pensamento pa awe ‘cosnan di balor real’

loke mi ta hasi awe, con e ta afecta e majan di esunnan cu lo biba despues di ami?

pensando riba majan
pensando riba majan

den mi silencio
mi ta pensa
kico ta e cosnan
di balor real den bida

mi ta pensa
amor pa sirbi
bo prohimo
boluntad pa duna
amor

pensando riba majan
mi ta pensa
loke mi ta hasi
awe

con e ta afecta
e majan
di esunnan
cu lo biba
despues di ami?

Ingrid Werleman

Cosnan leuk pa traha cu bo yiu pa ‘Dia di Mama Tera’.

No pensa si mi ta tira e cup di plastic ey den lama no ta hasi nada, ta un so e ta. Imagina bo cuanto hende ta pensa mescos cu bo!

e futuro den bo man
e futuro den bo man

E futuro den bo man!

Tur dia mester ta ‘Dia di Mama Tera’, pasobra ta un planeta so nos tin te awo. Ora mi dal un niester duro na Aruba e por afecta e halanan di barbuleta cu ta saliendo di su cocoon? Ken sa con entreconecta bo ta cu net e barbuleta ey!

Importante den e reto pa laga un mundo atras unda nos yiunan y nan yiunan por tin un bon calidad di bida ta den nos man. Loke bo ta hasi of laga di hasi ta afecta bida den tur forma, grandi of chikito. No pensa si mi ta tira e cup di plastic ey den lama no ta hasi nada, ta un so e ta. Imagina bo cuanto hende ta pensa mescos cu bo!

Awe 2 link riba e website fabuloso cu asina tanto projecto creativo, www.pinterest.com

Gosa trahando den tera awe cu bo yiunan, susha bo man y sinti e tera, lab’e bek y traha cos leuk cu bo famia. Felis dia di…TERA!

http://www.pinterest.com/search/pins/?q=earth%20day%20art

http://www.tipjunkie.com/post/activities-for-earth-day/

Coram Deo, den presencia di Dios

Jesus lo ta cubo awoki, For di bo stimacion, Te na ora di bo absolucion

Cristo Rey
Cristo Rey

Animo mi bida

Animo mi amor

Awor cu ta e ora di devocion

Tene duro na bo honor y grita

Jesus ta mi Salbador

Canta e canto

Ora e oracion

Jesus lo ta cubo awoki

For di bo stimacion

Te na ora di bo absolucion

Anima bo curpa

Anima bo curason

Cu rosea cortico

Canta bo ultimo Credo

Resa e ultimo Oracion

Manera Jesus mes a sinja nos

Autor: A. Figaroa ©

Caminda e Amor pa Aruba ta cuminsa

Muchanan por trese mas integracion y harmonia riba nos Aruba, dushi tera. Unda nos ta respeta e norma- y balornan di Aruba.

Aruba, dushi tera
Aruba, dushi tera

Amor pa Aruba ta cuminsa den nos curason. Nos curason ta desperta ora nos ta sinti nos mes aprecia, dushi, comfortable y re-inforsa. Ora cu a focus riba desaroyo di turismo despues di ciere di LAGO, Aruba a bira e cas di hopi diferente nacionalidad, hendenan cu nan rais den otro pais. Hendenan cu a trese nan yiu biba na Aruba, otro cu nan yiunan a nace na Aruba. Muchanan cu sentimentonan mescos cu e muchanan cu ta bin di raisnan Arubiano. Muchanan cu nan seguridad- y inseguridadnan, alegria y tristesa. Un tempo muchanan di diferente nacionalidadnan tabata bin hunto den actividadnan creativo y educativo cu mi tabata organisa.

E bunita potret aki ta un refleho di diferente generacion cu ta biba na Aruba. E ta tambe refleho di e harmonia y aceptacion cu ta biba bou muchanan. Esey ta e espiritu cu hendenan grandi tambe por cultiva. Ta bon pa for di cas caba stimula muchanan pa hunga cu tur otro mucha, sin importa nan rasa of decendencia. Asina podise e muchanan por trese nan majornan mas hunto.

