pensamento pa awe ‘Sea bo mes’

Un hende cu ta getrain pa discubri e cualidadnan autentico den un hende, lo sa di biaha ‘ken ta’ y ‘ken no ta.’

sea bo propio heroe
sea bo propio heroe

‘Sea bo mes’

Sea bo mes, con facil of dificil esaki ta? Ora nos papia di ‘Sea bo mes’ nos ta papia di bo autencidad. Loke di bo ta destaca como cualidad y personalidad. Pa bo haja sa esaki ta importante pa di chikito esunnan cerca di bo, mira bo como un ser cu mester discubri bida ainda. Pues cu bo mester di inspiracion, amor, cuido, pero tambe disciplina y orden y hopi guia. Guia cu ta pone bo mira mundo como un lugar unda bo ta safe y cu ta yuda nos discubri y scoge na un forma conciente, dor di duna tempo, atencion y informacion na nos. Esaki ta educacion conciente y balioso.
Una bes bo bira grandi, hendenan cu topa bo, lo discubri bo autencidad. Y esaki ta un punto cu por yuda bo pa logra bo metanan di bida. Bo no mester ataca otro pa bo luci. Bo grandesa lo luci atrabes di bo birtudnan y bo vishon riba bida. Esakinan ta cualidadnan di un hende madura. Loke hopi biaha ta busca den diferente funcionnan.
Un hende autentico ta para pa su opinion y no tin miedo di expres’e. Importante si ta, e forma con bo ta expresa bo opinion. E no mester ta a base di kibra un otro, pero pa comparti loke bo ta haja cu ta importante y pakico. Un hende cu ta getrain pa discubri e cualidadnan autentico den un hende, lo sa di biaha ‘ken ta’ y ‘ken no ta.’
Sinja bo yiu y otro mucha cu bo conoce con pa ta su mes, dor di ta e miho ehempel pa nan. Exito!

pensamento pa awe ‘cosnan di balor real’

loke mi ta hasi awe, con e ta afecta e majan di esunnan cu lo biba despues di ami?

pensando riba majan
pensando riba majan

den mi silencio
mi ta pensa
kico ta e cosnan
di balor real den bida

mi ta pensa
amor pa sirbi
bo prohimo
boluntad pa duna
amor

pensando riba majan
mi ta pensa
loke mi ta hasi
awe

con e ta afecta
e majan
di esunnan
cu lo biba
despues di ami?

Ingrid Werleman

Pensamento pa awe ‘Bo ta kere cu bo tin tur tempo’

Tur loke bo no regla na tempo lo persigi bo un dia. Y esaki por tuma bo hopi mas tempo pa drecha e asunto bek.

E problema ta cu bo ta kere cu bo tin tempo
E problema ta cu bo ta kere cu bo tin tempo

Tin hende ta bisa cu bo tin cu biba bida sin pensa riba majan.Bida ta sinja nos cu esaki no ta berdad. Tur loke bo no regla na tempo lo persigi bo un dia. Y esaki por tuma bo hopi mas tempo pa drecha e asunto bek.

Nos ta biba den un periodo cu tur cos ta bira mas complica cada dia. Di otro banda e forma di educa na cas y scol no semper a cambia. Nos comunidad y sistema di biba riba un isla chiquito no semper ta stimula bo pa pone tambe orden y disiplina den bida for di un edad jong. Y estudio ta mustra cu e prome 6 anjanan di un mucha pa gran parti ta set su norma y balornan y karakter cu ta bira su guia. Loke un mucha no sinja na chikito, e lo no usa na grandi. A menos cu e ta un hende hopi conciente. Dicon? Simpel, paso e no sa. Niun hende a bis’e. Ban inverti mas den lanta muchanan sabi y felis pa asina nan bira ciudadanonan responsabel y comprometi cu nan comunidad y mundo. Ban Tuma Tempo!

Djis Biba Bida

Ta zomer, na Hulanda, Y mi ta kinipi wowo, Cu bida.
Bida ta leuk!

gosa loke cu téy
gosa loke cu téy

Awe mi a realisa cu bida no mester ta asina pisa
Bida no ta nifica tampoco
cu mi mester compronde tur cos.

Tin ora biba ta nifica
djis scucha e palabranan
di otro hende
cu un mente habri

No husga
No sintimi ofendi
Djis scucha

y djis gosa di loke cu téy y tin!

E di cu mi
Bo ta basta grandi y sabi caba
Bay lesa algo mas light

Ach im mi ta un mucha atrobe
hungando den e wega di bida
Mi ta light
Mi ta lus
Cu ta brija di mi mes

Ta zomer, na Hulanda
Y mi ta kinipi wowo
Cu bida
Bida ta leuk!

Juli 21, 2015

60 y no regrets

Y di paden tin un stem cu ta bisa mi ‘Lo miho ainda tin cu bini.’ Y di esey mi tin sigur.

ingrid 60
ingrid 60

Un bon amigo a jega di bisa mi cu nos ta biba bida cu bista den futuro y nos ta compronde bida mirando atras. Pa mi, esaki ta sinti manera hopi berdad.
Sesenta anja tabata parse mi hopi bieuw tempo mi tabatin 20-30 anja. Awor cu mi a jeg’e, mi ta sinti mi sigur di mi mes y e escogencianan cu mi a hasi. Escogencianan a base di e libertad cu mi ta sinti. Libertad di wak atras riba mi bida y bisa mi mes ‘den cada situacion mi a hasi lo miho cu mi tabata por, bou di e circumstancianan cu mi tabata aden.’

