E pensamento pa awe. E berdad scondi

Si cambia leynan cu ta pone tanto e mama como e tata responsabel pa e yiunan, hombernan lo pensa miho prome cu traha yiu?

Awe ta ‘Dia Internacional di Famia’. Mi ta pidi bo pa tuma un rato pa wak un video cu ta mustra nos hopi cla pakico ta importante pa nos no bira cara pa e realidad scondi den mas famia cu nos ta kere.

‘E berdad scondi’ ta un testimonio di pobresa na Corsow. Situacionnan cu ta conta pa mas isla y pais, tambe pa Aruba. E cosnan di bida cu no tur hende kier wak. E circulo vicioso di pobresa. E abuso sexual den famia. E buskeda pa amor di un muhe jong cu a pasa den tur e situacionnan aki. Y toch e ta hasi e esfuerso pa papia cu su yiunan pa nan tin un miho bida. Pero e no por su so.
E mama di 3 yiu y 27 anja ta bisa: ‘Mi no kier pa mi yiunan pasa den mesun cos cu ami a pasa aden.’ Y toch den tantisimo caso bo ta mira cu den e buskeda pa amor, felicidad y proteccion, muchanan jong ta atrae net e hende den su bida cu ta lag’e pasa den loke e no tabata kier. Manera e senjora cu ta guia mamanan den situacion di pobresa ta bisa; ‘E ta bay hopi mas profundo, cu bo lo pensa na prome instancia.’ E berdad ta cu e tin hopi di hasi cu cicatrisnan di bida. Y sin guia adecuado y comprenshon di otro, e persona ta keda pega. Pasobra niun hende a sinj’e balora su mes. Tampoco pa e explora di ki forma e por sali di pobresa dor di usa un posibel talento cu e por tin.

Tin ora mi ta puntra mi mes si e hendenan cu tin cu yuda e mamanan aki tin mas facilidadnan pa traha cun’e, e lo por yuda mas? Si cambia leynan cu ta pone tanto e mama como e tata responsabel pa e yiunan, hombernan lo pensa miho prome cu traha yiu? Si pueblo henter cuminsa wak hende den necesidad cu wowonan di compashon, y yuda pa nan haja mas balor propio, nos lo crea un miho comunidad?

Cosnan pa pensa, pa ami y abo…
Stima bo famia y stima tur famia…

Ingrid Werleman, pa www.comprondiendobida.com

E wanta den parlamento di Corsow y un mundo wardando riba liderasgo

Parlamento no ta un ring di boxeo, e ta un lugar sagrado unda curason di pueblo mester biba y bati como inspiracion…


Mi a lanta 3.03 di madruga cu hopi pensamento y sentimento cu a kibra mi sonjo. Continuamente mi ta wak e wanta cu un parlamentaria a dal su colega parlamentaria na Corsow. Sangra su cara y cana bay manera nada a pasa. Den e silencio di madruga mi ta puntra mi mes den ki mundo nos ta bibando… E organo di mas halto di nos isla ruman, e organo cu tin como tarea pa controla gobierno. E organo cu tin como tarea pa bin cu leynan cu ta defende interesnan di e pueblo cu a vota pa nan. Un grupo di hende cu lo mester tin etica, inspiracion y duna bon ehempel.

Nos islanan chikito tin demasiado retonan pa atende, specialmente ora ta toca e ser humano mas marginal y vulnerabel. Esunnan jama pa trese solucion mester wak con hunto por sali afo, kedando hopi cerca di e hendenan. Pero cerca di berdad, no solamente pa e potret den media. Cerca pa scucha e bos di pueblo, su deseonan, su sonjonan cu no ta haja contesta, ni realisacion. A bira tempo pa bin cu solucionnan cu ta eleva e calidad di bida di cada ciudadano. Bin cu educacion y informacion pa hasi nos cada un mas inteligente, mas independiente di politica.

