Nos famia ta e cuna pa sinja etica…

Kico muchanan ta sinti falta di dje den nan educacion y bida na cas, na scol, den nan iglesia of den nan bario? Amor, disciplina, norma, balor, instruccion, etica?
Nos famia ta e cuna pa sinja etica, segun un presentador na radio…
Si, berdad, e tin rason, etica, amor, disciplina… formacion…informacion…

mucha y etica ‘Un ser inteligente ta e principio di tur cos’ – Jean Jacques Rousseau

Mi tabata scuchando un programa riba famia y etica. Hopi interesante pa scucha cu como nacion nos tin cu tuma ensenjansanan riba etica y moral na serio. E presentador ta puntra: ‘E problemanan social y personal por tin di hasi cu ja nos no ta paga asina hopi atencion mas na balornan manera respet, integridad, responsabilidad? Kico ta bon y kico ta malo? Nos ta duna contenido na e palabranan aki ora nos ta splica nos yiunan na palabra chikito kico nan ta nifica. Tambe ta bon pa duna nan ehempel di bida diario, p.e. pa no mishi cu cosnan cu no ta di bo, maske con chiquito e por ta manera un pen di propaganda (no horta). Ta importante pa sinja nos yiunan kico ta nos bon custumbernan, p.e. cuminda hende ora bo topa nan riba caminda (bisa ‘bon dia, senjora’ of ‘meneer’).’
Continue reading “Nos famia ta e cuna pa sinja etica…”

Mensaje di naturalesa

Nos por sinja algo positivo di cosnan cu parse malo? Laga nos cada un pensa un rato mas y pensa con nos por re-conecta cu e cosnan cu tin balor real den bida… re-conecta cu otro, pensando bon di otro y pa otro, no kap mata si no tin mester, conta bo yiunan y nietonan di e bondad di Dios, bisa otro ‘bon dia’…

misa, scol y naturalesa cu danjo di hoosNo lubida cu Tera ta encanta sinti bo pia na Suela y e Biento gusta hunga cu bo cabey. ~ Kahlil Gibran ~

Kico naturalesa ta parse di kier sinja na asina hopi lugar di mundo? Y podise, nos na Aruba tambe tin algo di sinja di un misa, scolnan y matanan di naturalesa cu a ricibi danjo di e hoos recientemente? Bida di hende a keda gespaar, mescos cu e muchanan durante ora di scol. Stranjo no, si bo pens’e bon. Misa, scol, mata cu danjo. Nan ta pidiendo nos un poco mas atencion? Nos Aruba ta paga suficiente tino na nos coneccion cu naturalesa? Na nos bida emocional y spiritual? Si bo lesa e quote bunita di Kahlil Gibran, kico e ta pone bo sinti?
Continue reading “Mensaje di naturalesa”

Comprondiendo Bida su prome workshop di reciclahe tabata creativo.

Bo kier pasa un dushi rato? E workshopnan creativo ta sigi diabierna atardi y diasabra merdia na Certified, den e gang pariba di Huchada.

workshop creativoUn dushi rato tabata loke e participantenan a pasa durante e workshop di reciclahe di Comprondiendo Bida. Den un ambiente relaha nan a traha cadena, renchi orea, armband y decora bela.

Hopi hende den comunidad a lo largo di tempo a sinja conoce Comprondiendo Bida como un projecto cu ta contribui na un miho bida y comunidad. Pesey e tipo di actividad asina ta juda nos haja mas trankilidad, creatividad y alegria den nos bida. Tur esaki ta elementonan cu e participante a encontra den e workshop. Banda di esaki sigur e lo contribui tambe na ‘reduci’ gastonan ora bo mes por traha bo asesorio of traha bo mes regalo ora di un fiesta. E workshopnan ta sigi diabierna atardi y diasabra merdia na Certified, den e gang pariba di Huchada.

Pa mas informacion por jama Ingrid Werleman, tel. 741 3300. Adhunto por haja un impreshon di e prome workshopnan.