Mi ta spera cu di e forma aki poco nos trese mas integracion y harmonia riba nos Aruba, dushi tera. Unda nos ta respeta e norma- y balornan di Aruba. Y manera e muchanan inocente aki, sinta na un mesa, papiando e idioma cu ta uni nos, esta Papiamento. Trahando un bunita bandera di Aruba, un otro simbolo cu ta balioso pa stimula amor pa un pais, nan ta trese pas.

Ingrid Werleman

Amor y Amistad ta cuminsa cu Amor y Amistad pa bo mes.

Tribi di wak bo debilidadnan y traha na nan.

Amor y Amistad pa bo mes ta crea tera fertil pa un dushi relacion
Amor y Amistad pa bo mes ta crea tera fertil pa un dushi relacion

Felicidad tin hopi forma y hopi nomber.

Y nos tur ta en busca di felicidad den un forma of otro.

Hopi hende ta busc’e den un pareha.

Otro ta busc’e den trabou of den salimento.

Sabionan ta conseha pa nos no busc’e eyfo.

Tampoco busca e perfeccion cu bo ta busca den un otro.

Of den otro cos.

Bida ta perfectamente imperfecto.

Pesaki nos ta aki den mundo pa sinja?

Pa busca e perfeccion, na prome lugar den nos mes?

Busca e spiel di bo alma.

E honestidad den bo mes.

Unda bo por mehora of coregi bo mes?

Abo sa! Un otro no mester bisa bo!

Tribi di wak bo debilidadnan y traha na nan.

Eynan bo ta nutri felicidad, trankilidad y calidad di bo bida.

Amor y Amistad pa bo mes ta crea tera fertil pa un dushi relacion.

E ta start ey nan, den bo curason.

Pasa un dushi dia di Amor y Amistad.

Conociendo Betico y sinjando di dje…

E gana pa conoce e ‘hende’ Betico Croes miho tabata e base pa e articulo aki. Conociendo nos historia, nos por determina nos futuro.

conociendo Betico
conociendo Betico

Na lugar di core henter dia rond riba Dia di Betico, mainta mi a sinta wak e reportagenan di Betico Croes na television. Den e anjanan crucial pa Betico logra Status Aparte pa Aruba, mi tabata studiando y despues bibando na Hulanda pa 12 anja. E vakantienan di tur anja na Aruba no tabata suficiente pa por a sinti e proceso den carni y weso, alma y curason.  Pa e motibo aki ami ta sinja conoce Betico miho cada biaha cu mi mira atrobe mas di dje. Mi a wak un reportaje unda Betico tabata papia di su miedo pa Aruba perde su cultura, su norma y balornan si nos no haja Status Aparte. Den un discurso na 1975 Betico a bisa: ‘Nos kier e felicidad di nos criaturanan, nos kier salba Aruba, nos cultura, nos dignidad. Nos no kier pa niun otro pais bin caba cu nos cultura y cu nos dignidad. Aunke nos ta un pueblo chikito, nos ta stima nos isla.’

Mi a bin biba na Aruba bek na comienso di anjanan 80 y aki mi relacion como adulto cu Aruba a bira mas estrecho. Pero semper mi a keda cu un ‘pida desconoci’ (blind spot) den mi experencia di e proceso di comienso te final cu a logra e  Status Aparte di Aruba.

Madures di bida ta juda mi mira bida y hende na un forma diferente. Ora mi a scucha e palabranan di Betico cu mi a quote eyriba, mi a bira poco tristo pasobra e ta pone mi realisa con hopi Betico (podise) subconcientemente por a wak den futuro ora e la bisa e palabranan aki. E ta pone mi corda un expreshon cu mi a jega di scirbi den pasado. ‘Cu Status Aparte Aruba a bira un pais, pero nos no a logra bira un nashon’. Ta pone mi corda e mucha chikito cu ta pone e coy hunga un banda, despues cu e la haj’e. Ta un realidad hopi conoci den psycho analisis. Y ta interesante pa refleha di con niun hende berdaderamente por a sigi carga e causa di Betico cu e mesun dedicacion y fervor, maske con bon intencion nan tabata tin, algo di cua mi no ta duda. Pero ta exigi un vision y dedicacion hopi grandi pa por carga union di henter un pueblo. Esaki ta trese mi atrobe na e palabranan di Betico Croes na Ser’i Noka, na e homenahe cu e la haja un poco tempo prome cu e la haja accidente. Aki Betico a expresa di ta un tata particular: ‘Mi no ta un tata pa un famia chikito, pero un tata pa henter un pueblo’. E emocion cu a acompanja e palabranan aki di Betico a planta un simia den mi pa conoce e ‘hende’ Betico miho. Y awe, despues di hopi anja e articulo a nace a base di e deseo ey.

