Birando E Cambio tabata un workshop diferente…

Laga bo accionnan y pensamentonan ta e regalo di mas grandi cu bo ta duna na bo mes y bida mes… e resumen di e workshop ‘Birando E Cambio’…

tile workshop -birando e cambio -1Edjean Semeleer a habri e anochi cu e cantica ‘Recuerdo’ di Ramon Krozendijk cu a laga tur hende keto keto…pa Edjean y hendenan presente ‘Recuerdo’ ta simbolisa E Aruba cu nos tur ta stima y cu ta cambiando cada dia mas…pesey Edjean ta bisa: “Den cada rol di nos bida, ta bon pa nos ta conciente di e ehempel cu nos por ta cu e cosnan cu nos ta hasi, bisa y pensa”. Danki Edjean, abo riba bo mes ta un inspiracion di e Arubiano di noble curason. E ta radia, no solamente di bo canto, pero di henter bo ser.

Belquis Moreu a comparti 4 palabra cu por juda un hende transforma su bida. Nan ta ‘danki’, ‘mi stima bo’, ‘despensa mi’ y ‘pordona mi’. E publico a bisa e palabranan mientras nan ta hasi tapping.

E principio di e tecnica aki ta cu ami ta responsabel pa tur loke mi ta sinti y cu pas ta cuminsa cu mi. Pesey ami mester traha pa ta limpi den mi pensamento y accion, pero tambe den mi memoria y subconciencia. E ta un tecnica bieuw di Hawai cu ta usa den hopi terapia. E ta hasi un diferencia no den e hende cu ta aplic’e so, pero den henter e circulo di hende cu ta rondon’e. Belquis a corda tur hende cu berdad e cambio cu nos ta desea ta cuminsa cu nos mes ora nos ta hasi e cos corecto, pero hasi’e ful di nos curason, cu amor y cu e pensamento corecto…Danki Belquis, bo ta special!

Mi persona a repasa amor como actitud cu tabata conecta nos cu tur cos cu nos tabata hasi. Amor pa nos mes, nos famia, nos naturalesa, nos trabou tabata un forma di ta. Respet, dedicacion, responsabilidad tabata actitudnan basico. Esaki a cuminsa bay perdi ora cu nos a industrialisa y comercialisa asina hopi cu nos ya no tabatin e coneccion directo cu loke nos ta hasi. E hende a bira un parti chiquito di corporativanan grandi, e famianan a plama for di otro y nos tabata resta poco tempo pa nos mes. Si nos realisa cu Amor ta nos destino, nos lo por switch un dia pa logra major felicidad dor di biba conciente di e pasonan cu nos ta tuma… cosnan simpel, manera aplica mas amor y disciplina y tempo pa hasi cosnan hunto.

Giovanna Fijn di Beauty with Style a splica e balor di aromaterapia den nos bida diario. Con pa kita stress, insomio, hyperactividad di yiu, problema cu concentracion, etc. y te hasta a duna un dushi masashi na un senjora cu tabatin mester di esaki na e momento aki. Pronto nos lo scirbi un articulo riba e tema aki. Giovanna, bo ta trese bo informacion cu pashon… un danki di curason.

Dr. Carlos Viana a recore nos curpa, mente y alma den su presentacion ‘Cuminda y Calidad di Bida’. E la hasi nos conciente cu cada etapa den bida tin su puntonan di atencion. Nos calidad di bida ta den nos man y dr. Viana, Phyllis y Emy ta juda nos cuid’e. Danki na boso 3 pa tur e oranan di preparacion. Tambe riba e tema aki pronto mas informacion.

Finalmente nos di Comprondiendo Bida kier gradici TUR persona cu tabata presente na e workshop y ta pidi pa pasa e informacion na cada hende cu por beneficia di dje. Sin boso no tin workshop y sin boso no tin cambio… pesey laga e recuerdo di bo bida ta bo regalo mas grandi na bida mes…
Y un danki, super danki na Gea, Susan y Magaly di Spirit of Aruba, pa nan bunita set up y serenidad di nan centro. Y prensa di Aruba y Francis y Nelson… danki pa ta e amigonan di semper… love you all..

Ingrid Werleman pa Comprondiendo Bida

Leave a Reply