Tempo – Al Figaroa

Al Figaroa ta duna su version hubenil di ‘Tempo’…. tempo tin comienso y fin…. e ta existi? www.comprondiendobida.com

al figaroaAtami aki, cu por bati riba mi pecho y bisa; “Mi a logra, mi a sobresali”! Pero warda, ban spula bek poco patras, y ban bek den tempo y realisa kiko ta e orguyo, e logro y pakiko e sobresaliencia. No ban lubida cu tin un comienso, y manera semper, cada comienso tin su fin. Tur loke cu ta resta entre nan ta Tempo. Kiko ta su balor, kiko e ta spera dibo y kiko tur bo por dune? Bo ta wak e como un inversion, algo pa spaar y sperabo dia di asuncion? Of bo ta alsa bo bos y bisa, mi Tempo ta dimi y mi ta pasa mane mi ta sinti ta bon? Ab initio pa In fine nos ta wordo comanda, practicamente dicta pa laga sa kiko ta wordo spera di nos. Y si bo ta tribi di habri bo boca, nan ta corta bo hala. No ta keda otro excusa mas pa kibra, ni pa desinspira of demotiva. Y loke mas ta herida, ta e desilusion cu un lo sinti, despues di traga cierto engaño cu pa un dia, bo lo bin realisa, .

“Mi si ta tira e prome piedra, pa demostra cu ami si tin e curashi pa pone e prome paso y sigi padilanti”.
Tempo, si tempo, ta dicidi hopi cos. Bida ta wordo dividi den diferente segmento y cada uno ta contene y exploita un contexto. E prome lapso cu ta dura diez anja ta bo prome y ultimo añanan di bo inocencia. For di eynan ningun lesado di carta por bisabo otro, como cu tur cos ta den bo man. E lapso aki cu ta dura te cu bo diesocho pa bintiun aña y ta sera e di dos decada di bo excistencia, pero te ainda, kiko ta bo logro? E tercer lapso ta pasa manera un trein y si bo no ta abordo, ta paso bo a lubida bo caarchi of nunca no a cumpre. Di eynan, bo Tempo ta bira sinonimo di Destino, pa bo haya algo di tira culpa y acusa. Bida di berdad ta un regaldo y bo tin di probecha di dje cada momento, pero con conciente bo ta? Cuanto tentacion bo por wanta, prome bo duna di gana? Un dia bo tin di cay, kizas no duro, pero bo lo cay.

“Mi no tin cunes ta ken ta para mi dilanti. Mi no kier ta egoista, pero mi Spirito ta mi sole guia”.
Ad astra per aspera, gran parti ta e realidad. Nos tur ta posei uno y nos tur kier alcanse. E caminda por ta yena cu claridad y bo no mester guia of e caminda ta scur y abo mester dune bo lus. Pa algun e lo bin duro y loke ta desampara, ta ora nan pone un fin, y si no ta pa cabuya, ta a base di un estupidez. Pero ken pa culpa? Riba ken por mustra dede?

Y atrobe pa algun e lo bin como e perfecto soño cu si nan no kinipi nan mes, nan no sa cu nan ta bibando su realidad. Pero e ora, ken pa agradeci? Riba ken pa pensa? Un Croes, un Ecuri? Kizas cu tempo nos lo realisa aunke hopi biaha lo ta mucho laat. E ta bula, e ta costoso y si bo warda, e ta pasa bay lagabo.

Y atami ki, te ainda ta batiendo riba mi pecho y cu grito awo bisando; “Te ainda mi ta logrando y cielo ta e limite”. Y asina e lo continua … lapso tras di lapso …

“Mi ta sintimi bieu y mi kier sosega, pero ken mi tin, pa pega soño den su brasa”.

Autor: A. Figaroa ©

Leave a Reply

Your email address will not be published. Required fields are marked *