Comunidad – Page 3 – Comprondiendo Bida

E morto di un hoben studiante y violencia cu ta jama mas violencia.

Mi no kier perde speransa den mi Aruba, dushi Tera, e isla cu a mira mi nace. E isla cu a inspirami pa pensa cu un dia nos por TA e ehempel di ‘un isla felis’.

Un hoben Canades, studiante di medicina na Aruba ta sali pa gosa y ta haja su morto a base di un discushon y golpi dor di e security di un nightclub. Na Aruba, mi dushi Tera. Un ehempel mas di violencia cu ta birando normal riba nos isla chikito? Kico nos lo conclui si nos analisa e bida nocturno riba nos isla? Nos ta tende e mesun tipo di reaccionnan ora algo similar pasa. ‘Hopi erg’. ‘Esaki no por’. ‘Castigo pisa mester cay’. Tur esaki, sin investiga si na nos isla chikito podise tin demasiado libertinaje den bida nocturno. Nos kier imita paisnan grandi sin mira si nos tin e infrastructura, mentalidad, regulacion, disciplina y etica di trabou necesario. Poder ta un cos peligroso ora e no ta sostene pa norma, balornan y reglanan cu ta pone tambe limitacionnan con leu un hende por jega cu su autoridad. Cu e cosnan aki ta pasa den paisnan grandi tambe? Sigur! E ora nos por puntra nos mes ‘unda nos kier bay cu nos progreso na Aruba?’. Puntra nos mes ‘kico nos ta considera normal’, ‘ki actitudnan nos ta dispuesto pa acepta y kico no’. ‘Con hopi nos kier inverti den training di comunicacion y enteraccion humano (people skills) di e hendenan cu nos ta tuma na trabou.

E nivel di servicio na Aruba no semper ta cuadra cu e imagen cu nos tin den exterior. E amabilidad y cariñosidad di e hendenan cu ta brinda servicio hopi biaha no ta esun cu a hasi Aruba famoso. Cheap labor, falta di training y crisis mundial sigur ta hunga un rol. Tur esaki lo keda mescos si nos no cuminsa pensa na un nivel mas cosmopolitano, pero manteniendo e karakter local. Un nivel cu por a evita e caso lamentable aki. Podise ta bon pa nos pensa cu excesonan di violencia lo por stop ora hendenan ta haja mas satisfaccion den nan trabou.

Ta mas sabi pa nos stimula un actitud cu nos t’ey pa sirbi otro, pa ta cordial cu otro. Ta sabi tambe pa sa mas di e poder di pensamento, cu ta sinja nos cu cos bon lo atrae mas cos bon. Nos lo no stop violencia cu un actitud di mas rigides. E hendenan cu tin poder, con chikito cu e por ta, lo tuma poder den nan man ora nan ta haja esaki necesario. Esaki ta e ley di selva, e instinto humano ora un sociedad no a sinja su hendenan pa biba segun balornan humano eleva. ‘No reaciona, pero entermedia pa situacionnan no escala’. Imagina bo un sociedad unda ta incentiva y duna ehempelnan noble. Unda ta educa y guia e hende pa e bira na prome lugar un bon ser humano. ‘Trata cada hende, manera abo kier ser trata’. ‘Imagina bo cu e tabata bo yiu, con bo lo a sinti?’. Esaki ta empatia of afinidad cu bo prohimo. Mi no kier perde speransa den mi Aruba, dushi Tera, e isla cu a mira mi nace. E isla cu a inspirami pa pensa cu un dia nos por TA e ehempel di ‘un isla felis’.

Ingrid Werleman, www.comprondiendobida.com

Cambia nos Comunidad cu bo Pensamento ta posibel.

E recorte di corant aki por pone nos puntra nos mes kico ta pasando den nos comunidad. Kico ta di mas y kico ta falta cu un hoben di 15 anja ta bay horta y destrui auto. E ta realisa kico esey ta nifica pa e donjo? E ta pa sport, necesidad of djis pa placer? Of podise e ta un forma di manda un mensahe na nos comunidad cu e kier atencion y stimacion?

E proximo articulo ta papia di un hende haja unda su curpa a casi putri ful caba. Niun hende a haja su falta? Kico ta pasando cu nos Aruba dushi tera, hopi hende ta puntra nan mes. Tin hopi cos cu ta bay robes, pero poco hende ta analisa y wak e tendencia unda nos ta bayendo. Y ta hopi normal, pasobra e lo obliga cada un di nos pa mira paden, den nan curason, nan cas y nan bida. Y esaki no ta necesariamente nan culpa.