Cada hende ta un mundo y tin nan propio agenda pa hasi loke nan ta hasi. Pero, si nos wak rond den mundo, mi ta haja e impreshon cu nos ta hopi confundi. Na lugar di busca mas cercania y union pa traha hunto na e situacionnan dificil cu nos ta mira tur rond mundo, hendenan cu poder di autoridad parse di ta busca solucionnan den division y violencia.

E ora, por ta cu e hendenan cu tin un otro vision di bida tin e tarea pa bin dilanti? Un vision dirigi riba crea lasonan di union pa hunto sobrebibi tormentanan cu por asota nos islanan chikito…?!

Parlamento no ta un ring di boxeo, e ta un lugar sagrado unda curason di pueblo mester biba y bati como inspiracion…

Ingrid Werleman

Un bela pa Mitch y e dolor y balentia di un mama

Mi ta wak e mama, para cu un bela den su man banda di e potret di su yiu cu a muri bou circumstancianan asina violento y mi ta pensa ‘Ki balente e mama aki ta, di por para akinan cu un bela pa su yiu, mientras su curason lo ta kibra den mil pida.

Esta un dolor pa un mama...
Esta un dolor pa un mama…

Tabata dialuna mainta cu mi a lesa cu atardi lo tin un misa pa pidi Dios descanso pa e alma di Mitch Henriquez. Y atardi mi a bay misa di Noord, pa mustra mi convivencia. Tambe pa den mi silencio conecta cu mi Dios, cu mama Maria y pidi pa forsa pa e famia y husticia Divino den e caso di Mitch Henriquez. Mi a brasa e mama di Mitch y ta pensa den mi mes ‘Ki dolor e mama aki mester tin den su curason na e momentonan aki’. Despues den e vigilia pafor di misa, mi ta wak e mama, para cu un bela den su man banda di e potret di su yiu cu a muri bou circumstancianan asina violento y mi ta pensa ‘Ki balente e mama aki ta, di por para akinan cu un bela pa su yiu, mientras su curason lo ta kibra den mil pida’.

Cherry, e ruman muhe di Mitch ta contami ‘Senjora, mi ruman ta un hende cu ta semper jolly, semper e ta trese alegria unda cu e ta. Di tur hende, e no a merece un morto asina’. Mi ta di acuerdo cu Sherry, maske mi no a conoce Mitch personalmente, pero mi a bay riba e pagina di Facebook di Mitch Henriquez y akinan mi ta topa un persona simpatico, cu alegria den su postnan. Un hende cu expreshon simpatico. Mi ta topa tambe un banner di juni 2014 cu ta bisa ‘No matter what, in victory or defeat. Hup Holland Hup.’ Y mi ta pensa con cruel destino tin ora ta.

Laga nos tur sende un bela pa Mitch awe
Laga nos tur sende un bela pa Mitch awe

Mi ta sende mi bela y resa hunto cu tur presente. Maske jena cu dolor, e anochi ta tambe hopi sereno cu e luna cla riba e imagen di Cristo den cura di misa. Union di famia y hendenan cu a bin hunto pa comparti nan sentimento na un forma digno di nos Aruba chikito. Vooral e presencia di su hendenan di Noord a resalta. Mi a bay cas bek cu un curason mes pisa cu lihe. Y mi ta refleha riba e palabranan di Mitch su ruman ‘Di tur hende, e no a merece un morto asina.’ Pakico Mitch, mi ta pensa? Ami ta kere cu e misterionan di bida ta hinca den e mente Omnipotente di Dios. Den mi curason mi ta spera cu e morto cruel y inhusto di Mitch por mustra hendenan rond di mundo cu violencia no ta e caminda. Y cu tambe na Aruba cada un di nos por hasi intentonan tur dia pa pensa cu e mente di Dios den cada cos cu nos hasi. Ami ta kere cu Dios lo pensa semper cu amor, cu husticia, cu compashon y tolerancia. Y Dios lo pensa tambe cu alegria di bida, loke nos por sinja di Mitch.’ Cu Mitch haja su pas den e Reino di Dios y cu su famia haja forsa pa surpasa nan dolor y consuelo cu husticia a prevalece den e investigacion cu a ser hasi.

