Alma, Amor y Felicidad.

Alma…Amor y Felicidad…E arte di relacion… Ingrid Werleman www.comprondiendobida.com

Nunca mi a siña un caminda con pa papia riba e cosnan di mi alma. Pensando y buscando mi a scirbi nan pa mi mes. No  semper tabata facil pa confia nan riba papel. Bo ta confronta bo mes y bo dolor y preguntanan di bida. Pero mi ta contento cu mi a hasi’e. Mi a cana ta observando bida y hende, habriendo un mundo na refleho riba mi mes. Observando otro, mi ta evaluando mi mes, e otro semper ta mi spiel. ‘Ken ami ta?’, ‘con mi kier ta?, ‘con mi no kier ta?’. ‘Purba pa no ‘husga’. Ami no conoce e mundo cu tin sconde tras di un otro hende. Cada hende ta un mundo cu a hasi’e ken e ta. Su pakete y experencia pa pasa den den e mundo, con pa siña su lesnan di bida.

Di un forma of otro, nos tur ta cana, buscando amor, buscando felicidad. Algo hopi personal, nos propio pensamento kico e ta ensera. Tin hende ta asocia amor cu dolor y no ta pensa cu felicidad total ‘bliss’ por existi. Bo ta corda e dicho ‘amor sin dolor, no ta amor’?

Pesey buscando amor y felicidad hopi bes ta ensera tambe ‘buscando dolor’?. Casi por bisa cu nos ta condiciona pa pensa cu ‘bida ta un sufrimento’. Y ‘bida ta un baño di lagrima’ tambe ta un bon. Con hopi  palabra por  gaña nos…. y con hopi nos a kere! Pensamento y dichonan ta penetra nos pensamento y ta crea nos realidad! Nos ta crese, siñando pa no confia hende. Pensando cu tin un diferencia hopi grandi entre homber y muhe. E homber semper mester conquista y e muhe ta pasivo.
Asina dificilmente un relacion por ta segun e principionan di ‘berdad, amor y pordon’. Nos ta gaña pa tene e otro contento. Nos no tin amistad mas cu personanan di e sexo opuesto, pasobra awor nos ta ‘pertenece’ na ‘un’ hende so. Y nos ta crea nos prison pa nos mes y nos pareha. Adiccion na otro. Nos no por biba sin e otro. No pasobra esaki ta e realidad, sino e unico forma pa mantene un relacion den hopi caso. Nos kier casa cu nos dobbel, nos alma gemela, nos clone. Y nos sa cu esaki no ta existi. Nos ta biba cu e ‘realidad’ aki, pasobra nos no a siña cu por otro.

Ningun hende a siña nos riba e ‘arte di relacion’. Cu pa stima un otro, nos mester siña pa stima nos mes prome.  No segun e modelo di kico of ken ta ‘perfecto’. Cada un di nos ta perfecto manera nos ta. Ora nos acepta y stima nos mes manera nos ta, nos ta na caminda pa logra tur loke nos kier. Si mi kier un curpa mas flaco, mi por cuminsa pa stima mi curpa cu ta un tiki mucho gordo. Awor mi por trese cambio. Mi ta acepta bisa mi curpa cu tur dia e ta bira un tiki mas flaco y mi ta sigi stim’e. Si mi odia mi curpa y rechas’e, con mi kier cambi’e?  Podise ‘ami’ por cuminsa pensa serio riba ‘kico’ ta hasi ami felis di berdad. Ora ami pensa ‘cu mi alma’ riba esaki mi ta pensa cu ta hasi mi felis pa hasi cada cos cu amor y dedicacion.

Felicidad y Amor ta ancra den  cosnan cu ta alimenta mi alma. Lo no ta bon pa cada hende hasi su mes e pregunta aki y biba segun e contesta? Ki felis e mundo aki lo ta… Bo no ta kere? Mi ta desea bo un dia cu hopi amor…

Unda bo a tende di Comprondiendo Bida?

View Results

Loading ... Loading ...

Leave a Reply