Birando E Cambio tabata un workshop diferente…

Laga bo accionnan y pensamentonan ta e regalo di mas grandi cu bo ta duna na bo mes y bida mes… e resumen di e workshop ‘Birando E Cambio’…

tile workshop -birando e cambio -1Edjean Semeleer a habri e anochi cu e cantica ‘Recuerdo’ di Ramon Krozendijk cu a laga tur hende keto keto…pa Edjean y hendenan presente ‘Recuerdo’ ta simbolisa E Aruba cu nos tur ta stima y cu ta cambiando cada dia mas…pesey Edjean ta bisa: “Den cada rol di nos bida, ta bon pa nos ta conciente di e ehempel cu nos por ta cu e cosnan cu nos ta hasi, bisa y pensa”. Danki Edjean, abo riba bo mes ta un inspiracion di e Arubiano di noble curason. E ta radia, no solamente di bo canto, pero di henter bo ser.

Belquis Moreu a comparti 4 palabra cu por juda un hende transforma su bida. Nan ta ‘danki’, ‘mi stima bo’, ‘despensa mi’ y ‘pordona mi’. E publico a bisa e palabranan mientras nan ta hasi tapping.
Continue reading “Birando E Cambio tabata un workshop diferente…”

Edjean Semeleer ta bin canta ‘Amor’ na workshop ‘Birando E Cambio’

Mi ta invita bo pa experencia un rato pa ‘bo mes’, cu a lo largo lo bira un rato pa tur loke ta rondona bo, hunto cu Belquis Moreu, Giovanna Fijn, dr. Carlos Viana y… Edjean… awe, diahuebs, 7.30 na Spirit of Aruba, Ierlandstraat 22, Eagle…

edjean, ingrid, nathalie Edjean tabata e prome persona cu a anuncia cu e lo bin e workshop ‘Birando E Cambio’ di Comprondiendo Bida. Mi a invit’e pa canta di amor pasobra e ta un hende cu ta inspira sentimento di amor cerca hopi hende. E la priminti cu e lo bin. Mi a topa Edjean na e anochi festivo di Viva La Donna Day y mi pidi’e pa canta un cantica special, un cantica cu lo toca hende su curason. Esey e lo hasi awe nochi. Nos a papia hopi y mi tin cu bisa cu mi a sinja hopi di Edjean. E tin un curason noble y un vision hopi grandi pa su edad hoben. E por ta un ehempel bunita pa otro hoben, cu tin sonjo grandi. E la jena mi cu orguyo di mi pais. E tin bunita pensamento con nos cada un por tin un rol como ehempel di otro y con nos por juda otro pa logra nos metanan. Sin mester di kibra otro pa nos por luci y bay dilanti.

Esaki en berdad ta e pensamento nobo si nos kier un dia ‘Bira E Cambio’ cu nos kier mira. Bida no semper ta facil, cambia tampoco, pero e ta tuma un stap, hopi humildad, hopi pashon y perseverancia pa mira e cosnan cu ta importante di berdad. Edjean ta un cantante hopi stima pa hopi hende, e tin fama riba su dushi isla Aruba, pero e ta canta y baila pa bon causanan y ta brasa cada persona cu aserc’e.

E anochi ‘Birando E Cambio’ lo bira un anochi pa nos vooral ‘sinti’ hunto kico ta amor… pa tur loke ta biba.. kico ta nifica trankilidad den nos curason, den nos curpa, den nos celebro cu hopi biaha ta hopi cansa.

Mi ta invita bo pa experencia un rato pa ‘bo mes’, cu a lo largo lo bira un rato pa tur loke ta rondona bo, hunto cu Belquis Moreu, Giovanna Fijn, dr. Carlos Viana y… Edjean… awe, diahuebs, 7.30 na Spirit of Aruba, Ierlandstraat 22, Eagle… Ta pidi un contribucion chiquito di 20 florin, un pareha ta paga 30 florin… un inversion den bo calidad di bida y felicidad.

