Tuma bo mes na serio

Tin biaha nos ta siguie, tin biaha nos ta ignor’e, tin ora nos ta contento cu ne y na otro momento, ora cu e “faya”, nos ta culp’e.
….Abo sa kico e ta? Rosabelle Illes ta conta bo riba www.comprondiendobida.com

rosabelle illes -1
Rosabelle Illes

Un contribucion di Rosabelle Illes

Abo a yega di caba e frase “Si mi tawata sa, lo mi a…”? Bo a yega di compañ’e cu e frase “Anto algo tawata bisa mi, pero…”? E ta mundialmente acepta cu tin aspectonan di bida cu ta fuera di nos control. Sinembargo, recientemente e nocion cu nos tin nos bida den nos man, nos ta responsabel y nos tin e libertad di escogencia y, den esey, e poder di determina kico nos bida lo ta, tambe ta wordo mas y mas acepta. Na cierto momento e sintesis ta revela su mes. E tesis: Tin aspectonan di bida cu ta fuera di nos control. E antitesis: Nos por eherce control pa medio di libertad di escogencia. Cua ta berdad? Of mihor poni, kico e tension lo crea? En realidad e contesta no ta importa. Simplemente pasobra nos sa caba.


Considera lo siguiente: Nos ta gusta proteha nos mes di propio culpa y bisa “Si mi tawata sa, lo mi a…” Den mesun rosea nos no por resisti di expresa nos sabiduria “Anto algo tawata bisa mi, pero…” E integracion di e dos frasenan aki ta dirigi nos na un accion revolucionario, specificamente: Tuma bo mes na serio.
Ora cu bo ricibi mensahenan cu, na e momento, no ta mustra lo añadi na nada, tuma bo mes na serio. No cu e mensahe, manera abo a compronde, ta corecto, pero cu e mensahe tin su motibo. Hopi biaha nos ta analisa nos subconsciencia cu nos perspectiva actual. Lubidando cu locual ta bin di paden tin un otro lenguahe. Nos a perfecciona e lenguahe y actitud social. Esaki ta pone cu nos por compronde ora cu un hende bisa “Laga mi na paz!” e kiermen “Dicon te ainda bo no a duna mi atencion?” Den mesun manera, nos subconsciencia tambe tin su propio lenguahe, no mucho familiar pa nos. Nos no ta compronde dicon tin biaha nos subconsciencia ta traha y otro ora e ta “out of order.” Tin biaha nos ta siguie, tin biaha nos ta ignor’e, tin ora nos ta contento cu ne y na otro momento, ora cu e “faya”, nos ta culp’e.
Scientificonan a demostra cu e subconsciencia su capacidad ta sin limite y cu si nos siguie, esaki lo resulta den bon desicionnan, especialmente ora ta trata di decisionnan complica (Dijksterhuis et al., 2006). Awor locual ta resta nos ta di siña e lenguahe di nos subconsciencia. En realidad e frase ta “Anto algo tawata bisa mi, pero mi no a tum’e na serio.” Dor cu e ta un lenguahe cu nos no a perfecciona, tin biaha nos ta compronde y e ta resulta den nos fabor, pero na otro momentonan, ora cu nos no compronde, nos ta ignor’e. Den e caso cu nos no compronde, nos ta sinta warda te ora cu e Wikipedia di bida revela algun evento y permiti nos completa e puzzel pa nos traduci locual “algo” tawata bisando nos. Como Rubianonan, nos ta custuma cu un minimo di tres lenguahe. Pakico no tuma nos mes na serio y expande nos CV cu un mas?
– Rosabelle Illes
www.rosabelleilles.com

Referencia
Dijksterhuis, A., Bos, M. W., Nordgren L. F., Baaren, R.B. (2006). On making the right choice: The deliberation-without-attention effect. Science, 311, 1005-1007.

rosabelle illes

One thought on “Tuma bo mes na serio”

  1. thanks e ta hopi bon .
    tin cu lese mas biaha pa bin compronde e berdad.
    ma e ta hopi bon Rosa.
    merry

Leave a Reply to merry werleman Cancel reply

Your email address will not be published. Required fields are marked *