mester stima

Herencia cultural, un dama cu mester stima. -Quito Nicolaas – www.comprondiendobida.com

E articulo aki a wordo referi door di Angelo Angela.

Verborgen LeegteAngelo Angela: Mi kier a comparti un analisis di Quito Nicolaas tocante con leu nos ta den e parti artistico/cultural.

Herencia cultural: un dama cu mester stima!

Durante mi estadia mi a bin topa cu un Aruba cu ta brota di energia. Un energia cu ta busca caminda pa e sali y plama bou di e pueblo. Esei kier men cu hendenan ta pidi pa un alternativa, algo otro y diferente banda di e fiestanan y otro formanan di pasa tempo liber. Asina tambe nos conoci un cantidad di cursonan, tayernan, actividadnan cultural, conciertonan cu a mira lus di dia.
Hopi iniciativanan nobo, manera Serena di Arikok y programanan na radio y tv a ser lansa.
Di otro banda cu binimento di e shopping-mall, e.o. Palm Beach Plaza, por dividi Aruba den un parti super-moderno y un parti cu ta keda anticua.

E parti moderno ta concentra na Paseo Herencia y ta tur locual cu ta rondona e industria di moda, e life-style y e glamour cu tur hende ke luci manera un artista. Di otro banda bo tin e parti anticua, cu a keda atrasa: nos herencia cultural, obranan teatral, literatura, actividadnan cultural. Un ehempel: Ora mi cana den Steenweg (patras di Nassaustraat) of den Oranjestraat y mi mira con a laga cierto casnan cu un balor historico bai atras, mi ta haña esaki hopi tristo cu Monumentenzorg no ta haci nada pa rescata e herencia cultural aki. Den Wilhelminastraat caba un di e casnan aki a bai perdi.

Ora mi midi e asistencia na mi propio presentacion di buki – cual tabata yen-yen – of esun di Rosabelle Illes, mi tin un cierto speransa. Tog tin hopi alma y principalmente si nan ta caranan nobo, cu ta interesa den lesamento di buki. Pues tin hopi interes y iniciativanan ta ser tuma, pero tog un caminda e situacion ta tranca y ta keda pega. Ora mi tende cu nos no conoce un cultura di lesa, e ta pone mi pensa y adapta mi criterionan. Berdad ta cu tur pais cu a ser colonisa, conoce e fenomeno cu nos no a ser educa ni lanta na cas pa aprecia lesamento. Pues mi contesta na e persona tabata: “Si nos sa esei, anto lo mester traha na esei tambe. Deshaci di tur e rasconan colonial den nos sociedad y construi un sociedad nobo y moderno.”

Hecho ta cu na Colegio awendia cu hopi dolo bo ta haya un alumno ta lesa 3 buki pa su examen. Na Korsou un 39% di e alumnonan Havo/Vwo ta lesa menos cu 1 ora pa siman y un 44% no ta lesa mes. Na Aruba e situacion lo ta mesun cos – aunke a straña mi cu no tin datos ainda disponibel – y no ta diferencia for di Korsou. E buki Kadans: Literatuurgeschiedenis di Antiyas y Aruba no ta ser uza na skol, debi cu esaki ta ser cualifica como demasiado dificil. Na momento cu mi a lesa e buki aki, mi a yega na e conclusion: Ora e studiante caba Colegio, e ta bai tin conocemento di literatura Latino-Americano, Caribense, Antiyano y Arubiano. Aparte di esei e lo cera conoci tambe cu Literatura Africano, Europeo y Mericano. Un enriquisimento di conocemento cu antes nos no tabata conoci den enseñansa.

Un di e motibonan principal cu e mecanismo ta tranca, ta debi cu e procesonan no ta re-enforsa otro. Por ehempel no tin un persona ta recensia buki den e corantnan na Papiamento, of no tin un programa di literatura na radio y tv. Of dor di e cultura di berguensa e libertad artistico no ta haya forma. E artistanan ta prefera di pinta un paisahe of un cas di antaño, enves di pinta algo cu ta refleha nos bida sexual. Pero tambe cu artistanan di exterior ta ricibi un trato preferencial riba nos propio Yiunan di tera. Pa e motibo aki tambe mester haci mas uzo di e medianan alternativa cu Internet ta brinda: un canal di tv via Internet, e-zines. Pues e uzo di e networknan social, manera e.o. Face book, Hyves, Sonico etc.etc. mester a haña un otro contenido.

Quito Nicolaas

Unda bo a tende di Comprondiendo Bida?

View Results

Loading ... Loading ...

Leave a Reply

Your email address will not be published. Required fields are marked *