Amor ta tambe…Crea Conciencia Comunitario cerca nos yiunan…

Kico ta Amor? Pensa riba Crea Conciencia Comunitario cerca nos yiunan… E ta Amor tambe… un bunita forma di Amor … combina cu disciplina…

sinja mucha biba Un tema di e workshop ‘Birando e Cambio’ ta ‘Kico ta Amor?’, presenta pa Ingrid Werleman y Belquis Moreu

Esaki ta un tema cu lo trese diferente punto di bista riba cua nos por pensa… Un di nan ta si ta importante pa Crea Conciencia Comunitario cerca nos yiunan…

Pakico si? Pasobra e unico manera pa un mucha sinja ta dor di experencia propio…pero loke nos ta mira hopi awendia cu ta sobre-proteje e muchanan demasiado. Nos ta wak cu e ta hopi mas cu 3 generacion atras. Antes e muchanan tabata traha gran parti di dia den campo y nada tabata pasa nan. Ta berdad cu tin mas peliger den caja, pesey ta importante pa como major nos realisa cu: ‘Mi jiu no ta mi amiga, pero ami ta su coach y mi ta hasi esaki cu amor y disciplina’.

Continue reading “Amor ta tambe…Crea Conciencia Comunitario cerca nos yiunan…”

Belquis Moreu pensando con hunto nos por crea un miho majan

Si nos sa cu loke nos hasi awe ta crea nos futuro di majan, kico abo lo cambia awe? Belquis Moreu a hiba nos un rato den futuro durante e anochi di presentacion di Comprondiendo Bida na Biblioteca… www.comprondiendobida.com

Belquis Moreu a hiba nos un rato den futuro durante e anochi di presentacion di Comprondiendo Bida na Biblioteca Nacional… Un futuro unda probablemente nos ta biba pa e cos y no pa ken nos por ta como ser humano. Pa nos tin un miho mundo majan ta importante pa nos realisa cu nos mester uni man y no tira culpa riba otro. Ta fout di gobierno, ta fout di maestronan, ta fout di majornan, propaganda, comercio. No, pa crea hunto un miho majan mester realisa cu e tarea ta di nos tur. Ta nos responsabilidad pa laga atras un miho mundo cu nos a topa y pesey ta importante pa tur partido pone nanishi den mesun direccion y mira con nos por jega na e solucion mas miho den un mundo y pais unda tin menos medio na e momento aki, pero mes tanto hamber na calor, sosten y amor di hende.
Belquis a capta curason di tur presenta ora e la duna un bista di nos futuro, si nos no tuma accion awe.
Continue reading “Belquis Moreu pensando con hunto nos por crea un miho majan”

Presentacion di Comprondiendo Bida y evento ‘Pensando riba Bida’ a inspira…

Presentacion di Comprondiendo Bida y evento ‘Pensa riba Bida’ a inspira…un bista general di un anochi pa alimenta nos alma y curason

ingrid ta entrega revista na oradornanNa prome lugar danki na tur hende cu e a hasi e bunita anochi aki posibel. E tabata un anochi cu a toca hopi curason. Tambe cu a inspira e publico presente pa pensa riba bida. No solamente e bida awe, pero tambe e bida majan. E bida na nos pais Aruba. E bida den nos famia.
Mi persona, Ingrid Werleman a cuminsa e anochi cu un presentacion di e website Comprondiendo Bida. E oradornan Dr. Jaime Falconi, Belquis Moreu, Edsel Lopez y invitada di honor minister Michelle Winklaar tabatin algun puntonan comun den nan mensaje. Nan tur a mustra riba e cambionan den bida cu nos lo por pensa riba dje. Bida pura y agita a pone nos bay den un rutina di bida cu ta laga poco tempo pa interaccion humano.
Continue reading “Presentacion di Comprondiendo Bida y evento ‘Pensando riba Bida’ a inspira…”

