Valentine Day, Amor, Amistad y Balor di Bida

mensahe silencioso di naturalesa?
mensahe silencioso di naturalesa?

Tin un cantica ta tocando na radio ‘It’s so easy to fall in love’. Berdad, cay namora ta facil, keda den amor ta poco of hopi mas dificil.

Amor pasahero bo por haj’e den cada skina di bida. Of algo cu tin aroma di amor.
Amor berdadero ta loke ta nace di paden.

Ki bunita ta ora nos por sinja nos muchanan mira amor den cada skina di bida. Bolter cada piedra y wak bida ta biba bou nan. Wak e curason cu bo por haja te hasta den e piedra mes, den e berdura, den e noot, den e batata. Mensahenan silencioso cu ta pidi nos pa nos atencion? Pa ta mas cuidadoso cu e forma cu nos ta biba. Pa ta mas conciente kico nos ta tira den naturalesa. Pa ta mas conciente di e palabranan cu nos ta saca di nos boca, di nos mente.

Di parti di Comprondiendo Bida nos lo desea pa Dia di San Valentino bira un dia di refleho cu duna amor ta algo cu nos por hasi tur dia.
Lag’e cuminsa cu e sonrisa y ‘bon dia’ cu bo ta regala na tur hende.

Felis dia di amor, tur dia di bo bida!!!

Sosega na pas, sr. Mitch Henriquez

Nos no por cambia otro hende
Pero nos por ta un ehempel y inspiracion pa nan si.
Y poco poco sin cu nos mes ta ripara
E mundo ta cambiando

Sr. Mitch Henriquez su cara simpatico
Sr. Mitch Henriquez , sosega na pas

Cu e angelnan di nos bon Dios carga Mitch Henriquez riba nan halanan y companje riba su biahe den Reino Celestial.

Cu husticia prevalece.

Y cu Mitch su nomber keda recorda nos cu cada accion di amor cu nos hasi cada dia
ta planta un simia chikito den mundo
pa logra un mundo cu mas pas y harmonia, comprenshon y tolerancia.
Nos no por cambia otro hende
Pero nos por ta un ehempel y inspiracion pa nan si.
Y poco poco sin cu nos mes ta ripara
E mundo ta cambiando

Respetuosamente,

Ingrid Werleman, comprondiendobida.com

Podise tin un les den e Ayo na Rio Grande

Nos herencia cultural ta hasi nos conciente di nos cultura y nos historia. Pesey ta importante pa nos cuida y preserva nan.

Recuerdo di un cas
Recuerdo di un cas

~ Rio Grande, den ora di dolor nos ta realisa hopi cosnan di balor.

Bibando den un comunidad den movecion continuo, nos tin di acepta cu e unico cos sigur den bida ta cambio. Completamente berdad! Pero, nos por acepta tambe cu nos historia a hasi nos loke nos ta awe. Tin cosnan cu ta caracterisa un pueblo. Cosnan cu ta hasi un pueblo sinti orgujoso di nan mes y nan ancestronan.

Awo nos sa cu un di e cosnan aki ta e edificio di Rio Grande na Noord. Ora a haja sa cu a basha e edificio di Rio Grande abou sentimentonan emocional a domina riba nos isla. Sentimentonan di rabia, tristesa,cuestionamente, di no por kere.

Nos a haja sa tambe cu eigenlijk no tin un ley cu por evita cu edificionan historico por bay perdi na un forma cruel asina. E boet di 1000 florin cu ta duna pa destrui edificionan historico lo no stroba niun inversionista cu hopi placa pa no basha un edificio abou.

Rio Grande tin mas di 120 anja
Rio Grande tin mas di 120 anja

Tin reglanan estricto pa protega naturalesa den Parke Arikok. Dicon no tin reglanan mes estricto pa protega nos herencia cultural? Pa paisnan riba e lista di herencia cultural mundial esaki ta un honor y un punto strategico den mercadeo di nan pais como destinacion turistico. Herencia cultural ta e palabra cu ta describi e monumentonan historico, objetonan arceologico, archivonan y documentonan di un pais y su ciudad y paisahenan. Den hopi pais esaki ta regla pa ley y supervisa pa profesionalnan den e materia. Nos herencia cultural ta hasi nos conciente di nos cultura y nos historia. Pesey ta importante pa nos cuida y preserva nan.

