Presentacion di Comprondiendo Bida y evento ‘Pensando riba Bida’ a inspira…

Presentacion di Comprondiendo Bida y evento ‘Pensa riba Bida’ a inspira…un bista general di un anochi pa alimenta nos alma y curason

ingrid ta entrega revista na oradornanNa prome lugar danki na tur hende cu e a hasi e bunita anochi aki posibel. E tabata un anochi cu a toca hopi curason. Tambe cu a inspira e publico presente pa pensa riba bida. No solamente e bida awe, pero tambe e bida majan. E bida na nos pais Aruba. E bida den nos famia.
Mi persona, Ingrid Werleman a cuminsa e anochi cu un presentacion di e website Comprondiendo Bida. E oradornan Dr. Jaime Falconi, Belquis Moreu, Edsel Lopez y invitada di honor minister Michelle Winklaar tabatin algun puntonan comun den nan mensaje. Nan tur a mustra riba e cambionan den bida cu nos lo por pensa riba dje. Bida pura y agita a pone nos bay den un rutina di bida cu ta laga poco tempo pa interaccion humano.

Tin cosnan simpel cu nos a laga cai for di nos bida di tur dia, pero hopi bes e balor ta sinta juist den e cosnan aki. Un ehempel cu a bin cerca tur padilanti ta cu famia hopi bes no ta tuma tempo pa hasi cosnan hunto. Por ehempel, nan no ta sinta hunto na mesa pa come. Na lugar di bon custumber aki unda por papia riba con e dia a bay y kico por hasi hunto, cada miembro di famia ta sinta un otro caminda. Den kamber, dilanti computer, dilanti television of ta ping cu cellular. Kico esaki a hasi cu nos famianan ta cu hopi di e calor familiar ta bay perdi. Nos ta biba hunto den un cas, pero nos no ta forma un hogar mas. Esaki ta tambe den nos barionan, unda hopi hende no sa ni ken ta nan bisinja mas. Nos a hisa e murajanan di cas y te hasta curanan hopi bes no tin mas, pasobra nos kier un cas mas grandi posibel.
Nos a modernisa y nos a desaroya, pero ta keda e pregunta si nos pais a bira un miho pais y nos mes un hende mas felis. Cu e problemanan, manera violencia, ladronicia, guera, desaster natural cu nos tin awo tabata existi den henter historia di hende ta berdad. E diferencia ta e cambio cu cada un di nos por hasi dor di trese cambio den nos bida diario, dor di pensa y refleha y ta e miho ehempel di loke nos kier mira den nos mundo… Aki nan pensamentonan ta nace cu por ta hopi balioso, pasobra nan ta pensamentonan cu ta nace for di e sinceridad di e curason.

Na final di e anochi tabatin hopi pregunta y un treat pa cada persona.

Un danki special na mi yiu Ralph Albertus cu ta administra nos website, coordina ‘social media’ y strategia di e projecto en general. Tambe na mi pareja Johan Koop pa a duna mi tur e espacio y apojo pa por trata na e website. Danki na tur hende cu a duna nan aporte, e media di Aruba, na e oradornan, na Biblioteca Nacional, Certified Mega Mall y mi ruman Rosa y su nieta Kimberly pa e dushi snacknan. Y na bida mes cu un dia a inspira mi pa purba compronde bida…un proceso cu nunca ta caba…

Proximo dianan lo publica relato di cada orador apart…

Leave a Reply

Your email address will not be published. Required fields are marked *