E significacion di e pintura di bo yiu

Mucha cu pinturaE significacion di e pintura di bo yiu…

Un storia saca for di bida real…

‘Yen di orguyo e criatura ta bin serca su mayornan, cu ta druk y ocupa cu su cosnan di tur dia. ‘Mami, papi, mira un cos bunita cu mi a pinta pa bo…” Den su drukte e mayornan ta tira un bista riba e bladchi, pero no ta mira di berdad… “Hopi bunita, mas oro mi ta mir’e un poco miho. Mi ta hopi ocupa awor…”  Yen di tristesa e mucha ta bira cana bay… Aunke e mayornan den nan drukte di bida no a ripara…e mucha a sinti e falta di atencion… un falta di atencion cu te hasta den su pintura, tabata hinca…

Un pintura di un mucha ta mas cu un combinacion di colornan. Pa un persona cu ta entrena pa analisa un pintura e ta un refleho di e forma con e mucha ta experencia e mundo cu e ta biba aden.

Bo por saca afo con e mucha ta na e momento ey…su emocionnan, su stress y guia e mucha y mayornan cu tips den e educacion di nan yiu.

Continue reading “E significacion di e pintura di bo yiu”

Abuso sexual di mucha y bidanan destrui

TekeningTa hopi tristo pa lesa frecuentemente, podise demasiado frecuente cu abuso sexual ta topico di casonan dilanti hues. Casonan unda padrasto, omo, tata, ruman, coach cu ta abusa di menornan di edad. Hendenan sin escrupulo, moral y decencia cu no ta realisa con nan por kibra bida y destrosa almanan di un otro ser humano. Abuso emocional y sexual no ta di awe, ni di Aruba so, tampoco e ta mara na status social, rasa, religion, entrada, ni educacion. Lastimamente e ta parse di ta un di e cosnan inperdonabel cu hendenan ta sigi comete, bou di e excusa di ‘mi tabata burachi’, ‘e mucha mes a busca’, ‘e muchanan awendia ta madura asina tempran’, ‘mira con mucha chiquitonan awendia ta bisti. Ta fout di e mama si algo asina pas’e.’ Tur ta excusanan cu e abusador ta inventa pa laba su consenshi di algo cu nunca por ser papia bon. Den caso di abuso di mucha tin hopi gradacion, hopi forma, hopi color, pero semper mesun dolor y berguensa pa e mucha y e hendenan rond di dje cu di berdad ta stim’e. Podise pesey abuso di mucha ta un di e taboenan mas grandi den comunidadnan rond mundo, tambe na Aruba. Casi sigur e taboe y e berguensa aki ta entre e motibonan principal pakico specialmente abuso di mucha ta sigi existi. Simplemente pasobra ta tene tur cos scondi pa asina ‘otro’ hende no haja sa. Lastima, pasobra finalmente e no ta juda ningun hende, ni e abusador, ni e victima. Lastima cu tin hendenan adulto cu no ta realisa cu un mucha chiquito ta puro inocencia cu Dios y bida a duna na hendenan adulto pa cuida y guia y hiba nan na un bida sano y felis.

Continue reading “Abuso sexual di mucha y bidanan destrui”

Mi ta muhe, mi tin cancer y mi ta bunita…

fotoMary Jo Foundation ta conoci pa su trabou di sosten pa hendenan muhe cu cancer. Y Merveline Geerman ta conoci pa su trabou den estetica, Viva La Donna Day y su bon gusto. Den e trajectoria aki Merveline a topa cu e hendenan dinamico di Mary Jo Foundation y nan a dicidi  di hasi un presentacion con pa mara lenso durante un charla organisa pa e fundacion.

E modelonan tabata Carina, Ingrid y Gloria. Nan tur 3 ta damanan cu ta hajando tratamento pa cancer. Nan ta damanan tambe cu ta hopi conciente cu despues di cancer, tin bida y cu ora bo ta percura pa bo mes, bo ta sinti bo mes mas bon. Tur esaki ta juda pa gosa di un miho calidad di bida y condicion di salud.  Hunto cu nan tabata Genevie, jiu muhe di Merveline cu kier a mustra su solidaridad cu muchanan jong cu tambe por haja cancer y den e tratamento pa e malesa, tambe lo por perde nan cabey.

Pa e projecto aki Merveline a busca lenso y sjaal di Hulanda, pa asina por ofrece lo ultimo den moda Europeo. E damanan presente a keda hopi encanta cu e presentacion  aki. E modelonan ta haja cu bo no mester sconde bo curpa y tin berguensa pasobra bo tin cancer.  Bida ta sigi semper, tambe pa hendenan cu cancer. Nos tur tin reto y nos tur tin bida. Nan tin cancer, pero nan no ‘ta’ nan malesa. Nan ta muhenan jen di bida y esey e potretnan ta mustra.

Continue reading “Mi ta muhe, mi tin cancer y mi ta bunita…”