Pensa cu e mente di Dios
Pensa cu e mente di Dios

Ingrid Werleman

E morto tristo di sr. Mitch Henriquez

Mi ta puntra mi mes con hopi BIDA di un ser humano ta bal pa e polisnan involvi den e morto tristo di sr. Mitch Henriquez.

Cada hende tin balor
Cada hende tin balor

Mi no conoce sr. Mitch Henriquez personalmente. Te cu awe nunca mi a tende di dje. Pero mi ta sinti mi tristo, rabia, indigna con sr. Mitch Henriquez a jega na su fin durante su vakantie na Hulanda. Si ami cu no conoce sr. Mitch Henriquez ta sinti asina, mi por imagina mi mes con su famia y amigonan lo ta sinti na e momentonan aki. Mi a wak cada video y a wak y wak nan di nobo pa mi por forma mi opinion. Y cu hopi tristesa mi ta puntra mi mes si nos ta bayendo den un mundo unda violencia lo bira mas y mas e metodo pa soluciona diferencianan di opinion. E ta pone mi pensa con hopi mas nos mester propaganda tolerancia, comunicacion y prevencion den nos media y instancianan concerni. E ta pone mi pensa dicon un cuerpo di polis supuestamente profesional na Hulanda ta keda draai minutnan rond di un detenido y te hasta ora un di nan ta bisa cu no tin hopi bida mas den e detenido, nan ta hincé den un auto di polis y no ta jama un ambulance cu ta miho equipa pa por a scapa su bida ainda. Mi ta puntra mi mes con hopi BIDA di un ser humano ta bal pa e polisnan involvi den e morto tristo di sr. Mitch Henriquez.

Sr. Mitch Henriquez su cara simpatico
Sr. Mitch Henriquez su cara simpatico

Cu sr. Mitch Henriquez haja pas eterno y su famia e forsa pa un dia surpasa nan dolor.

Ingrid Werleman

E morto di un hoben studiante y violencia cu ta jama mas violencia.

Mi no kier perde speransa den mi Aruba, dushi Tera, e isla cu a mira mi nace. E isla cu a inspirami pa pensa cu un dia nos por TA e ehempel di ‘un isla felis’.

media internacional

Un hoben Canades, studiante di medicina na Aruba ta sali pa gosa y ta haja su morto a base di un discushon y golpi dor di e security di un nightclub. Na Aruba, mi dushi Tera. Un ehempel mas di violencia cu ta birando normal riba nos isla chikito? Kico nos lo conclui si nos analisa e bida nocturno riba nos isla? Nos ta tende e mesun tipo di reaccionnan ora algo similar pasa. ‘Hopi erg’. ‘Esaki no por’. ‘Castigo pisa mester cay’. Tur esaki, sin investiga si na nos isla chikito podise tin demasiado libertinaje den bida nocturno. Nos kier imita paisnan grandi sin mira si nos tin e infrastructura, mentalidad, regulacion, disciplina y etica di trabou necesario. Poder ta un cos peligroso ora e no ta sostene pa norma, balornan y reglanan cu ta pone tambe limitacionnan con leu un hende por jega cu su autoridad. Cu e cosnan aki ta pasa den paisnan grandi tambe? Sigur! E ora nos por puntra nos mes ‘unda nos kier bay cu nos progreso na Aruba?’. Puntra nos mes ‘kico nos ta considera normal’, ‘ki actitudnan nos ta dispuesto pa acepta y kico no’.  ‘Con hopi nos kier inverti den training di comunicacion y enteraccion humano (people skills) di e hendenan cu nos ta tuma na trabou.

E nivel di servicio na Aruba no semper ta cuadra cu e imagen cu nos tin den exterior. E amabilidad y cariñosidad di e hendenan cu ta brinda servicio hopi biaha no ta esun cu a hasi Aruba famoso. Cheap labor, falta di training y crisis mundial sigur ta hunga un rol. Tur esaki lo keda mescos si nos no cuminsa pensa na un nivel mas cosmopolitano, pero manteniendo e karakter local.  Un nivel cu por a evita e caso lamentable aki. Podise ta bon pa nos pensa cu excesonan di violencia lo por stop ora hendenan ta haja mas satisfaccion den nan trabou.