Nos ta biba den un comunidad basa riba materialismo y consumerismo. Economia tin cu draai, tur hende kier gana mas tanto placa posibel a costo di kico y ken no ta mes importante pa tur hende. Traha pa gasta y haja mas cos. Idealismo? Kico esey ta? Cos pa hendenan cu ta zweef! No tin tempo pa nada. Bo yiu su rapport di Pasco a sali bon? E ta haja un iPad bou kerstboom! Ora e slaag pa bay Colegio, kico bo ta dun’e? Ah, un iPhone, di mes! Y despues?

Pero bo a corda di duna e mesun yiu ey un brasa y bis’e cu bo ta stim’e prome cu e la bay drumi? Bo a coregi’e dor di splik’e kico e la hasi fout? Offff, bo no tabatin tempo?

Poco poco nos ta creando un comunidad robotico, unda ta biba hunto den un cas, pero tin poco tempo pa entercambio humano. Den hopi famia no ta come hunto mas of ta sinta na mesa cada un ocupa cu su smartphone, e telefon sabi cu ta mata amor y calor (humano) pa otro. Y asina nos por sigi.

Tin un caminda bek? Si, den bo mente y curason. Y e bunitesa ta cu bo no tin nod’i predica, pero djis bay na bo curason y bo intencion. Kico ta bo deseo den su profunidad? Cada biaha cu bo por ripiti esaki pa bo mes, den e silencio di bo curason y intencion! Duna na bo sernan stima loke abo lo kier ricibi di nan. Manda e deseonan aki pa tur hende cu bo conoce. E cambio di un comunidad no ta sinta den mas represhon, pero si den mas intencion y amor. E ta cuminsa cu abo y ami! Purb’e y wak milagernan sosode den bo bida. Danki! Bo yiunan lo haja un bon ehempel riba cua nan por construi un bida felis majan!

Ohala tur partido gana eleccion

Si un partido ta keda den contacto cu su pueblo, no ta importa con chikito e por ta awe. E contacto aki por hasi’e grandi pa e proximo eleccion. Historia di Aruba mes a mustra nos cu partidonan cu awe ta chikito, den pasado tabata esunnan grandi. Y esunnan cu awe ta grandi a jega di ta esunnan chikito di pasado.

Majan Aruba ta bay vota pa su representantenan den Parlamento, e organo mas halto di nos pais. E partido cu haja mas voto tin e prome mandato pa forma un gobierno. Si esaki no logra, loke por sosode den cada democracia, e partido ta entrega e mandato bek na Gobernador y lo sigi pa e proximo partido cu tin mas tanto voto.

Nos por a mira un energia y creatividad hopi grandi den e campanja cu majan lo ta tras di lomba. Eigenlijk cada partido merece pa gana y asina mustra nan afinidad cu e pais cu asina tanto nan ta stima.

Ki ora cada partido ta gana? Ora nan no laga e temporada di campanja ta nan focus y periodo di comunicacion cu pueblo. Un partido ta grandi den su esencia ora e ta tene bienestar general di pueblo den cada decishon y prioridad cu e tuma. E rais y curason di un pais ta su hendenan. Si e pueblo ta progresa den su derechonan fundamental, e pais tambe ta progresa. Si e pueblo ta crece den su balor propio y amor pa su pais a base di e maneho di e gobierno y parlamento, esaki ta combini tur hende. E ta combini tambe tur partido.

Tin un dicho cu ta bisa ‘Conoce bo pasado, pa bo por scoge bo futuro’.

Bo voto ta un derecho, pero tambe un deber sagrado… e escogencia mester ta pa bienestar di Aruba, nos dushi pida baranca, nos Aruba Dushi Tera…

Honra pais Aruba cu bo voto…Ban Brasa nos Pais…

Comprondiendo Bida

Escogencianan den bida…

scoge no semper ta facil — cua direccion mi kier bay di berdad?

Tur momento den bida ta un momento di escogencia. Mi ta corda cu na un momento cu mi mester a tuma un decision determinante, un amigo a bisa mi algo cu semper a keda graba den mi mente.

Esta: ‘Corda cu tur loke un otro hende hasi bo, ta abo mes ta permiti pa sosode’. Pasobra como un ser humano bo tin e libertad pa scoge con pa reaciona riba cualkier asunto. Si un hende bisa bo un palabra pisa bo por scoge pa rabia of pa keda den bo propio balor sin sinti ningun ofensa. Y aki a cuminsa un proceso largo pa los mi mes di situacionnan indesea den mi bida.

