Caminda e Amor pa Aruba ta cuminsa

Muchanan por trese mas integracion y harmonia riba nos Aruba, dushi tera. Unda nos ta respeta e norma- y balornan di Aruba.

Aruba, dushi tera
Aruba, dushi tera

Amor pa Aruba ta cuminsa den nos curason. Nos curason ta desperta ora nos ta sinti nos mes aprecia, dushi, comfortable y re-inforsa. Ora cu a focus riba desaroyo di turismo despues di ciere di LAGO, Aruba a bira e cas di hopi diferente nacionalidad, hendenan cu nan rais den otro pais. Hendenan cu a trese nan yiu biba na Aruba, otro cu nan yiunan a nace na Aruba. Muchanan cu sentimentonan mescos cu e muchanan cu ta bin di raisnan Arubiano. Muchanan cu nan seguridad- y inseguridadnan, alegria y tristesa. Un tempo muchanan di diferente nacionalidadnan tabata bin hunto den actividadnan creativo y educativo cu mi tabata organisa.

E bunita potret aki ta un refleho di diferente generacion cu ta biba na Aruba. E ta tambe refleho di e harmonia y aceptacion cu ta biba bou muchanan. Esey ta e espiritu cu hendenan grandi tambe por cultiva. Ta bon pa for di cas caba stimula muchanan pa hunga cu tur otro mucha, sin importa nan rasa of decendencia. Asina podise e muchanan por trese nan majornan mas hunto.

Mi ta spera cu di e forma aki poco nos trese mas integracion y harmonia riba nos Aruba, dushi tera. Unda nos ta respeta e norma- y balornan di Aruba. Y manera e muchanan inocente aki, sinta na un mesa, papiando e idioma cu ta uni nos, esta Papiamento. Trahando un bunita bandera di Aruba, un otro simbolo cu ta balioso pa stimula amor pa un pais, nan ta trese pas.

Ingrid Werleman

E morto di un hoben studiante y violencia cu ta jama mas violencia.

Mi no kier perde speransa den mi Aruba, dushi Tera, e isla cu a mira mi nace. E isla cu a inspirami pa pensa cu un dia nos por TA e ehempel di ‘un isla felis’.

media internacional

Un hoben Canades, studiante di medicina na Aruba ta sali pa gosa y ta haja su morto a base di un discushon y golpi dor di e security di un nightclub. Na Aruba, mi dushi Tera. Un ehempel mas di violencia cu ta birando normal riba nos isla chikito? Kico nos lo conclui si nos analisa e bida nocturno riba nos isla? Nos ta tende e mesun tipo di reaccionnan ora algo similar pasa. ‘Hopi erg’. ‘Esaki no por’. ‘Castigo pisa mester cay’. Tur esaki, sin investiga si na nos isla chikito podise tin demasiado libertinaje den bida nocturno. Nos kier imita paisnan grandi sin mira si nos tin e infrastructura, mentalidad, regulacion, disciplina y etica di trabou necesario. Poder ta un cos peligroso ora e no ta sostene pa norma, balornan y reglanan cu ta pone tambe limitacionnan con leu un hende por jega cu su autoridad. Cu e cosnan aki ta pasa den paisnan grandi tambe? Sigur! E ora nos por puntra nos mes ‘unda nos kier bay cu nos progreso na Aruba?’. Puntra nos mes ‘kico nos ta considera normal’, ‘ki actitudnan nos ta dispuesto pa acepta y kico no’.  ‘Con hopi nos kier inverti den training di comunicacion y enteraccion humano (people skills) di e hendenan cu nos ta tuma na trabou.

E nivel di servicio na Aruba no semper ta cuadra cu e imagen cu nos tin den exterior. E amabilidad y cariñosidad di e hendenan cu ta brinda servicio hopi biaha no ta esun cu a hasi Aruba famoso. Cheap labor, falta di training y crisis mundial sigur ta hunga un rol. Tur esaki lo keda mescos si nos no cuminsa pensa na un nivel mas cosmopolitano, pero manteniendo e karakter local.  Un nivel cu por a evita e caso lamentable aki. Podise ta bon pa nos pensa cu excesonan di violencia lo por stop ora hendenan ta haja mas satisfaccion den nan trabou.

Ta mas sabi pa nos stimula un actitud cu nos t’ey pa sirbi otro, pa ta cordial cu otro. Ta sabi tambe pa sa mas di e poder di pensamento,  cu ta sinja nos cu cos bon lo atrae mas cos bon.  Nos lo no stop violencia cu un actitud di mas rigides. E hendenan cu tin poder, con chikito cu e por ta, lo tuma poder den nan man ora nan ta haja esaki necesario. Esaki ta e ley di selva, e instinto humano ora un sociedad no a sinja su hendenan pa biba segun balornan humano eleva. ‘No reaciona, pero entermedia pa situacionnan no escala’.  Imagina bo un sociedad unda ta incentiva y duna ehempelnan noble.  Unda ta educa y guia e hende pa e bira na prome lugar un bon ser humano. ‘Trata cada hende, manera abo kier ser trata’. ‘Imagina bo cu e tabata bo yiu, con bo lo a sinti?’. Esaki ta empatia of afinidad cu bo prohimo. Mi no kier perde speransa den mi Aruba, dushi Tera, e isla cu a mira mi nace. E isla cu a inspirami pa pensa cu un dia nos por TA e ehempel di ‘un isla felis’.

Ingrid Werleman, www.comprondiendobida.com