Podise tin un les den e Ayo na Rio Grande

Nos herencia cultural ta hasi nos conciente di nos cultura y nos historia. Pesey ta importante pa nos cuida y preserva nan.

Recuerdo di un cas
Recuerdo di un cas

~ Rio Grande, den ora di dolor nos ta realisa hopi cosnan di balor.

Bibando den un comunidad den movecion continuo, nos tin di acepta cu e unico cos sigur den bida ta cambio. Completamente berdad! Pero, nos por acepta tambe cu nos historia a hasi nos loke nos ta awe. Tin cosnan cu ta caracterisa un pueblo. Cosnan cu ta hasi un pueblo sinti orgujoso di nan mes y nan ancestronan.

Awo nos sa cu un di e cosnan aki ta e edificio di Rio Grande na Noord. Ora a haja sa cu a basha e edificio di Rio Grande abou sentimentonan emocional a domina riba nos isla. Sentimentonan di rabia, tristesa,cuestionamente, di no por kere.

Nos a haja sa tambe cu eigenlijk no tin un ley cu por evita cu edificionan historico por bay perdi na un forma cruel asina. E boet di 1000 florin cu ta duna pa destrui edificionan historico lo no stroba niun inversionista cu hopi placa pa no basha un edificio abou.

Rio Grande tin mas di 120 anja
Rio Grande tin mas di 120 anja

Tin reglanan estricto pa protega naturalesa den Parke Arikok. Dicon no tin reglanan mes estricto pa protega nos herencia cultural? Pa paisnan riba e lista di herencia cultural mundial esaki ta un honor y un punto strategico den mercadeo di nan pais como destinacion turistico. Herencia cultural ta e palabra cu ta describi e monumentonan historico, objetonan arceologico, archivonan y documentonan di un pais y su ciudad y paisahenan. Den hopi pais esaki ta regla pa ley y supervisa pa profesionalnan den e materia. Nos herencia cultural ta hasi nos conciente di nos cultura y nos historia. Pesey ta importante pa nos cuida y preserva nan.

Si ta berdad cu gobierno, e instancianan concerni y e donjo nobo tabatin asina hopi aprecio y balor pa e edificio di Rio Grande, anto nos por puntra nos mes si no tabatin un otro manera pa a jega na un solucion unda tur partido involvi por a haja nan mes?
Por a comunica miho?
Instancianan concerni por a duna mas prioridad na e caso aki?
Bibando den un comunidad unda mas y mas nos ta perdiendo nos identidad como Aruba y Arubiano, lo jega un dia unda di berdad nos ta bisa “A jega ora pa proteha loke ta di nos y di nos ancestronan?”

Un 'Ayo' na Rio Grande
Un ‘Ayo’ na Rio Grande

Nos lo no haja Rio Grande nunca mas bek manera e tabata cu su material di construccion, su historia, su energia, recuerdo y memorianan. Pero podise, djis podise nos por sinja un les di e sabor amargo aki?

Pensa otro y inspira bo yiu pa mira bunitesa den bida

Bo yiu tin derecho di crea su mesun sonjonan. Su caminda di bida. Wak su talento y interes. Gui’e y apoy’e.

sinja bo yiu desaroja su talento
sinja bo yiu desaroja su talento

 

Como ser humano nos tin e tendencia di keda pega den nos mal experencianan di bida.

Nos tin tambe e tendencia di pasa e actitud aki pa nos yiunan.

Aki nos ta crea un circulo vicioso cu ta pasa di generacion pa generacion.

Cuanto biaha abo a bisa of tende e siguiente expreshon?

‘Wak kico e mes a pasa aden y toch e la drei hasi mescos!’

Pensa otro y inspira bo yiu pa mira bunitesa den bida.

Inspir’e, dun’e di bo tempo y amor .

Dun’e conseho, pero no pasa bo miedonan p’e.

E tin derecho di crea su mesun sonjonan.

Su caminda di bida.

Wak su talento y interes.

Gui’e, apoy’e.

Ta e miho modelo p’e.

Si, bo por!

 

Ingrid Werleman pa www.comprondiendobida.com

Kada mucha tin su nochi

E poesianan di Karen D. Russel de Corrales ta manera un brisa suave di mainta. Nan ta bisa berdadnan grandi cu un suavidad cu ta transforma.