Ta mas sabi pa nos stimula un actitud cu nos t’ey pa sirbi otro, pa ta cordial cu otro. Ta sabi tambe pa sa mas di e poder di pensamento,  cu ta sinja nos cu cos bon lo atrae mas cos bon.  Nos lo no stop violencia cu un actitud di mas rigides. E hendenan cu tin poder, con chikito cu e por ta, lo tuma poder den nan man ora nan ta haja esaki necesario. Esaki ta e ley di selva, e instinto humano ora un sociedad no a sinja su hendenan pa biba segun balornan humano eleva. ‘No reaciona, pero entermedia pa situacionnan no escala’.  Imagina bo un sociedad unda ta incentiva y duna ehempelnan noble.  Unda ta educa y guia e hende pa e bira na prome lugar un bon ser humano. ‘Trata cada hende, manera abo kier ser trata’. ‘Imagina bo cu e tabata bo yiu, con bo lo a sinti?’. Esaki ta empatia of afinidad cu bo prohimo. Mi no kier perde speransa den mi Aruba, dushi Tera, e isla cu a mira mi nace. E isla cu a inspirami pa pensa cu un dia nos por TA e ehempel di ‘un isla felis’.

Ingrid Werleman, www.comprondiendobida.com

 

Aruba, no lag’e jega nunca asina leu y asesinato di sr. Wiels

Hopi trustu, kruel, lamentabel i bergonsoso e horibel asesinato di Sr. Helmin Wiels. Ta duna miedu, miedu di nos mes hendenan. Nos komunidat ta manera kos ku a bira siegu. Siegu i ignorante. Siegu pa òrden, siegu pa komprenshon i siegu pa positivismo. Hasta siegu pa e amor ku nos tin ku praktiká pa traha riba e futuro pa nos yunan, pa nos mes, i pa nos pais.

sr. Hermin Wiels... sosega na pas
sr. Hermin Wiels… sosega na pas

Ta asesina sr. Helmin Wiels cruelmente mientras e ta bay cumpra un soppi. Hopi hende ta den shock. Cosnan cu nos no ta spera mas den nos mundo civilisa. Y toch, nos mundo ta jen di violencia. Nos mundo ta jen di bondad tambe. Unda pa busca e solucion?

Un comentario di un amigoe aprecia di Corsow: Robert Coffie

Hopi trustu, kruel, lamentabel i bergonsoso e horibel asesinato di Sr. Helmin Wiels. Ta duna miedu, miedu di nos mes hendenan.

Nos komunidat ta manera kos ku a bira siegu. Siegu i ignorante. Siegu pa òrden, siegu pa komprenshon i siegu pa positivismo. Hasta siegu pa e amor ku nos tin ku praktiká pa traha riba e futuro pa nos yunan, pa nos mes, i pa nos pais.

E loke ku nos ta eksperensiando ta un futuro sin amor. Un futuro ku lo yega i desaroyá ku odio-propio.(en bes di amor-propio i amor pa nos pais)

Un emoshon di odio asina lo kaba ku bo, kimabo manera un pida karbon kayente. Ademas e emoshon aki lo lo no destruí bo so, e lo destruí bo komunidat kompleto.

Odio ta kousando hopi problema den mundu, i riba nos pida baranka Korsou tambe, pero te ainda mi no a ripará ku odio a resolvé niun di nos problemanan na drechi.

Tin biaha nos ta kere ku odio ta e arma pa ataká otronan. Pero odio ta un kuchú di dos banda, i e malu ku nos hasi na otro, nos ta hasi’e na nos mes , i sin duda na nos komunidat.
A yega ora pa nos para ketu i reflekshoná riba kon nos tin ku bai traha riba nos komunidat.

Mi komunidat ta mi famiya, e komunidat di e maestro(a)nan òf esnan den enseñansa ta nan alumnonan, e komunidat di esnan enkargá den deporte ta nan atletanan, komo doño òf lider di un empresa bo komunidat ta bo empleadonan. Siña nan i dunanan e ehèmpel kon pa ta un dushi hende, siña nan balor i normanan. I abo komo lider siña bo mes e kosnan aki promé.