Si ta berdad cu gobierno, e instancianan concerni y e donjo nobo tabatin asina hopi aprecio y balor pa e edificio di Rio Grande, anto nos por puntra nos mes si no tabatin un otro manera pa a jega na un solucion unda tur partido involvi por a haja nan mes?
Por a comunica miho?
Instancianan concerni por a duna mas prioridad na e caso aki?
Bibando den un comunidad unda mas y mas nos ta perdiendo nos identidad como Aruba y Arubiano, lo jega un dia unda di berdad nos ta bisa “A jega ora pa proteha loke ta di nos y di nos ancestronan?”

Un 'Ayo' na Rio Grande
Un ‘Ayo’ na Rio Grande

Nos lo no haja Rio Grande nunca mas bek manera e tabata cu su material di construccion, su historia, su energia, recuerdo y memorianan. Pero podise, djis podise nos por sinja un les di e sabor amargo aki?

E buskeda pa un mundo inocente cu casi ya no ta existi.

e mucha cu ta e guardian di nos consenshi

Barbie, simbolo di inocencia cu a cambia
Barbie, simbolo di inocencia cu a cambia?

‘Nos no a hereda e Mundo aki di nos ancestronan. Nos a fi’e di nos Jiunan.’  ~ Proverbio Indjan

Nos por mira nan wowonan chikito spanta ora nos mira noticia di guera, na television y den corant. Y wak bon, hopi biaha un mucha lo busca su peluche pa bay cu n’e. Ora e ta bay drumi, sali, biaha y si, te hasta ora e ta huy di guera of di violencia. ‘Stranjo, no?’, un adulto lo pensa. No, pasobra te hasta den un mundo marca pa violencia, muchanan semper lo sigi hunga tur caminda.

Den e drama di e avion di Malaysia Airlines e potretnan cu mas a toca e curason di hende ta esunnan di e buki di un mucha cu tabata abordo, e peluchonan y pa no lubida e potret di e soldad cu e macaco.

No ta stranjo, pasobra maske nos no ta realisa, majoria sentimento di dolor y alegria den nos bida tin nan rais den nos anjanan di mucha chikito. E potret di e mucha y su pelucho un caminda den nos memoria ta hiba nos bek na e mucha den nos mes y un mundo inocente cu casi ya no ta existi.

Y esaki podise a bira pio cu e popularidad di e social media y e libertad di expreshon cu facilmente por transforma den libertinaje di expreshonnan emocional.  Ora mi  wak riba Facebook, mi ta haja e impreshon cu tin hopi hende a bira experto den tur materia. Ta parse cu hende ta competi pa ken tin rason of E berdad, lubidando cu E Berdad ta haja un cara diferente den cada opinion personal. Ora mi sinti  cu hende ta competi pa ken ta haja mas atencion, esaki  ta pone mi  bira keto di paden, pasobra mi no kier ta den e ratrace ey. Mi ta sinti cu cambio den e forma cu nos ta wak bida lo bin solamente ora nos por jega na e puresa den nos curason. Anto aki e criaturanan chikito den mundo y cu nos tambe un dia tabata, ta hunga un rol atrobe.  Solamente mirando bida for di e wowonan di un mucha, nos por bay bek na e estado di conciencia cu ta puro y no por ser cumpra ni corumpi. Y te na e momento aki, nos ta cla y prepara pa hasi nos trabou como adulto.

Mi stima bida y mi lo kier laga un mundo pa mi yiunan y mi nietonan atras cu ta miho cu loke mi a haja. Y mi sa cu den curason di cada ser humano tin e deseo di ta felis y hasi otro felis. Lastima cu materialismo y hamber pa poder  a cambia hopi  hende nan prioridadnan.

Ami semper  lo kier mantene mi vishon di nos mundo como un Shangri La of Utopia, pasobra por. E ta rekeri conciencia y e lidernan adecuado cu no tin prijs riba nan cabes. Pa mi e ta bay pa hende por biba den respet pa otro y pa tin lugar pa cada hende. Y e simbolo ta e mucha cu ta e guardian di nos consenshi.

Ingrid Werleman, juli 2014

 

Cosnan leuk pa traha cu bo yiu pa ‘Dia di Mama Tera’.

No pensa si mi ta tira e cup di plastic ey den lama no ta hasi nada, ta un so e ta. Imagina bo cuanto hende ta pensa mescos cu bo!

e futuro den bo man
e futuro den bo man

E futuro den bo man!

Tur dia mester ta ‘Dia di Mama Tera’, pasobra ta un planeta so nos tin te awo. Ora mi dal un niester duro na Aruba e por afecta e halanan di barbuleta cu ta saliendo di su cocoon? Ken sa con entreconecta bo ta cu net e barbuleta ey!

