Perdida di inocencia: mucha chiquito hungando muhe chiquito

Mayornan ta sigi trendnan di moda, no semper pa mala fe, pero paso nan no tin suficiente informacion. Pesey mester bin cu mas educacion pa majornan na Aruba y menos sensacionalismo. Esaki ta tarea tambe di cada organisacion cu ta traha cu mucha.
Abo ta di acuerdo cu no ta bon pa muchanan imita actitud sensual di hende grandi? Y pakico no? Lesa pa bo sa…

mucha chiquito hungando muhe grandi
“E crimen mas grandi cu humanidad a comete contra muchanan ta di alega nan cada dia mas di naturalesa y arte” — Conferencia Mundial di trabao social 1988

Mi a lesa un discushon riba Facebook tocante potretnan demasiado sensual di un mucha muhe chiquito cu ta participa na un eleccion di reina. Mi mes no a mira e potretnan, pero mi por imagina mi mes kico nan kier men. Desde eleccionnan di reina y Barbie y shownan di imitacion di cantantenan sexy, hopi di nos muchanan chiquito ta comberti nan mes den muhenan chiquito durante eleccionnan, show di baile y canto y te hasta hungando cu nan Barbie.

Lastima den mi opinion paso loke hopi hende no ta realisa cu tipo di actividadnan asina ta fomenta reaccion cerca tanto e muchanan cu ta madura mucho lihe, pero tambe cerca hendenan cu mal intencion. Mi a jega para na un actividad unda muchanan chiquito tabata imita Olga Tanon y mira e ‘lust’ den wowo di hombernan grandi. E ser humano tin un parti di su celebro cu ta di reptil (reptielhersenen) y esaki ta esun cu ta activa e parti di su instinctonan, e parti di sobrevivencia, hamber y sexualidad.

Mayornan ta sigi trendnan di moda, no semper pa mala fe, pero paso nan no tin suficiente informacion. Pesey mester bin cu mas educacion pa majornan na Aruba y menos sensacionalismo. Esaki ta tarea tambe di cada organisacion cu ta traha cu mucha.

Un pais y organisacion cu ta respeta e tratado di derechonan di mucha lo mester ta mas critico riba actividadnan asina y pone reglanan cu ta protega e inocencia di e muchanan cu ta participa.

Den su buki ‘Changing’ e actris Sueco Liv Ullman a jama e fenomeno ‘The Lost Kingdom of Children’… E Reinado perdi di muchanan….

Aruba, laga nos muchanan ser mucha y hunga weganan di inocencia… nan tin basta anja pa ta adulto den nan bida…

Cu respet… Ingrid

Leave a Reply

Your email address will not be published. Required fields are marked *