Esaki ta momentonan cu nos tur ta haja nos mes aden den bida. Y nos tin cu scoge. Hopi biaha nos ta scoge sin pensa profundo riba e cosnan di balor di berdad. Kico e consecuencia di loke mi ta scoge ta pa mi mes, pa mi famia y mi pais? Kico e consecuancia lo ta aki 5, 10 of 20 anja? Bay paden un rato y reflecciona riba kico ta bo norma y balornan. Y laga esakinan ta e guia den loke bo ta scoge cada momento.

Bo por cambia bo mes dor di ta mas critico y observativo cu bo mes. Tambe pa decisionnan cu ta regarda bo famia y henter un comunidad. Gran parti di Mundo ta den un crisis di norma y balornan. Tin ora mi ta puntra mi mes si nos tin un les di sinja di e situacion aki.

Nos cada un por cuminsa hasi e diferencia….AWOR… ora nos scoge pa cosnan cu ta cuadra cu nos norma y balornan di mas halto den bida…

Bo a pensa di berdad, berdad kico eseynan ta?!….

Ruben y Julian, angelitonan di ken nos por sinja lesnan balioso pa juda muchanan na mundo.

‘Mi ta sigur cu nos por sinja algo di situacionnan tragico. Mi ta sigur cu no ta necesario cu muchanan mester muri pa causa di negligencia di instancianan cu lo mester tin bienestar di mucha na prome lugar’.

Ruben (9) y Julian (7), e morto di e rumannan aki a conmove Hulanda y mas aja di e fronteranan di e pais. Gruponan di boluntario mas grandi cu nunca a duna nan tempo cu e speransa pa haja e muchanan ainda na bida. 19 di mei ta haja e curpanan sin bida den awa. Una bes morto cay, ta mucho laat pa nos wak atras. Y ora nos bay investiga e judansa cu a pidi y no a haja, nos ta lamenta. For di investigacion a sali afor cu desde 2009, e instancia ‘Advies- en Meldpunt Kindermishandeling’ a constata cu e disunion entre e majornan ta causa violencia mental cerca e muchanan. Despues di divorcio esaki a bira tambe violencia fisico. Y toch hopi biaha a conclui cu e kehonan di e mama no tabata ’asina serio’. Na april 2013 esaki no a cambia. Den e 4 anjanan aki 10 instancia tabata involvi den e caso. Tabata referi e mama di un instancia pa otro. Y finalmente ora a dicidi di tuma pasonan drastico pa e seguridad di e 2 rumannan, e tata a comete suicidio riba e dia cu e mester a presenta pa discuti e pasonan cu lo bay tuma. E muchanan tabata bou su custodia e dia aki.

Ta surgi e pregunta cerca mi si instancianan cu t’ey pa duna asistencia social traha un tiki mas cu nan curason y menos cu nan cabes, e resultado por tabata diferente? …Kizas! Nos por sinja algo pa preveni mortonan inecesario?

Maske mi no ta trahando ya pa hopi anja den trabou social institucional, semper mi a keda hasi trabou social boluntario cerca hendenan cu bati na mi porta pa judansa. Pesey mi ta haja jammer cu no solamente na Hulanda, pero tambe na Aruba tin storianan con instancianan oficial no semper ta comunica suficiente profundo pa jega na un situacion cu ta beneficioso pa tur partido. Lastima cu hopi biaha ainda ta warda te ora un situacion escala pa enterveni. Na Aruba tin majornan cu a acudi pa judansa na instancianan oficial y ta haja como contesta cu mientras un mucha no ta problematico of hasi algo contra ley, e no ta bin na remarca pa judansa. Of mescos den caso di e rumannan aki no ta considera e keho basta serio. Mi ta corda mi contacto cu instancianan social pa asuntonan legal di familiarnan den pasado tabata uno amargo, sin atencion pa kico ta e interes di e muchanan involvi. Esaki no a cambia mucho si mi tende algun storia den e temponan aki. Na Aruba poco biaha hende ta sali pafo cu nan experencia, pasobra nan tin miedo di represaja.

Mi sa cu nos ta bibando den un tempo di crisis, pero ta importante pa nos pone mas atencion na e peligernan cu muchanan ta core dor di no haja e judansa adecuado. Hajando guia adecuado nos muchanan por florece tambe paso nan sa con pa sobresali maske nan ta biba den famia cu problemanan moderno. Si muchanan ta central di berdad, lo percura pa nan haja e miho cuido cu nan merece segun e decreto di derechonan di mucha. E derecho pa por crese sano y contento. (Derecho nr. 2: Oportunidad pa por desaroya optimalmente riba tereno cognitivo, fisico y social-emocional.)

