E wanta den parlamento di Corsow y un mundo wardando riba liderasgo

Parlamento no ta un ring di boxeo, e ta un lugar sagrado unda curason di pueblo mester biba y bati como inspiracion…


Mi a lanta 3.03 di madruga cu hopi pensamento y sentimento cu a kibra mi sonjo. Continuamente mi ta wak e wanta cu un parlamentaria a dal su colega parlamentaria na Corsow. Sangra su cara y cana bay manera nada a pasa. Den e silencio di madruga mi ta puntra mi mes den ki mundo nos ta bibando… E organo di mas halto di nos isla ruman, e organo cu tin como tarea pa controla gobierno. E organo cu tin como tarea pa bin cu leynan cu ta defende interesnan di e pueblo cu a vota pa nan. Un grupo di hende cu lo mester tin etica, inspiracion y duna bon ehempel.

Nos islanan chikito tin demasiado retonan pa atende, specialmente ora ta toca e ser humano mas marginal y vulnerabel. Esunnan jama pa trese solucion mester wak con hunto por sali afo, kedando hopi cerca di e hendenan. Pero cerca di berdad, no solamente pa e potret den media. Cerca pa scucha e bos di pueblo, su deseonan, su sonjonan cu no ta haja contesta, ni realisacion. A bira tempo pa bin cu solucionnan cu ta eleva e calidad di bida di cada ciudadano. Bin cu educacion y informacion pa hasi nos cada un mas inteligente, mas independiente di politica.

Cada hende ta un mundo y tin nan propio agenda pa hasi loke nan ta hasi. Pero, si nos wak rond den mundo, mi ta haja e impreshon cu nos ta hopi confundi. Na lugar di busca mas cercania y union pa traha hunto na e situacionnan dificil cu nos ta mira tur rond mundo, hendenan cu poder di autoridad parse di ta busca solucionnan den division y violencia.

E ora, por ta cu e hendenan cu tin un otro vision di bida tin e tarea pa bin dilanti? Un vision dirigi riba crea lasonan di union pa hunto sobrebibi tormentanan cu por asota nos islanan chikito…?!

Parlamento no ta un ring di boxeo, e ta un lugar sagrado unda curason di pueblo mester biba y bati como inspiracion…

Ingrid Werleman

Leave a Reply