E Dia Perfecto

Al Figaroa ta bisa: ‘E storia ta toca un tema di orguyo, Arubiano y di un bida diario di cualkier hende. Y sin lubida cu tur dia por ta un dia yena cu inspiracion’. Y e ta toca bo curason. Lesé!

al figaroa - 5 Un storia di Al Figaroa

Mi ta lanta mainta y e prome cos cu ta pasa den mi mente ta mi famia. Demasiado mi ta stimanan y nunca lo mi no kier perdenan. Un pensamento poco egoista, pero e amor ta mucho fuerte pa laga bay. E ta algo cu mi kier bisanan tur dia, pero mi no por, sea e palabra no ta yega of mi no ta cercanan. Cuanto mi ta antoha pa keda ripiti e palabranan: “Mi ta stima boso”. Pero pa awoki ta letra y rima so mi tin.

Dia ta sigi y mi mester lora cune. Solo ta kima y mi tin hopi di gradici. Caminda mi ta para awe mainta cantidad di mucha chikito ta pasa cantando cla pa bay scol. “Aruba nos baranca, perla den lama, nos ta canta cu orguyo, Arubiano nos tur ta”.

Mi ta casi canta cunan di tanto inspiracion, pero un toque di duele ta wanta e canto cu tanto mi tambe kier canta. Mi ta sinti cu ta e tristesa of demasiado emocion ta strobami. Sentimentonan bruha cu ta pasa den mi mente ta ponemi pensa tin biaha di tin e deseo di ta un mucha atrobe cantando sin tin preocupacion. Pero como un ser madura awe mi ta balansando na e rand di ta perdiendo balor y lubidando kiko ta significa canta un simpel melodia cu orguyo. Pero mi tin di bolbe na realidad paso mi cabey boto a yega y dia ta sigi. Dicho momento aki mi no kier perde, sigur cu si mi tin di skibie pa nunca mas lubide.

Y leu aya mi ta sigi tende e canto di e muchanan …

“Aruba, Aruba, un pida baranca den Caribe. Cu lama rondona, bunita y cla, rico na bida. Orguyoso di ta un Arubiano, nos Escudo y Bandera nos tin pa demostre”. Hm … un simpel cantica y mira cuanto e ta ponemi pensa, e ta algo puro y puramente producto di un simpel mente skibiendo nan sentimiento. Algun palabra y letra aki, dos melodia y canto aya. E sincronisacion por escrito asina perfecto cu maximo alcanse ta toca hopi curason. Mas mi pensa riba dje, mas e ta atreami na dje.

Ay cargami dia largo cu mi ta entregando mi mes na bo. Una bes mas mi lo purba comportami awe manera un cabayero y trata tur mi prohimonan igual. E trato cu mi lo duna awe ta un sonrisa, un cariño y pasa un bon dia y Dios sea cubo. E tiki satisfacion cu mi ta saca for di e trato aki ta puro vitamina pa mi curpa y alma. Anochi mi sosiego lo ta largo y felis.

Y ora nochi yega y mi ta riba mi cama sosegando pa bay drumi, mi ta recorda e dia y resa mi oracion. Mi mente ta pone mi Mama mi dilanti recordandomi pa no lubida di gradici Dios pa tur cos. Y loke semper mi Wela a bisami; “E ta esun cu ta dunabo rosea y E ta esun cu por kite for di bo”. Si bo hasi bo awe perfecto, bo mayan lo ta mescos. Paso e dia di mayan lo sigi mescos cu e dia anterior. E dia di mayan ta recoriente na e dia di awe y ta trece cune bek tur loke nos a soña di dje.

Autor: A. Figaroa ©

Leave a Reply