Dr. Viana: Menopausa, su mito y berdadnan – Parti 1

Dr. Viana riba Menopausa, su mito y berdadnan.
Medicamente, menopausa ta wordu defini como: “ora cu bo no a haña bo menstruacion pa un aña”. Menopausa ta e fin di un proceso largo y poco poco cu jama peri-menopausa, cu ta e cambionan cu ta pasando den curpa di un hende muher. Cambionan completamente normal y parti di su bida mescos cu pubertad. E ovarionan di e hende muher ora e ta na mitad di su añanan 30 ta cuminsa cambia e cantidad di estrogeno y progesterona cu e ta produci.
www.comprondiendobida.com

picture dr vianaContribucion di Dr. Carlos Viana

Medicamente, menopausa ta wordu defini como: “ora cu bo no a haña bo menstruacion pa un aña”.  Menopausa ta e fin di un proceso largo y poco poco cu jama peri-menopausa, cu ta e cambionan cu ta pasando den curpa di un hende muher.  Cambionan completamente normal y parti di su bida mescos cu pubertad.  E ovarionan di e hende muher ora e ta na mitad di su añanan 30 ta cuminsa cambia e cantidad di estrogeno y progesterona cu e ta produci.  E dos hormona femenino aki ta mesun importante pa un ciclo menstrual normal y preñez exitoso.   Tin hopi falta di informacion riba menopauase y den e articulo aki mi ta splica conceptonan eroneo tocante menopausa.

Den nos clinica, ora mi informa hende muhernan cu nan sintomanan ta pre-menopausico hopi di nan ta bisa cu esaki no por pasobra nan no tin 50 aña ainda!

50 aña no ta e unico edad cu muhernan ta bai den e cambio di bida.  Segun statisticanan aproximadamente un den cada shen muher lo pasa den menopausa cu 40 aña of mas jong.  E edad averahe pa haña menopausa awendia ta 52, cu un averahe entre 45 y 55 anja.  E sintomanan di e cambio di bida of peri-menopausa por cuminsa na final di bo trintanan y por dura mas of menos 13 aña!

Un menopausa hopi delanta por bin a consecuencia di  operacion.  Menopausa induci dor di operacion tambe ta conoci como menopausa artificial.  Por ehempel, ora un muher hasi un histerectomia  of saca matriz conhuntamente cu e ovarionan; esaki ta un menopausa artificial.   Di acuerdo cu algun experto varios factor, manera un malesa auto inmun relaciona na mal alimentacion of stress cronico por causa menopausa trempan.

Hopi pashent, mientras nan ta subi di edad ta pensa cu tur hende muher ta experencia e mesun sintomanan di menopausa manera keintura na cara, cambio di beis, insomnia, depresion, etc. pa añanan largo.  Investigacion ta indica cu 15% di hende muher no ta haña ningun sintoma di menopausa.  Investigadornan medico a documenta cu mientras algun muher ta djis stop di menstrua y no tin ningun simtoma, 85% lo experencia keintura y calornan na cara.  Como antropologo medico, mi por conta di algun cultura, manera e Navahonan tradicional cu ta mustra  poco sintoma di menopause.  Den paisnan industrial e status socio-economico tin hopi di hasi cu e sintomanan menopausico cu e muher ta refleha.  Muhernan cu entrada mas halto tin hopi mas sintoma.   Estudio aki ta mustra cu mas tanto factornan sicologico ta determina sintomanan di menopausa.

Hopi hende muher ta bisami cu nan ta sinti hopi iritacion, nan tin cambionan di beis, ta haña awa den wowo hopi lihe y ta sinti cu mundo ta bin abou rond di nan, tin miedo, y no por concentra y tin menos abilidad di por maneha trabounan di tur dia. Hopi hende muher, tambe esnan cu nunca tabata tin problema pa drumi, ta sufri di insomnio ocasiona dor di menopausa.   Mientras tanto, pa algun hende muher, menopausa por ta emocionalmente hopi trankil.  E factornan cu mas tanto ta yuda pa un muher por pasa dor di e cambio di bida aki sin demasiado problema fisico y/of emocional ta hopi. Nan ta inclui salud personal y un bon historia medico di e añanan cu nan a haya yiu, e bon salud di su antecedentenan feminino y e bon salud di su famianan femenino na bida, su custumbernan di come awo y den pasado, uso di alcohol y humamento awor y den pasado, uso di remedi, hasi ehercicio regular, un actitud di bida positivo, biba sin stress y stima bo mes.

Carlos Viana ta un Docter (Ph D) den Antropologia Medico, —e ta un Doctor den Medicina Tradicional  Oriental  studia  na Shanghai, China;  nutricionista clinico certifica.  Pa mas info: Viana Natural Healing Center, Kibaima 7,t:  585 1270  f:  585 4789, Web site: www.viananaturalhealing.com e-mail : viananatural@hotmail.com

Majan parti 2: Tratamento di menopausa, menopausa y intimidad

Unda bo a tende di Comprondiendo Bida?

View Results

Loading ... Loading ...

Leave a Reply