Ban kuminsa awor i no laga pa aki un par di aña nos tin ku bisa KU NOS TABATA dushi hende.
Mi ta spera ku e siman aki nos por reflekshoná riba bondat i AMOR i ku lo reina pas duradero na Korsou.

robert coffie - trainer
robert coffie – trainer

Danki Robert pa permiti nos usa bo refleccion. Ohala cu hopi hende les’e y comparti’e bou nan amigonan. Y mas cu tur cos bib’e y bir’e! ~ Comprondiendo Bida

Con abo lo sinti si tabata bo yiu

Na Aruba: Hues ta pidi 2 aña di prison pa homber cu a abusa di su propio yiu muher menor di edad. Imagina bo cu ta bo yiu. Con bo lo a sinti?

Con abo lo sinti si tabata bo yiu
Con abo lo sinti si tabata bo yiu?

Na Aruba:

Hues ta pidi 2 aña di prison pa homber cu a abusa di su propio yiu muher menor di edad. Imagina bo cu ta bo yiu? Con bo lo a sinti?

Imagina bo kico a pasa den e mente di e mama. Ora hues a dicta sentencia, despues cu hues tabatin ful un declaracion di e mucha cu pruebanan medico.

Cosnan cu ta pone stoma di un hende bolter; cosnan cu lo sali solamente di un mente hopi perverso.

Hues a bisa e tata cu e ta kere e declaracion di e mucha y toch ta pidi solamente 2 anja di castigo.

Kico ta pasa den e mente di un tata cu no ta respeta ni su propio yiu? Di con niun protesta di instancianan cu tin mucha como grupo meta?

Si nos no ta defende e derecho di nos muchanan, ta ken su derecho nos ta defende anto?

Para keto un rato y pensa: ‘Con ami lo sinti si tabata mi yiu?’

OM a pidi apenas 3 luna den apelashon pa pareha ku tin kondena haltu pa violashon di mucha

E caso liga na e articulo ‘Pèrdida di señorita no ta nifiká ku tabatin relashon seksual’, publica maart 31, 2013. Tristo pa lesa con poco balor palabra y pruebanan medico di un mucha parse di por tin den corte, den e caso aki na Corsow.

tin husticia den abuso seksual
tin husticia den abuso seksual?

Fuente: Notisia 360

WILLEMSTAD – Despues ku den korte di promé instansha e pareha Oomen a haña kastigunan di 5 aña i 12 luna, respektivamente, e siman aki Korte di Apelashon, Prokurador General a pidi apénas 3 luna pa e hòmber i ‘vrijspraak’ pa su kasá. Konsiderando ku den promé instansha asta Ministeiro Públiko a pidi 8 i 3 aña pa nan, por bisa ku loke a pidi awor ta práksikamente nada. I no keda sorprendí si nan sali kompletamente liber dje akusashon.  Si mester bai tras di e loke ku a bin dilanti den korte, anto e kriatura(nan) a pasa periodonan largu di trouma i doló, si tuma na konsiderashon ku ta trata di un hòmber ku kurpa korpulento i klaramente un persona ku ta aparentá di ta hopi brutu i e muchanan apénas 12 aña di edat. E loke ku a keda deskribí ta un abusu total, esta e kriatura muhé, mester a hasi sèks oral, masturbá e hòmber i tambe soportá sèks vaginal ku el a deklará tabata hasi hopi doló kada bes ku esei tuma lugá. E promé biaha e kriatura a deklará ku el a keda den sanger. E hòmber na vários okashon a trata di penetrá anal, pero esei no tabata bai i e kriatura tabata grita i yora i rebeldia kontra di e intento anal. E echo ku e tata mes tabata pasa e kriatura aki e asina yamá ‘prikpil’ o sea angua pa no sali na estado, el a bisa e mucha ku si e tene sèks anal e ora ei e ta evitá di pasa angua. Esta den un intento pa e kriatura soportá e sèks anal i evitá pasa angua. Tin indikashon ku e hòmber a kometé e mesun abusu seksual ku otronan o sea a intentá kontra di muchanan ku ta pasa algun dia serka nan. Na un okashon e mama a habri porta i haña su kasá den ful akshon ku e kriatura.