Importante den e reto pa laga un mundo atras unda nos yiunan y nan yiunan por tin un bon calidad di bida ta den nos man. Loke bo ta hasi of laga di hasi ta afecta bida den tur forma, grandi of chikito. No pensa si mi ta tira e cup di plastic ey den lama no ta hasi nada, ta un so e ta. Imagina bo cuanto hende ta pensa mescos cu bo!

Awe 2 link riba e website fabuloso cu asina tanto projecto creativo, www.pinterest.com

Gosa trahando den tera awe cu bo yiunan, susha bo man y sinti e tera, lab’e bek y traha cos leuk cu bo famia. Felis dia di…TERA!

http://www.pinterest.com/search/pins/?q=earth%20day%20art

http://www.tipjunkie.com/post/activities-for-earth-day/

Escogencianan den bida…

scoge no semper ta facil
cua direccion mi kier bay di berdad?

Tur momento den bida ta un momento di escogencia. Mi ta corda cu na un momento cu mi mester a tuma un decision  determinante, un amigo a bisa mi algo cu semper a keda graba den mi mente.

Esta: ‘Corda cu tur loke un otro hende hasi bo, ta abo mes ta permiti pa sosode’. Pasobra como un ser humano bo tin e libertad pa scoge con pa reaciona riba cualkier asunto. Si un hende bisa bo un palabra pisa bo por scoge pa rabia of pa keda den bo propio balor sin sinti ningun ofensa. Y aki a cuminsa un proceso largo pa los mi mes di situacionnan indesea den mi bida.

Esaki ta momentonan cu nos tur ta haja nos mes aden den bida. Y nos tin cu scoge. Hopi biaha nos ta scoge sin pensa profundo riba e cosnan di balor di berdad. Kico e consecuencia di loke mi ta scoge ta pa mi mes, pa mi famia y mi pais? Kico e consecuancia lo ta aki 5, 10 of 20 anja? Bay paden un rato y reflecciona riba kico ta bo norma y balornan. Y laga esakinan ta e guia den loke bo ta scoge cada momento.

Bo por cambia bo mes dor di ta mas critico y observativo cu bo mes. Tambe pa decisionnan cu ta regarda bo famia y henter un comunidad. Gran parti di Mundo ta den un crisis di norma y balornan.  Tin ora mi ta puntra mi mes si nos tin un les di sinja di e situacion aki.

Nos cada un por cuminsa hasi e diferencia….AWOR… ora nos scoge pa cosnan cu ta cuadra cu nos norma y balornan di mas halto den bida…

Bo a pensa di berdad, berdad kico eseynan ta?!….

 

Pentecoste, dia di pone palabra den accion

Djis pa awe, hasi un accion di amor y caridad. Pa un hende, pa naturalesa, pa e mundo, pa Dios…

 

Pone accion den bo palabra awe...
Pone accion den bo palabra awe…

Awe ta dia di Pentecoste pa Cristiannan. E dia cu ta recorda cu un dia hopi anja pasa Spiritu Santo a baha cerca mama Maria y e apostelnan. Esaki tabata e  promesa cu Hesus a hasi na nan cu e lo no laga nan nan so despues cu e bolbe cerca su tata den shelo. E rol di Spiritu Santo ta uno pa inspira y juda hende duna contenido na e palabra di Dios cu nan ta kere aden. Ami a interpreta esaki como: ‘Awe ta dia di pone palabra den accion’.

Hopi biaha hende ta resa pa judansa, lubidando asina nan propio forsa y boluntad propio cu Dios a duna nan pa ‘hasi nan mes’. Ta berdad cu hasi no ta facil. Nos ta asina programa dor di e mundo cu ta rondona nos. Tin hende tin miedo di loke otro hende ta pensa di nan. Otronan ta asina complacente den nan personalidad cu nan ta biba pa  complace otro y no nan mes.

Di otro banda tin hopi forsa, sabiduria y crecemento den tuma bo propio decishon. Den sali pa loke bo ta kere aden. Esaki ta un caminda cu ta exigi refleccion y refocus continuo. No e caminda di mas facil. Mi no tin e contesta pa mi mes tampoco si e ta esun mas satisfactorio pa nos crecemento interno.

Awe ta un dia cu mi ta pensa hopi riba kico mi kier. Mi ta scroll riba mi pagina di Facebook y mi ta puntra mi mes si esey ta e caminda unda mi kier ta.

Mi silencio ta guia mi na un caminda. Mi no sa unda. Mi ta bisa  Spiritu Santo danki pa su inspiracion pa mi jega na e lugar cu ta hasi mi curpa, alma y espiritu felis.