Podise ainda no ta laat pa nos realisa e sonjo di Betico, si Aruba henter uni pa scapa e cosnan autentico cu ta di nos. Nos bon custumbernan, nos amabilidad di curason, juda otro, paga lomba, amor patria. Traspasa loke ta di nos pa nos yiu y nietonan. No djis acepta tur loke ta bin di afo y hasi’e di nos. Stima loke nos por como pais chikito mas. Stima nos talento y cualidadnan como yiu di tera. Nos sa hopi, nos por hopi, podise nos no ta perfecto, pero nos por sostene otro mas y asina cada dia bira miho como ser humano y como pais. Nos por respeta otro mas y pidi respeta di otro pa loke nos ta bal. Danki Betico, esey pa mi ta e les di ‘Dia di Betico’ 2013. Y pa bo?

Amor pa Aruba

Sera conoci cu Ken Mangroelal. Filosofo, escritor, musico y su amor pa e pais unda e la nace—Aruba.

watapana poem by Ken 'Nos Mainta' - tv show
watapana poem by Ken
‘Nos Mainta’ – tv show

Watapana

B’a prefera destino
Pa haña rais aki
Y crece den e aliento persistente
Di un biento di Pasat

Sotabiento
B’a laga
strimline
Bo corona
Birando nos palo
Mas caracterisa

B’a duna e dibuhonan indjan nan color
Y nos paisahe su orguyo

Ma sigui bo destino
Pa nace aki tambe

~  Ken Mangroelal

Con abo ta celebra Dia di Amor y Amistad

Happy Valentine’s Day na TUR lesador di Comprondiendo Bida…
Realisa awe cu amor ta hopi mas cu amor pa nos pareja…

e lama di amor

Happy Valentine’s Day na TUR lesador di Comprondiendo Bida…
Realisa awe cu amor ta hopi mas cu amor pa nos pareja…
E ta podise mas necesario pa stima y manda amor pa esun cu menos ta stima bo…
Pa esun cu mas a herida bo…
Mi ta desea bo un dia jen di rikesa y amor…

Danki na mi modelonan pa e potret misterioso aki…
Un tata cu yiu cu no semper ta compronde otro…
Pero ta stima otro te hasta den e momentonan cu nan ta parse di hasi bida di otro un poco imposibel…
Love the 2 of u… you add meaning to my life…

E pensamento bou di e potret:

E lama di Amor…

Pasando den etapanan, nos ta bira parti di e misterio di bida…
Nos ta biba y sinja…e significacion berdadero di AMOR…
E esencia di ken nos TA di berdad…
Nos rason di SER… podise ta pa djis TA un gota di awa den e oceano di Bida…
Den e lama di Amor…
Y asina co-crea shelo riba tera…

– Ingrid

Honrando nos hendenan, Betico Croes

Ta bon pa nos duna honor na nos yiunan di Tera cu a duna di nan bida pa nos por ta unda nos ta awe… Riba ‘Dia di Betico’, ban honra Betico.

Betico Croes
Cu danki na Wikipedia den papiamento.

‘Ta bon pa nos duna honor na nos yiunan di Tera cu a duna di nan bida pa nos por ta unda nos ta awe… Riba ‘Dia di Betico’, ban honra Betico. -Ingrid’

Na 1972, a continua cu e proceso di decolonisacion y independencia inicia for di aña 40 na e conferencia na Surnam, na unda Betico Croes di partido MEP (Movimiento Electoral di Pueblo) a propone tambe un “sui-generis” Dutch Commonwealth di cuater pais y estado independiente miembro: Aruba, Hulanda, Surnam y Antia Hulandes, cada un cu su propio soberania y identidad nacional. Mr. C. Yarzagaray, representando e partido politico AVP (Arubaanse Volkspartij), a propone pa tene un referendum pa e pueblo mes dicidi su propio destino y a proclama cu: “Aruba hamas lo acepta un federacion ni un nacionalidad di segundo categoria”.