Ora e yu kriatura rebeldia i no ke hasi sèks, e hòmber ta lag’é drumi sin paña abou den kamber den èrko sin laken pa e tapa. Durante tratamentu dje kaso aki den Hof e pareha a trata di konvensé korte di tur manera ku tin dje muchanan ta rebelde, ku nan tin influensha riba otro, i e motibu ku a pasa prikpil ta pasobra esun kriatura ei ta bai kaya i ta kana hopi ku otro mucha hombernan. Prokurador General a duna di konosé ku e no ta mira pruebanan konvinsente i komo tal a pidi apénas 3 luna pa e homber mientras ku su kasa lo ta liber di persekushon penal. Korte lo dikta sentensia dia 16 di aprel.

 

despues di doofpot religioso awor tin un doofpot medico

Si tabata yiu di e dokter of e hues, e diagnostico lo tabata mescos? Mi ta puntra mi mes si e diagnostico aki por ta basa riba informacion cientifico y ken por duna informacion di esaki. Lesa pa bo mes y husga si esaki ta husto.

abuso sexual
Pèrdida di señorita no ta nifiká ku tabatin relashon seksual

Pèrdida di señorita no ta nifiká ku tabatin relashon seksual

Fuente: noticia 360

WILLEMSTAD.- E defensa di pareha Oomen, den e kaso aki abogadonan mr. Bokkes i mr. Blonk, a basa su mes pa gran parti riba rapòrtnan di dòkter i konklushonnan ku por a saka a base dje rapòrtnan aki. Den e kaso aki por ehèmpel, e víktima prinsipal R. a ser kontrolá dor di un ginekólogo i esaki a konstatá ku R. su vagina ta den tal estado ku por konkluí ku e tabatin un penetrashon (6 uur) ku no ta algu resien. Banda dje echo ku esaki ta laga espasio pa penetrashon, tambe t’asina ku e echo ku e no ta señorita mas no tur biaha mester nifiká ku tabatin penetrashon. E lo por a surgi di un òf otro forma, p.e. dor di kore kabai, sierto movementunan den gimnasia.

Segun mr. Blonk, datonan médiko hopi biaha inhustamente ta ser mirá komo señalnan di abusu seksual. Un persona/mucha por tin skeer chikí rondó di su anus, klèpnan vaginal ku ya ta tira afó, òf matris ku tin skeer chikí. Ningun di e señalnan aki nesesariamente ta síntomanan di abusu seksual. No opstante esaki nan sa okashoná pániko, sigur si un profeshonal ku no ta spesialisá den leshon ta konfirmá e sospecho di abusu, manera den e kaso aki. Ta p’esei ta masha importante pa e diagnóstiko ser verifiká. Ta p’esei ta bon pa e síntomanan ser deskribí kuidadosamente i preferiblemente nan ser fotografiá. Tambe ta nesesario pa dòkternan argumentá nan diagnóstiko. I den esaki segun mr. Blonk, Ministerio Públiko a faya. Por sierto, dr. Moses no a laga espasio pa a duna un ‘second opinion’ dor di otro profeshonalnan.

Echo ta ku e hobensita no ta señorita mas, pero no por bisa ku ta Marco Oomen tabata e kulpabel. Tabatin e sospecho fuerte kaba ku R. tabata seksualmente aktivo, i esei mes tabata e motibu dikon famia Oomen a disidí di dun’é un ‘prikpil’ riba rekomendashon di nan dòkter di kas. Di kontestanan ku R. a duna na polis por konkluí ku e tabata seksualmetne aktivo na Surnam.