Karen D. Russel
Karen D. Russel de Corrales 

Den e nochi di deskanso, un mucha ta drumi

ta soña soño bunita di hubentut

yen di speransa di rikesa i salú

Den e nochi di tristesa un otro mucha ta pensando

Ta sintié será den trampa di skuridat

sin su preguntanan wordu kontestá dor di soledat

Den e nochi di flakesa un stoma ta gruña

e mucha ei na otro banda di nos mundu

No por drumi debi na hamber profundo

Den su anochi di desesperashon, no ta su stoma so:

e mucha ta hambrá tambe pa pas

pa inosensia, pa edukashon y pa amor den su kas

Den e nochi di speransa, mara nos mucha por tin fe;

ku no tin awe nochi so, i ku su preguntanan

tur lo wòrdu kontestá ora lus sali mañan

1994 Karen D. Russel de Corrales

http://www.kdrdecorrales.com/

Cantica di Aruba, Fiesta den cura

Brazil ta e unico bario na Aruba cu tin un parada folklorico. Dushi Bario Brazil, conservando Aruba su folklor! Danki na Centro di Bario Brazil y Mariano Bermudez pa e bunita trabou aki. Folklor bo ta sinja stima dor di participa den dje di chikito!

1. 

 

 

conservando Aruba su folklor
Dushi Bario Brazil, conservando Aruba su folklor


Palabra di H. Booi
Música di R. Wever/P. Lampe

 

Un dia ta ‘tin un fiesta
Den mondi tra’i Ponton
Dies dori a forma’un orkesta
i bailia a cum’ nsá bon
Cabritunan tur cu baca
ta zoja den cura
Un yeye cu’n kakalaka
ta salta bon purá

Refran: 
Dori ta pita
Yeye ta grita
Baca ta balia cha-cha-cha
Pushi ta yora
djaka ta lora
Porcu ta gruña ‘Ho! ‘Ho!
2. 

 

 

Totekkinan cu yuwana
ta sinña core wals
Un pushi cu yen di gana
ta sinta kou su bals
Den esei el a bula lanta
i a cum’nsá sapatiá
Cachonan cu tambe a spanta
acore bai gatiá
Refran: 
Dori ta pita
Yeye ta grita
Baca ta balia cha-cha-cha
Pushi ta yora
djaka ta lora
Porcu ta gruña ‘Ho! ‘Ho!
3. 

 

 

Orkesta a para ketu
Buricu a halsa bos
Un porco cu rabu pretu
A gruña un cos mahos
Shon porco ke un guaracha
Cha baca un tumba bon
Buricu ke tende un marcha
i pushi ke un danson
Refran: 
Dori ta pita
Yeye ta grita
Baca ta balia cha-cha-cha
Pushi ta yora
djaka ta lora
Porcu ta gruña ‘Ho! ‘Ho!
4. 

 

 

 

Nan tur a cuminsa pleita
dal otro benta abou
Un djaka cu a para weita
a spanta te cai flauw
Un baca bisti cu pèchi a yega
armá cu un klop
A pone tur sinta nechi
i balia a sigui sin stop
Refran: 
Dori ta pita
Yeye ta grita
Baca ta balia cha-cha-cha
Pushi ta yora
djaka ta lora
Porcu ta gruña ‘Ho! ‘Ho!

 

Amor pa Aruba

Sera conoci cu Ken Mangroelal. Filosofo, escritor, musico y su amor pa e pais unda e la nace—Aruba.

watapana poem by Ken 'Nos Mainta' - tv show
watapana poem by Ken
‘Nos Mainta’ – tv show

Watapana

B’a prefera destino
Pa haña rais aki
Y crece den e aliento persistente
Di un biento di Pasat

Sotabiento
B’a laga
strimline
Bo corona
Birando nos palo
Mas caracterisa

B’a duna e dibuhonan indjan nan color
Y nos paisahe su orguyo

Ma sigui bo destino
Pa nace aki tambe

~  Ken Mangroelal

Muhe Frida – cine artistico y mistico di nos propio suelo.

Cu e produccion aki Alydia, Felix de Rooy y Ryan Oduber a mustra e forsa di combina talento y ta sinja nos cu maske un isla chiquito, nos por crea produccionnan di nivel artistico internacional.

alydiafrida

Den e cine cortico ‘Muhe Frida’ Alydia Wever ta duna su version di 7 arcetipo di e artista Mejicano Frida Kahlo. Alydia ta bisa cu Frida a inspir’e, mescos e lo keda inspira tur generacionnan cu lo topa cu Frida di un forma of otro. Mes colorido, bohemico, mistico y controversial cu Frida Kahlo su bida tabata, asina Alydia, hunto cu Felix de Rooy y Ryan Oduber a blend e naturalesa fotogenico y colorido di Aruba den nan produccion.

Continue reading “Muhe Frida – cine artistico y mistico di nos propio suelo.”

