Amor despues di amor…

vredes labyrint

Mi a tende e hopi expreshon henter mi bida,
‘Busca Dios…’ un amigo a bisa mi,
‘Uhhh’, mi a contest’e,
‘Dios semper tabata den mi bida,
Di chiquito, ora niun hende tabat’ey pa scucha…,
Dios semper tabat’ey,
Podise e no tabata contesta mi,
Pero den silencio semper e la scucha mi’,
Mi no sa si mi amigo a compronde,
Pero no ta nada.
‘Dios ta amor’, tambe mi a tende hopi bes,
Si, ta hopi berdad…
Mes berdad cu ‘Amor ta Dios’,
Y mi a busca e fuente unda e esencia di Amor ta biba,
Y mi a encontra tur e cualidadnan di Amor ta warda mi brasa habri,
Mi a topa cu Pasenshi, Benevolencia, Humilad, Caridad, Pordon y Comprenshon,
Mi a topa Dolor hasiendo dolor, no comprendiendo su mes pakico ni dicon,
Mi a topa Bondad, disfrasa di Maldad cu no por a mata e lus den su anochi di mas scur,
Y mi sa cu mi a compronde bida atrobe un tiki mas miho,
Y mi a pordona esunnan cu mas dolor a hasi mi,
Dor di no a compronde mi, dor di a herida mi,
Y mi a bendishona nan, sin husga,
Si mi no sa e hustificacion di nan accion …
Ni tampoco e rais di nan dolor…
Y mi a pordona e mucha herida den mi,
Purbando pa scapa tur e muchanan herida den mundo,
Sin traha na su propio dolor y mancaron,
Y mi a bras’e y mi a liber’e di su prison cu sin sa, e la crea pa su mes,
Amor a topa Dolor,
Bendicion a banja nan…
Humildad a cubri nan sunu,
Na shelo a aparece millon di solo den anochi scur…
Pa laga resalta nan Splendor…
Dios di berdad ta Amor…
Y Amor di berdad ta Dios…
Pa esnan cu kier compronde…
E Esencia di Esencianan…

Ingrid Werleman, inspira pa mi Amor pa Bida…
Januari 18, 2012

Leave a Reply

Your email address will not be published. Required fields are marked *