Awe ta ‘Dia di Betico’… un Arubiano cu a kere den e ‘pais’ Aruba y a dedica hopi di su bida na logra nos Status Aparte. Betico su sonjo tabata pa tur hende cu ta biba riba Aruba, stima ‘Aruba, nos dushi Tera’. Si nos mira bek riba ‘E sonjo di Betico’ nos por puntra nos mes ‘Con hopi a keda realisa di e vision aki?’.
Mi kier mira cos for di un punto objetivo, splicando mi mes pa por jega na algo cu ta promove integracion, respet y hermandad. Finalmente nos tur mester biba y traha hunto y hasi di Aruba un dushi pais pa biba. Esaki awor ta e caso? Y si ta no, dicon? E ora ta lanta serca mi e pregunta con orgujoso e propio Arubiano ta ‘di berdad’ di su isla.
Orgujoso di berdad, un orgujo y amor cu ta sali di bo curason y cu bo por compara cu e amor grandi di un mama pa su jiu. Podiser esey ta e miho forma pa splica e sentimento cu hopi bes nos kier pa tur hende cu ta biba akinan sinti pa Aruba ora. Si mi tin un jiu mi no kier pa nada malo pas’e, mi lo proteh’e y no kier pa hende papia malo di dje sin rason. Si e tin un pareha mi lo kier pa e persona aki stima mi jiu y no mal us’e. E metafor aki ta splica na un bon forma con mi lo kier pa tur hende cu scoge Aruba como nan pais pa traha of biba, stim’e y respet’e. Manera un mama ta stima su jiu. Mi ta compronde cu Aruba ta un pais hopi mas chikito cu hopi pais mama di hopi hende cu ta biba akinan, pero esey no ta kita afo cu e tin su gran balor pa cada hende cu scoge pa biba riba dje. Ja na momento cu un persona a dicidi pa bin biba aki e ta nifica cu e la scoge Aruba ‘riba’ su pais, sino e lo a keda. E ora ‘size’ ya no ta conta, pero kico ta e beneficionan cu bo tin. Y esey merece respet pa loke ta di e pais, su idioma, su cultura y su identidad.
Pero…aki atrobe ta lanta e pregunta con hopi e Arubianonan ‘di pura sepa’ mes ta stima y respeta nos mesun ‘cosnan’. Nos papiamento ta jena cu palabranan ‘verbonan’ nobo, modismo mientras cu nos tin nos propio palabranan. E ora pakico cambia nan? No paso nos ta stima nos propio idioma asina tanto, toch? Pensa riba dje… Un otro ehempel ta e musica cu ta toca tur dia na nos radionan…e musica cu nos ta baila, con hopi di nan ta den papiamento? Cada biaha cu mi sali bay baila mi tin cu ‘roga’ pa un wals arubiano…ami ta orgujoso di mi musica cu ta dushi pa baila.
Mi ta orgujoso di mi isla y su hendenan di bon curason. Mi ta corda un anochi cu mi tabata na un comemento di pasco di un empresa unda hopi nacionalidad ta traha hunto den pas y harmonia. Anto un mucha chikito a pidi pa nos canta e himno di Aruba y ‘tur’ hende presente a canta hunto. Mi a bisa e doño cu e mucha chikito a siña nos tur un les kico ta union. Mi ta spera cu henter mi alma y curason cu un dia ‘tur’ hende cu ta biba na Aruba, irespecto di unda nan a nace…por para un caminda hunto y canta nos himno cu alma y curason… e ora ‘integracion’ a logra, pasobra ‘amor’ a vence… Mi ta desea bo ‘Felis Dia di Betico’…
Loading ...