Ora yiu ta paga e prijs di separacion

Ora e yiu ta paga e prijs di separacion…Realmente nos ta wak cu continuamente e muchanan, e yiunan ta bira e victimanan mas grandi den confrontacionnan entre mayornan. Nos ta wak cu hopi biaha un mayor of tur dos mayor no por hasi diferencia entre e situacion di e pareha y e relacion entre mayor y yiu. www.comprondiendobida.com

mucha maltrataBasa riba experencia di un major anonimo.

Realmente nos ta wak cu continuamente e muchanan, e yiunan ta bira e victimanan mas grandi den confrontacionnan entre mayornan. Nos ta wak cu hopi biaha un mayor of tur dos mayor no por hasi diferencia entre e situacion di e pareha y e relacion entre mayor y yiu. Esaki ta un muestra grandi di inmadures emocional. E decreto universal di e derechonan di mucha ta stipula claramente cu un mucha tin derecho riba e cuido y atencion di tur dos mayor. Te ainda no tin un ley pa obliga mayornan pa cumpli cu nan deber di duna cada yiu e mesun cuido y atencion. Esaki ta lastima, paso e mucha nunca lo compronde e ‘traicion’ aki. Semper e lo puntra su mes dicon su mayor a bandon’e.  E mucha port e hasta duna su mes e culpa cu su mayornan a bay for di otro. Un mucha por kere cu un mayor a bay lag’e pasobra nan no tabata suficiente ‘bon mucha’.  Tambe ta conoci cu un mucha neglisha pa un mayor por asumi un actitud auto-destructivo dor di bay den vicionan di alcohol y droga, bay den criminalidad of cay den depresionnan cu por ta fatal.

Di con un mayor por hasi esaki cu su mesun yiu?

Ultimamente a discubri cu tambe e aspectonan di caracter ta ser pasa di mayor pa yiu. No solamente den su socialisacion, pero tambe atraves di e sistema biologico y neurologico. Anto e ora, no ta asina cu juist nos mester ta mas cauteloso cu e alma y espiritu di nos yiunan??? 

Podise nos a lubida di madura emocionalmente. Den hopi caso nos ta wak cu un mayor ta risisti e cambionan den un relacion y ta busca un forma pa castiga e otro pareha. Hopi partner ta pensa cu un bon metodo pa castiga e otro pareha ta dor di no duna e mucha atencion. Realidad di bida ta mustra cu esaki no ta afecta e otro pareha ora e persona aki sa con pa anda cu su emocionnan na un forma madura.

Esun cu si e ta afecta ta e yiu of yiunan. E ora ta bon pa e mayornan tene na cuenta cu ta di nan pareha nan a separa y no di nan yiunan. Ta bon pa e instancia cu ta encarga pa defende e interes di e yiunan despues di divorcio cuminsa wak si ta posibel pa implementa e derecho fundamental di un mucha pa tin contacto positivo cu ambos major aki como un obligacion di tur dos mayor. No ta aconsehabel pa e keda un opcion cu cada mayor pa dicidi segun su propio criteria. Muchanan ta e victimanan y no e causa di un divorcio of separacion y nan nunca mag di sufri e consecuencianan. Nan tin derecho riba un cuido emocionalmente balansa di ambos mayor. Si un mayor no ta desea di duna esaki, mester studia posibilidadnan di sancion, mescos cu ta existi den otro paisnan cu ta tuma e derechonan di mucha mas na serio.
Talves loke nos mas falta como adulto ta sinceridad y grandesa…

Leave a Reply