Importancia pa recicla…

Ora hende puntra pakico recicla, mi contesta lo ta pasobra e ta importante pa nos propio futuro. Si nos realisa cu den menos cu 100 anja e cantidad di hende na mundo a bira 3 biaha mas hopi y puntra si e planeta por carga tur esaki… ta bira tempo pa pensa serio ‘pakico recicla’…

ad comprondiendo bida - websiteE filosofo Britanico John Gray (63) ta bisa den su buki Straw Dogs, cu e ser humano ta considera su mes ‘Un Master of the Universe’. Pero cu un dia e lo experencia cu e no ta mucho significante den e cosmos mas grandi. Gray ta bisa cu e planeta lo busca su propio balansa natural bek pa e populacion demasiado grandi riba planeta Tera sin tene cuenta cu e ser humano. E ta scirbi cu tabatin mas periodo cu e planeta a bira demasiado cayente y naturalesa a busca semper su balansa bek. Segun Gray Apocalyps ta nifica literalmente ‘fin di historia ‘. Gray ta bisa sin embargo cu historia semper lo sigi, cu guera, problema racial, crisis economico y ambiental…pero si e ta inclui e ser humano, esey ta un otro punto. Ta keda e pregunta si nos por sigi cu e nivel di desaroyo actual pa un 100 anja mas, pasobra e mundo dificilmente por sigi carga e sobre populacion di e planeta.

Pesey ora hende puntra pakico recicla, mi contesta lo ta pasobra e ta importante pa nos propio futuro. Si nos realisa cu den menos cu 100 anja e cantidad di hende na mundo a bira 3 biaha mas hopi. Si nos realisa cu cada un hende mester di un lugar pa e biba y lo kier mas tanto luho y bienestar posibel…
Continue reading “Importancia pa recicla…”

Comprondiendo Bida cu su prome workshop di reciclahe ‘Asesorio Recicla’

Comprondiendo Bida cu su prome workshop di reciclahe ‘asesorio recicla’…crea cadena, armband y renchi orea cu ta unico. Niun hende tin mescos. E workshop aki ta sirbi e ‘3 R’

armband bedel Un aspecto cu ta central riba e website ta e parti ecologico. Esta con nos por biba un bida unda nos no ta malgasta, pero ta tene cuenta cu nos cada un por contribui na un miho medio ambiente pa nos isla, pero tambe pa nos planeta henter. Esaki nos por hasi, practicando e principio di e ‘3 R’, esta Re-usa, Re-cicla y Re-duci. Den e cuadra di e principio aki Comprondiendo Bida ta introduci su prome di un serie di workshop basa riba nos responsabilidad pa laga atras un mundo duradero pa e generacionnan cu ta sigi nos.

Mirando cu otro siman ta dia di mama a organisa un workshop cu e tema ‘Asesorio Recicla’. Den e workshop aki lo traha cu tecnicanan simpel unda e participantenan por sinja traha asesorio di material nobo combina cu material cu ta re-usa. Y asina ta crea cadena, armband y renchi orea cu ta unico. Niun hende tin mescos.

E workshop aki ta sirbi e ‘3 R’, pero ta tambe vitamina pa e alma y creatividad. Den un tempo cu nos ta mira hopi malesa cu ta relata na stress, ta bon pa nos tuma tempo pa bay bek na busca un poco mas trankilidad, creatividad y alegria den nos bida.

Tur esaki ta elementonan cu e participante ta encontra den e workshop. Banda di esaki sigur e lo contribui tambe na ‘reduci’ gastonan ora bo mes por traha bo asesorio of traha bo mes regalo ora di un fiesta. E workshop por ta un bunita regalo cu empresanan por regala e mamanan cu ta traha cerca nan. Tuma un atardi for di e schedule druk y pasa hunto na trabou den un otro ambiente.

Pa mas informacion por jama Ingrid Werleman, tel. 741 3300 of mail ingridwerleman@gmail.com of via contact di e website.