Si nos muchanan ta na prome lugar, podise Ruben y Julian ainda lo tabata bibo. Cu Dios tuma nan den su Reino como angelitonan di ken nos por sinja lesnan balioso pa juda otro muchanan na mundo.

Pa mas info di e caso di Ruben y Julian, lesa:

http://www.nrc.nl/nieuws/2013/05/19/reconstructie-nrc-veiligheid-ruben-en-julian-al-vier-jaar-in-het-geding/

Buscando e balansa di e accidente mortal y asesinato den ultimo simannan.

Mas nos afirma e negativo, mas nos ta atrae. No duna scuridad mas forsa cu e tin di su mes. Mas nos ta entretene nos mes cu ne, mas e lo crese. Esaki ta ley di Universo. Nos forsa como hende ta juist pa haja forsa inspirativo bek den momentonan di conflicto. Ta aki e curason humano ta florece.

lus y scuridad — lus semper lo core e scuridad

Mas nos afirma e negativo, mas nos ta atrae. No duna scuridad mas forsa cu e tin di su mes. Mas nos ta entretene nos mes cu ne, mas e lo crese. Esaki ta ley di Universo.

Nos forsa como hende ta juist pa haja forsa inspirativo bek den momentonan di conflicto. Ta aki e curason humano ta florece.

Jammer, pasobra nos por sinja tambe di sabiduria. Pero hopi biaha hende ta bira comfortabel y ta lubida cu bida no ta esey so. Loke a pasa cu Hermin Wiels ta un expreshon mas di loke ta reinando na nos mundo. Hopi polarisacion y pensamento y deseo negativo.

Te dia nos para keto y cuminsa bolter e balansa cu nos pensamento y accion, nos lo por mira un cambio. Pero e ora di curason. E ora hendenan manera Hermin Wiels, Pim Fortuin, John Lennon, Martin Luther King, John f. Kennedy, Hesus y asina hopi mas lo no a muri por nada.

E ora nos sa cu cosnan malo por hiba nos na e curason di pas y amor cu ta hinca den cada un di nos

Aruba, no lag’e jega nunca asina leu y asesinato di sr. Wiels

Hopi trustu, kruel, lamentabel i bergonsoso e horibel asesinato di Sr. Helmin Wiels. Ta duna miedu, miedu di nos mes hendenan. Nos komunidat ta manera kos ku a bira siegu. Siegu i ignorante. Siegu pa òrden, siegu pa komprenshon i siegu pa positivismo. Hasta siegu pa e amor ku nos tin ku praktiká pa traha riba e futuro pa nos yunan, pa nos mes, i pa nos pais.

sr. Hermin Wiels... sosega na pas — sr. Hermin Wiels… sosega na pas

Ta asesina sr. Helmin Wiels cruelmente mientras e ta bay cumpra un soppi. Hopi hende ta den shock. Cosnan cu nos no ta spera mas den nos mundo civilisa. Y toch, nos mundo ta jen di violencia. Nos mundo ta jen di bondad tambe. Unda pa busca e solucion?

Un comentario di un amigoe aprecia di Corsow: Robert Coffie

Hopi trustu, kruel, lamentabel i bergonsoso e horibel asesinato di Sr. Helmin Wiels. Ta duna miedu, miedu di nos mes hendenan.

Nos komunidat ta manera kos ku a bira siegu. Siegu i ignorante. Siegu pa òrden, siegu pa komprenshon i siegu pa positivismo. Hasta siegu pa e amor ku nos tin ku praktiká pa traha riba e futuro pa nos yunan, pa nos mes, i pa nos pais.

E loke ku nos ta eksperensiando ta un futuro sin amor. Un futuro ku lo yega i desaroyá ku odio-propio.(en bes di amor-propio i amor pa nos pais)

Un emoshon di odio asina lo kaba ku bo, kimabo manera un pida karbon kayente. Ademas e emoshon aki lo lo no destruí bo so, e lo destruí bo komunidat kompleto.

Odio ta kousando hopi problema den mundu, i riba nos pida baranka Korsou tambe, pero te ainda mi no a ripará ku odio a resolvé niun di nos problemanan na drechi.