Djis pa awe, hasi un accion di amor y caridad. Pa un hende, pa naturalesa, pa e mundo, pa Dios…

Felis Dia di Spiritu Santo pa bo!

 

 

Aruba, no lag’e jega nunca asina leu y asesinato di sr. Wiels

Hopi trustu, kruel, lamentabel i bergonsoso e horibel asesinato di Sr. Helmin Wiels. Ta duna miedu, miedu di nos mes hendenan. Nos komunidat ta manera kos ku a bira siegu. Siegu i ignorante. Siegu pa òrden, siegu pa komprenshon i siegu pa positivismo. Hasta siegu pa e amor ku nos tin ku praktiká pa traha riba e futuro pa nos yunan, pa nos mes, i pa nos pais.

sr. Hermin Wiels... sosega na pas
sr. Hermin Wiels… sosega na pas

Ta asesina sr. Helmin Wiels cruelmente mientras e ta bay cumpra un soppi. Hopi hende ta den shock. Cosnan cu nos no ta spera mas den nos mundo civilisa. Y toch, nos mundo ta jen di violencia. Nos mundo ta jen di bondad tambe. Unda pa busca e solucion?

Un comentario di un amigoe aprecia di Corsow: Robert Coffie

Hopi trustu, kruel, lamentabel i bergonsoso e horibel asesinato di Sr. Helmin Wiels. Ta duna miedu, miedu di nos mes hendenan.

Nos komunidat ta manera kos ku a bira siegu. Siegu i ignorante. Siegu pa òrden, siegu pa komprenshon i siegu pa positivismo. Hasta siegu pa e amor ku nos tin ku praktiká pa traha riba e futuro pa nos yunan, pa nos mes, i pa nos pais.

E loke ku nos ta eksperensiando ta un futuro sin amor. Un futuro ku lo yega i desaroyá ku odio-propio.(en bes di amor-propio i amor pa nos pais)

Un emoshon di odio asina lo kaba ku bo, kimabo manera un pida karbon kayente. Ademas e emoshon aki lo lo no destruí bo so, e lo destruí bo komunidat kompleto.

Odio ta kousando hopi problema den mundu, i riba nos pida baranka Korsou tambe, pero te ainda mi no a ripará ku odio a resolvé niun di nos problemanan na drechi.

Tin biaha nos ta kere ku odio ta e arma pa ataká otronan. Pero odio ta un kuchú di dos banda, i e malu ku nos hasi na otro, nos ta hasi’e na nos mes , i sin duda na nos komunidat.
A yega ora pa nos para ketu i reflekshoná riba kon nos tin ku bai traha riba nos komunidat.

Mi komunidat ta mi famiya, e komunidat di e maestro(a)nan òf esnan den enseñansa ta nan alumnonan, e komunidat di esnan enkargá den deporte ta nan atletanan, komo doño òf lider di un empresa bo komunidat ta bo empleadonan. Siña nan i dunanan e ehèmpel kon pa ta un dushi hende, siña nan balor i normanan. I abo komo lider siña bo mes e kosnan aki promé.

Ban kuminsa awor i no laga pa aki un par di aña nos tin ku bisa KU NOS TABATA dushi hende.
Mi ta spera ku e siman aki nos por reflekshoná riba bondat i AMOR i ku lo reina pas duradero na Korsou.

robert coffie - trainer
robert coffie – trainer

Danki Robert pa permiti nos usa bo refleccion. Ohala cu hopi hende les’e y comparti’e bou nan amigonan. Y mas cu tur cos bib’e y bir’e! ~ Comprondiendo Bida

Con abo lo sinti si tabata bo yiu

Na Aruba: Hues ta pidi 2 aña di prison pa homber cu a abusa di su propio yiu muher menor di edad. Imagina bo cu ta bo yiu. Con bo lo a sinti?

Con abo lo sinti si tabata bo yiu
Con abo lo sinti si tabata bo yiu?

Na Aruba:

Hues ta pidi 2 aña di prison pa homber cu a abusa di su propio yiu muher menor di edad. Imagina bo cu ta bo yiu? Con bo lo a sinti?

Imagina bo kico a pasa den e mente di e mama. Ora hues a dicta sentencia, despues cu hues tabatin ful un declaracion di e mucha cu pruebanan medico.

Cosnan cu ta pone stoma di un hende bolter; cosnan cu lo sali solamente di un mente hopi perverso.

Hues a bisa e tata cu e ta kere e declaracion di e mucha y toch ta pidi solamente 2 anja di castigo.

Kico ta pasa den e mente di un tata cu no ta respeta ni su propio yiu? Di con niun protesta di instancianan cu tin mucha como grupo meta?