Es mas, segun abogado Blonk na òktober 2012 dr. J. Capello, kende ta un eksperto riba tereno aki, a ser skuchá na hues komisario. Den e kaso aki dr. Capello a duna di konosé ku no por konkluí sin mas ku si un mucha a pèrdè su señorita, ku den su kaso lo tabatin penetrashon. Den su splikashon el a mustra ku den ginekologia tin un termino ku yama ‘paalverwonding’, ku por surgi komo konsekuensha di un trouma dor di esfuersonan físiko serka un mucha muhé. Den e kaso por pensa riba entre otro korementu di kabai, turnen òf práktika di kualke otro deporte. Uso di tampon tambe por kousa un trouma asina.

Segun e abogado, den kaso di otro víktima S., anteriormente su mayornan no tabata kere loke e ta bisa, pero diripiente nan a kere su historia despues di dos aña ku nan a bin sa di deklarashon di e otro muchanan. S. a yega di bisa su mama ku Marco lo a abusá di dje, pero e mama nunka a entregá keho, presisamente pa motibu ku S. ta gaña hopi. Si pone deklarashonnan di e diferente testigunan banda di otro, por mira ku tin kontradikshonnan grandi.

E abogado a konkluí ku, teniendo kuenta ku konklushon di ekspertonan den kasonan aki, i teniendo kuenta e kontradikshonnan ku tin den deklarashon di testigunan, e ta kere ku su kliente, Marco Oomen mester ser deklará liber di tur persekushon penal

Fuente: noticia 360

Hoben ta mata otro hoben na Aruba… dicon?

Con nos por a jega asina leu, cu e noticia cu un hoben a mata otro hoben ta ocashona reaccionnan cu ta indica cu tin hende lo por ta contento cu un hende a mata un otro, pasobra e otro ta criminal toch?

Teenager with a gun
Kico ta pasando den nos comunidad?

Hopi anja pasa den un session di Aruba Quality Foundation a ser bisa cu poco poco Aruba ta birando un ‘community of not caring’, un comunidad unda hende no ta cuida y sinti pa otro mas. Ora mi lesa e reacionnan riba e suseso lamentable aki riba 24 ora.com mi ta haja un vishon un poco macaber riba e falta di refleho riba kico ta na rais di cosnan asina.

‘Kico ta pasando den nos comunidad?,’ mi ta pensa. Con nos por a jega asina leu, cu e noticia cu un hoben a mata otro hoben ta ocashona reaccionnan cu ta indica cu tin hende lo por ta contento cu un hende a mata un otro, pasobra e otro ta criminal toch? Y un otro cu ta bisa pa mata e matado paso prison ta costa placa. No ta mas importante pa nos pensa kico por ta e tendencia y desaroyonan den comunidad cu ta ocashona matamento y reaccionnan sin emocion?

• Kico nos tin di mas den nos comunidad y kico ta falta nos?

• Nos ta un comunidad mucho chikito pa imita paisnan hopi grandi?

• Kico ta e cosnan cu ta ocupa nos mente y curason?

• Con hopi nos ta practica loke nos ta predica?

• Kico nos por stimula mas y kico nos por elimina mas?

Tin ora mi no tin ni gana di scirbi mas riba temanan negativo. Pero mi afinidad pa mi comunidad ta pone mi cuminsa scirbi maske mi lo ta desea di hasi algo otro.

Na e momento aki mi tampoco tin e contestanan, pero mi lo kier pa cada hende refleha un tiki den nan mesun bida, famia y circulo di influencia kico nos por contribui pa hasi di nos pais un dushi tera atrobe? Un tera unda hendenan ta biba den harmonia y respet cu otro.

Juan Kock ta un ser humano mescos cu cada un di nos. E ta yiu di mama y tata, ruman di, tata di, amigo di…

Podise un dia tabatin un mucha chikito cu no tabata haja suficiente atencion of carinjo. Podise cada dia tin muchanan cu no ta haja atencion ni carinjo… podise tur dia tin muchanan cu no ta haja un sunchi, un sonrisa pero grito tur dia di nan bida… Si abo por hasi e diferencia, no keda sin hasi’e! Duna amor y atencion positivo pa evita cu mas morto mester cay. Nos por miho!

Pas na Juan su alma y condolencia na su famia y amigonan.