Tin biaha nos ta kere ku odio ta e arma pa ataká otronan. Pero odio ta un kuchú di dos banda, i e malu ku nos hasi na otro, nos ta hasi’e na nos mes , i sin duda na nos komunidat.
A yega ora pa nos para ketu i reflekshoná riba kon nos tin ku bai traha riba nos komunidat.

Mi komunidat ta mi famiya, e komunidat di e maestro(a)nan òf esnan den enseñansa ta nan alumnonan, e komunidat di esnan enkargá den deporte ta nan atletanan, komo doño òf lider di un empresa bo komunidat ta bo empleadonan. Siña nan i dunanan e ehèmpel kon pa ta un dushi hende, siña nan balor i normanan. I abo komo lider siña bo mes e kosnan aki promé.

Ban kuminsa awor i no laga pa aki un par di aña nos tin ku bisa KU NOS TABATA dushi hende.
Mi ta spera ku e siman aki nos por reflekshoná riba bondat i AMOR i ku lo reina pas duradero na Korsou.

robert coffie - trainer — robert coffie – trainer

Danki Robert pa permiti nos usa bo refleccion. Ohala cu hopi hende les’e y comparti’e bou nan amigonan. Y mas cu tur cos bib’e y bir’e! ~ Comprondiendo Bida

For di curason di un hende homber pa e ser muhe ‘Si, Bo Por’

‘Si, Bo Por’. Un articulo scirbi for di curason di un hende homber pa e ser muhe. Scirbi pa Robert Coffie, motivational trainer na Corsow. Mi a conoce Robert den tempo di Air Aruba, como station manager di Air Aruba na Corsow. Tur hende cu conoce Robert lo ta di acuerdo cu e ta un persona cu ta inspira y toca hende su curason pa su personalidad y sinceridad.

Scirbi pa Robert Coffie, motivational trainer na Corsow. Mi a conoce Robert den tempo di Air Aruba, como station manager di Air Aruba na Corsow. Tur hende cu conoce Robert lo ta di acuerdo cu e ta un persona cu ta inspira y toca hende su curason pa su personalidad y sinceridad. Un gran hende! Danki, Robert pa bo contribucion balioso!

Si, Bo Por!!! Yes, You Can!!!

Ta tuma tempu pa edifiká i/òf logra kosnan bon.
Pero mantené bo fe i bo vishon enfoká i keda konsistente. Si bo tin e kosnan ei, mesora e proseso di kreashon ta kuminsa.
Ku kada pensamentu, kreensia, palabra i akshon bo ta moviendo den e direkshon ku bo ke bai.
Sinti kon lo bo lo sinti . Antisipá i mira kon e situashon ku bo ke krea lo ta. Uza bo imaginashon i hinka bo mes totalmente den e eksperiensia ei.

Ku fe,i bo vishon i ta konsistente, tur kos ta posibel, hasta den situashonnan i tempu ekonómiko difísil tin oportunidatnan.

Sea ku bo ke mehorá bo salú. Kibra ku un adikshon, òf kibra ku un patronchi negativo di bo komportashon, of krea mihó relashon, BO POR HASI’E’. YES YOU CAN!!

Keda positivo i asosiá bo mes ku hendenan ku ta apoyábo inkondishonalmente. Uza bo energia bon i no kompartí bo soñonan òf bo deseonan mas íntimo ku hendenan negativo ku no ta apoyá bo bèrdat.

Sa ku tin un siklo i fluho natural pa tur kos den bida i den universo.
E flor lo sali bunita ora e ta kla pa sali.
Un yu lo kana na e momento korekto.
Amor lo yega na e momento perfekto.
I Dios lo yega i yuda na e momentu ku mas bo mester di dje.
Sa tambe, ku igualmente ku e bon ku abo ta buska, e bon ei tambe ta buskando abo.

Mantené bo mes habrí pa risibí e loke bo ke, keda positivo i e milager lo yega.

Si, Bo Por!!! Yes, You Can!!!

Natalie, di adicto pa modelo di speransa…

Natalie no tabata ‘djis’ un adicto mas, pero un ehempel cu semper tin un caminda pa un bida miho. Natalie, un bida cu a inspira…

Natalie, un bida cu a inspira…Mi a conoce Natalie hopi anja pasa, den anjanan 90. Caminda mi a conoce Natalie ta mescos cu hopi hende, como adicto riba caja, pidiendo placa pa cuminda. Buscando trabou di parti flyer pa e por haja poco placa. Natalie tabatin algo special, e tabata comparti su storia di bida. Natalie semper a bisami cu e kier a cambia su bida, pa por tin su yiu cerca dje, pero cu esaki ta asina dificil una bes cu bo drenta den e bida di droga. Natalie tabata conta di su dolor di bida, cu e sa cu e ta hasi su famia dolor, pero tambe di su amor pa hende. E ta conta semper aserca cu e no ta un mal hende, cu e ta stima hende. Mescos cu hopi hende tin ora mi ta dun’e placa of trabou pa parti flyer.