Betico Croes mesora a inicia na Aruba un campaña pa informa y prepara e pueblo di Aruba pa Aruba su independencia politico y un status aparte den un commonwealth Hulandes liber di tur resto di colonisacion. Na 1974 e Ministro di Structura Estatal a percura pa publica e “Witboek over de Status Aparte”, y na maart 1976, un comite nombra pa gobierno di Aruba a logra keda cla cu tur preparacion pa a introduci e bandera y himno nacional di Aruba como e dos simbolonan di Aruba su soberania y independencia, y hunto tambe a fiha 18 di maart 1981 como fecha pa Aruba su independencia como pais completamente separa y independiente cu un status aparte como estado miembro di un commonwealth nobo, moderno, bou di un statuut dor di cual lo a elimina pa semper e gran berguensa di tur e resto di dominio y poder colonial.

A sigui na maart 1977, cu e referendum (Aruba a ser obliga pa a yama e referendum aki un ‘encuesta’, pasobra pa ley Aruba no tawata permiti pa tene un referendum) pa e pueblo mes determina su futuro cu a ser teni cu e sosten di e Nacion Uni y 82% di e votadonan a scohe pa independencia: pa Aruba ta un pais riba su mes, y cu derecho di ta un estado miembro di un comonwealth nobo, moderno Hulandes, manera tawata e deseo di e pueblo ya for di añanan 40, pa Aruba iguala cu e otro cuater paisnan cada un como Estadonan di Miembro lo a obtene nan ‘status aparte’ eyden.

E gobierno di Aruba a asigna e ‘Instituut van Sociale Studies’ den Den Haag pa haci un estudio di Aruba su independencia, cu a wordo publica den 1978, cu e titlo “Aruba en Onafhankelijkheid, achtergronden, modaliteiten en mogelijkheden; een rapport in eerste aanleg”.

Na e conferencia di Den Haag den 1981, Aruba su independencia a wordo proponi na 1991. Den maart 1983, basa riba e Referendum, finalmente Aruba a haya un trato oficial den Reino, pa Aruba su decolonisacion y independencia, e prome pais birando den Reino Hulandes, cu su mesun costitucion, unanimamente aproba y proclama den augustus 1985, y despues di un eleccion teni den november pa Aruba su prome parlamento.

Aruba a separa for di Antia Hulandes y bira oficialmente un pais y e di tres miembro di estado den Reino Hulandes dia 1 di januari 1986, cu despues di 10 aña Aruba e ful independencia na aña 1996, y cu e abolicion di Reino Hulandes Bieu. Un miembro di estado nobo di e nobo Reino Hulandes como completamente nobo y moderno di Dutch Commonwealth, liber di tur dominio colonial.

E logro grandi aki ta danki na e United Nations Resolutions pa elimina colonialismo y tambe na Betico Croes y e steun politico di otro nacions manera Merca, Panama, Venezuela y varios pais Europeo. Croes tawata proclama e “Libertador di Aruba” despues di un accident tragico dia 31 december 1985 y a fayece den november 1986.

Dios

Pa Es cu ta kere den Dios, ningun explicacion ta necesario. Pa esnan cu no ta kere den Dios, ningun explicacion ta posible. – Autor: Desconoci (kizas ta Dios mes)

Mi ta marca bo number pa yamabo paso mi sa cu tur ora bo ta contesta pa scucha mi palabra. Bo number ta facil pa corda como cu…..

al figaroaAutor: A. Figaroa ©

Pa Es cu ta kere den Dios, ningun explicacion ta necesario. Pa esnan cu no ta kere den Dios, ningun explicacion ta posible.

Autor: Desconoci (kizas ta Dios mes)

Mi ta marca bo number pa yamabo paso mi sa cu tur ora bo ta contesta pa scucha mi palabra. Bo number ta facil pa corda como cu mi ta yamabo tur dia, si no ta pa agradeci, ta pa yamabo danki, pidibo conseho of pidi forsa pa otro. E unico yamada cu mi tin hasi ta cu mi man y mi bos. For di mi frenta na mi pecho y schouder pa schouder: “Na nomber di Tata di Yui y di Spirito Santo, Amen. Y bo sa ken mi ta haya na linea pa conte tur cos …?
Continue reading “Dios”