Si nos no ta defende e derecho di nos muchanan, ta ken su derecho nos ta defende anto?

Para keto un rato y pensa: ‘Con ami lo sinti si tabata mi yiu?’

despues di doofpot religioso awor tin un doofpot medico

Si tabata yiu di e dokter of e hues, e diagnostico lo tabata mescos? Mi ta puntra mi mes si e diagnostico aki por ta basa riba informacion cientifico y ken por duna informacion di esaki. Lesa pa bo mes y husga si esaki ta husto.

abuso sexual
Pèrdida di señorita no ta nifiká ku tabatin relashon seksual

Pèrdida di señorita no ta nifiká ku tabatin relashon seksual

Fuente: noticia 360

WILLEMSTAD.- E defensa di pareha Oomen, den e kaso aki abogadonan mr. Bokkes i mr. Blonk, a basa su mes pa gran parti riba rapòrtnan di dòkter i konklushonnan ku por a saka a base dje rapòrtnan aki. Den e kaso aki por ehèmpel, e víktima prinsipal R. a ser kontrolá dor di un ginekólogo i esaki a konstatá ku R. su vagina ta den tal estado ku por konkluí ku e tabatin un penetrashon (6 uur) ku no ta algu resien. Banda dje echo ku esaki ta laga espasio pa penetrashon, tambe t’asina ku e echo ku e no ta señorita mas no tur biaha mester nifiká ku tabatin penetrashon. E lo por a surgi di un òf otro forma, p.e. dor di kore kabai, sierto movementunan den gimnasia.

Segun mr. Blonk, datonan médiko hopi biaha inhustamente ta ser mirá komo señalnan di abusu seksual. Un persona/mucha por tin skeer chikí rondó di su anus, klèpnan vaginal ku ya ta tira afó, òf matris ku tin skeer chikí. Ningun di e señalnan aki nesesariamente ta síntomanan di abusu seksual. No opstante esaki nan sa okashoná pániko, sigur si un profeshonal ku no ta spesialisá den leshon ta konfirmá e sospecho di abusu, manera den e kaso aki. Ta p’esei ta masha importante pa e diagnóstiko ser verifiká. Ta p’esei ta bon pa e síntomanan ser deskribí kuidadosamente i preferiblemente nan ser fotografiá. Tambe ta nesesario pa dòkternan argumentá nan diagnóstiko. I den esaki segun mr. Blonk, Ministerio Públiko a faya. Por sierto, dr. Moses no a laga espasio pa a duna un ‘second opinion’ dor di otro profeshonalnan.

Echo ta ku e hobensita no ta señorita mas, pero no por bisa ku ta Marco Oomen tabata e kulpabel. Tabatin e sospecho fuerte kaba ku R. tabata seksualmente aktivo, i esei mes tabata e motibu dikon famia Oomen a disidí di dun’é un ‘prikpil’ riba rekomendashon di nan dòkter di kas. Di kontestanan ku R. a duna na polis por konkluí ku e tabata seksualmetne aktivo na Surnam.

Es mas, segun abogado Blonk na òktober 2012 dr. J. Capello, kende ta un eksperto riba tereno aki, a ser skuchá na hues komisario. Den e kaso aki dr. Capello a duna di konosé ku no por konkluí sin mas ku si un mucha a pèrdè su señorita, ku den su kaso lo tabatin penetrashon. Den su splikashon el a mustra ku den ginekologia tin un termino ku yama ‘paalverwonding’, ku por surgi komo konsekuensha di un trouma dor di esfuersonan físiko serka un mucha muhé. Den e kaso por pensa riba entre otro korementu di kabai, turnen òf práktika di kualke otro deporte. Uso di tampon tambe por kousa un trouma asina.

Segun e abogado, den kaso di otro víktima S., anteriormente su mayornan no tabata kere loke e ta bisa, pero diripiente nan a kere su historia despues di dos aña ku nan a bin sa di deklarashon di e otro muchanan. S. a yega di bisa su mama ku Marco lo a abusá di dje, pero e mama nunka a entregá keho, presisamente pa motibu ku S. ta gaña hopi. Si pone deklarashonnan di e diferente testigunan banda di otro, por mira ku tin kontradikshonnan grandi.

E abogado a konkluí ku, teniendo kuenta ku konklushon di ekspertonan den kasonan aki, i teniendo kuenta e kontradikshonnan ku tin den deklarashon di testigunan, e ta kere ku su kliente, Marco Oomen mester ser deklará liber di tur persekushon penal

Fuente: noticia 360