Natalie tabata e personahe riba e potret cu a gana e competenciadi potret ‘Nos hendenan’ na ocashon di 30 anja di Checkpoint Color. E scolnan a haja camara pa laga nan alumnonan saca un potret di nan gusto cu ta refleha amor of algo impresionante. Devah Leenheer tabata e mucha muhe di 12 anja den 6e klas cu a capta un momento den bida di Natalie cu di berdad, berdad a bisa mas cu un miyon palabra. Tabata un potret di Natalie para dilanti di un palo di lus ta come un ijscream. Patras di Natalie tabata mira e edificio di Royal Plaza. E potret a gana pasobra e tabata refleha un contrast asina grandi entre e desaroyo cu Aruba tabata pasando aden y un hende cu no por a haja su lugar den e rapides di desaroyo. Den wowonan di Natalie por a mira e bashi y tristesa di un ser humano cu no a haja su caminda den un mundo sano.

Hopi anja a pasa y mi a topa Natalie atrobe na un anochi di fiesta di Viva La Donna Day, un evento pa trese alegria y beyesa den bida di hendenan cu cancer. Mi a topa un Natalie cu a rehabilita y nos a hiba un bunita combersacion. Natalie a conta Edjean Semeleer y ami tocante su cancer, tocante su bida cu a cambia danki na Adopt an Addict Foundation. E ora a bira cla pa mi dicon semper mi a para y scucha Natalie. Natalie no tabata ‘djis’ un adicto mas, pero un ehempel cu semper tin un caminda pa un bida miho.

Natalie a duna contenido na su palabranan di kier un bida miho y Dios a pone e hendenan corecto riba su caminda pa jud’e. Natalie a cumpli cu loke por ta un mision grandi den bida, pa inspira otronan pa no tuma e caminda di droga. Natalie a modela na e Pink Runway, e iniciativa di Merveline Geerman cu a bira un evento nacional dor di e sosten di Mary Jo Foundation. Den comiensa di siman cancer a gana e bataja cu Natalie tabata bringando cu sosten di asina tanto hende cu ta admir’e y stim’e. E potret aki riba ta refleha pa mi un titulo cu mi a scirbi pa un otro articulo ‘Mi ta muhe, mi tin cancer y mi ta bunita…‘ Cu Natalie drumi dushi den brasa di nos Creador, cu pas y alegria companja su alma den e mundo spiritual.

E dulsura den bo propio curason

Amor ta tambe bisa hende ‘bondia’ ora bo topa nan, maske bo no conoce nan. Esaki ta bon custumber Arubiano. Bon dia, con ta bay, danki, un brasa, mi ta stima bo, mi por juda bo?

Topa e dulsura den bo propio curason…asina bo por haja e dulsura den cada curason! ~Rumi

Awe tabata ‘Dia di San Valentin’, un dia cu nos ta mustra nos amor y carinjo na hendenan cu ta rondona nos. Hopi hende ta demostra esaki cu regalo, un flor, un cena hunto.

Ayera nos por a mira cu un capa grandi di Groenland a smelt. Consecuencia di esaki lo ta cu e nivel di lamanan rond di mundo lo subi. Esaki ta bin dor cu e clima ta birando mas y mas cayente. Esaki ta puramente dor di actitud di e ser humano. Dia di Amor y Amistad por ta un dia tambe pa nos pensa riba nos amor pa e mundo unda nos ta biba.

Amor ta un palabra grandi… eigenlijk no un palabra, pero un actitud, un principio di bida.

Amor ta tambe bisa hende ‘bondia’ ora bo topa nan, maske bo no conoce nan. Esaki ta bon custumber Arubiano. Amor dor di cuida bo bestianan na un forma digno. Amor dor di respeta e derecho di e otro. Amor dor di e sonrisa riba bo cara ora mi cumpra den bo tienda. Bon dia, con ta bay, danki, un brasa, mi ta stima bo, mi por juda bo?

Eynan ‘Amor’ ta cuminsa… den e cosnan simpel di tur dia…y hunto nan ta resulta den un otro forma di mira bida…naturalesa y nos mundo!

Ohala tur dia ta dia San Valentin!