Con abo ta celebra Dia di Amor y Amistad

Happy Valentine’s Day na TUR lesador di Comprondiendo Bida…
Realisa awe cu amor ta hopi mas cu amor pa nos pareja…

e lama di amor

Happy Valentine’s Day na TUR lesador di Comprondiendo Bida…
Realisa awe cu amor ta hopi mas cu amor pa nos pareja…
E ta podise mas necesario pa stima y manda amor pa esun cu menos ta stima bo…
Pa esun cu mas a herida bo…
Mi ta desea bo un dia jen di rikesa y amor…

Danki na mi modelonan pa e potret misterioso aki…
Un tata cu yiu cu no semper ta compronde otro…
Pero ta stima otro te hasta den e momentonan cu nan ta parse di hasi bida di otro un poco imposibel…
Love the 2 of u… you add meaning to my life…

E pensamento bou di e potret:

E lama di Amor…

Pasando den etapanan, nos ta bira parti di e misterio di bida…
Nos ta biba y sinja…e significacion berdadero di AMOR…
E esencia di ken nos TA di berdad…
Nos rason di SER… podise ta pa djis TA un gota di awa den e oceano di Bida…
Den e lama di Amor…
Y asina co-crea shelo riba tera…

– Ingrid

Cos leuk pa traha cu bo yiu pa carnaval.

Nos tur sa cu e momentonan mas dushi den famia ta ora nos por hasi cosnan hunto.

Tin cosnan leuk cu bo por traha hunto cu bo yiu pa carnaval cu ni mester costa placa, pero bo por traha cu material cu bo tin na cas. Wak ki tin na carton, flor artificial,

cos leuk pa traha cu bo yiu pa carnaval
Nos tur sa cu e momentonan mas dushi den famia ta ora nos por hasi cosnan hunto.

Tin cosnan leuk cu bo por traha hunto cu bo yiu pa carnaval cu ni mester costa placa, pero bo por traha cu material cu bo tin na cas. Wak ki tin na carton, flor artificial, lijm, revista, glitter, sinta y sker.
Laga e potretnan aki inspira bo y laga bo fantasia traha.
Mi ta desea bo hopi momentonan di felicidad y creatividad hunto cu bo yiu(nan).

E idioma profundo di silencio…

Silencio ta papia? Si, na momento cu nos ta cla p’e, nos lo por compronde e idioma profundo di silencio…silencio por bisa nos mas cu mil palabra…si nos ta scoge pa scuch’e! Les’e, bo lo gust’e!

silencio

Bo a scucha mi den mi momentonan di contemplacion…
Probablemente bo a sacudi bo cabes cada bes cu mi ta comete e mesun erornan atrobe…
Mi sa sigur cu bo ta compronde pakico ami ainda no ta compronde…
Mi a hasi bo hopi pregunta desde cu mi tabata un mucha ainda chiquito…
Y den transcurso di bida mi a sinja cu cada biaha cu mi kere cu mi a sinja casi tur cos…
Tin algo nobo pa mi sinja net eynan patras di porta…

Tanten mi a sinja pa busca algo mas cu sabiduria y palabra…
Mi a sinja pa busca e silencio…
Paso den e silencio…
Mi ta topa bo den tur bo simplesa…
Bo no tin necesidad na mustra bo grandesa pa impreshona…

Den bo amor inmenso mi ta mira tur e beyesa di e cosnan chiquito…
Cu tur dia bo ta manda mi pa alegra mi bida…
Bo ta papia cu mi den e silencio di e biento, e lama y naturalesa…
Y den e hari genuino di e muchanan chiquito cu semper ta corda mi…
Cu ta nan ta e herederonan di e dia di majan…
Den silencio Dios ta papia cu nos…

– Ingrid Werleman, 2011

Camacuri Residence ta presenta su projecto di ‘Camacuri Wellness Garden’

Desde cu sra. Francis Quandt-Bulters a bira manager di Camacuri Residence ela haja importante pa introduci un projecto di wellness na e residencia. Den su opinion e ta pas perfecto cu e concepto di Camacuri. Un complejo trankilo,berde, hopi ecologico cu ambiente intimo y familiar. E projecto aki lo tin su cas den ‘Camacuri Wellness Garden’. E projecto lo combina aspectonan di wellness, creatividad y sostenibilidad.

camacuri wellness gardenDesde cu sra. Francis Quandt-Bulters a bira manager di Camacuri Residence ela haja importante pa introduci un projecto di wellness na e residencia. Den su opinion e ta pas perfecto cu e concepto di Camacuri. Un complejo trankilo,berde, hopi ecologico cu ambiente intimo y familiar. E projecto aki lo tin su cas den ‘Camacuri Wellness Garden’ cu lo keda cla na December. E projecto lo combina aspectonan di wellness, creatividad y sostenibilidad. E combinacion di e tres elementonan aki ta un concepto unico pa Aruba. ‘Camacuri Wellness Garden’ tin un meta importante pa e bira un lugar di encuentro di hendenan cu ta apoya e filosofia describi.
Continue reading “Camacuri Residence ta presenta su projecto di ‘Camacuri Wellness Garden’”