E dushi di 60 ta cu mi por afford pa no tin pura, mi no tin mester di ansha mas. Mi a pone mi marcanan di pia y e pianan lo sigi cana nan propio caminda. Ki luho, porfin mi por permiti mi mes e luho pa ‘Tuma Tempo.’
Como hende, hopi biaha nos ta puntra nos mes, si nos a hasi e miho. Ami ta kere cu si. Nos por hasi solamente nos best. Pasobra nos no por scoge pa otronan, ni cuanto nos ta stima nan. A lo largo di bida mi a sinja pa laga hopi di mi sonjonan cay, mescos cu mi idealnan, pasobra hopi cos no ta den mi man. Mi mester a sinja laga bay y wak cosnan bay robes, mientras cu mi sa cu por a bay otro.

Mi a gradici pa mi logronan, ora mi a sinti cu mi por a hasi un diferencia den mi mesun bida, pero tambe di otronan. Dunando hopi di mi mes pa logra un pais, un mundo miho y metanan grandi, mi a sinja mas y mas cu e felicidad mas grandi tin ora ta den cosnan asina chikito manera un hende cu ta duna mi un brasa, pasobra e palabranan cu mi a bisa of scirbi a jud’e den su bida.
Of un mucha chikito cu ta corda e cosnan creativo cu nos a traha hunto, te hasta ora nan a bira mucha grandi caba.

Tambe mi a mira hopi oportunidadnan pasa bay, pa mi mes y pa otronan, talentonan cu nunca a florece. Bida ta escogencia. Mi a mira alegria y inhusticia, gratitud y envidia, inspiracion y weganan di poder.
Mi a admira e bunitesa di creacion y e danjo di mannan humano. Y mirando bek, mi a haja semper loke mi a pidi, conciente of inconcientemente. Maske no semper mi a realisa esey na e momento cu mi tabata ‘eynan’.

Mi ta corda cu desde un edad hopi jong mi a pone dos meta den mi bida. E prome ta cu mi kier laga atras un mundo miho cu mi a haja, pasobra mi kier pa mi yiu- y nietonan tambe tin un habitat pa nan biba. Di dos ta cu dia mi jega na fin di e caminata humano, mi por bisa mi mes cu tabata bale la pena pa biba.

Mi no sa si mi a logra e prome meta. Mi no ta hopi contento di e mundo cu nos ta bibando aden actualmente. Mucho guera, mucho violencia, mucho descordia, pero mi tin speransa riba un majan cu lo surgi un dia cu ta miho cu su ayera. Mi por bisa solamente cu mi a hasi mi best y mescos cu ami, mi a topa hopi otro hende cu ta hasiendo mescos y cu ta un inspiracion pa mi.

Asina mi ta jega na e di dos meta. Y mi conclushon ta ainda cu mi a biba un bida cu ta bale la pena. Pa mi mes, sin cu mi mester di e balorisacion di otro hende. Nos cada un tin nos balornan interno y esaki ta diferente pa cada un. Den mi opinion nos lo tin pas dia nos acepta esaki como berdad universal.

Mi ta agradecido na e projecto cu mas a marca mi bida ‘Comprondiendo Bida’ cu a start manera un experimento y a bira mi companjero fiel pa casi mita di e anjanan mi tras. A lo largo di tempo ‘Comprondiendo Bida’ a bira mi caminata y buskeda di contestanan di bida cu mi a comparti cu un publico mas grandi. Un proceso cu nunca ta caba. Cada stap lo hiba na e proximo y podise ta asina bida ta intenciona di ta. Un proceso, sin expectativa, ni lucro, ni luho. Un proceso cu ta hiba cada un di nos na nos mes. E esencia di ken nos ta…

Mi lo sigi hasi mi best, pero mas cu tur cos, sigi gosa cada minuut di mi caminata riba e planeta aki. Y di paden tin un stem cu ta bisa mi ‘Lo miho ainda tin cu bini.’ Y di esey mi tin sigur. Mi ta agradecido na Bida pa cada experencia, su dushi y su zuur. Nan a sinja mi pa aprecia y balora e persona principal den e storia di mi bida, esta ‘mi mes’.

Mi a sinja cu mundo ta sigi lora toch. Cu mi of sin mi.
Porfin mi a compronde e berdad grandi cu como hende, nos ta asina insignificante compara cu e Universo cu no tin fin.
Dushi! Mi tin mas tempo awo, pa mi mes, esta un luho asina balioso.
Esta dushi bida ta!

Mi ta o.k., abo tambe!

Pentecoste, dia di pone palabra den accion

Djis pa awe, hasi un accion di amor y caridad. Pa un hende, pa naturalesa, pa e mundo, pa Dios…

 

Pone accion den bo palabra awe...
Pone accion den bo palabra awe…

Awe ta dia di Pentecoste pa Cristiannan. E dia cu ta recorda cu un dia hopi anja pasa Spiritu Santo a baha cerca mama Maria y e apostelnan. Esaki tabata e  promesa cu Hesus a hasi na nan cu e lo no laga nan nan so despues cu e bolbe cerca su tata den shelo. E rol di Spiritu Santo ta uno pa inspira y juda hende duna contenido na e palabra di Dios cu nan ta kere aden. Ami a interpreta esaki como: ‘Awe ta dia di pone palabra den accion’.

Hopi biaha hende ta resa pa judansa, lubidando asina nan propio forsa y boluntad propio cu Dios a duna nan pa ‘hasi nan mes’. Ta berdad cu hasi no ta facil. Nos ta asina programa dor di e mundo cu ta rondona nos. Tin hende tin miedo di loke otro hende ta pensa di nan. Otronan ta asina complacente den nan personalidad cu nan ta biba pa  complace otro y no nan mes.

Di otro banda tin hopi forsa, sabiduria y crecemento den tuma bo propio decishon. Den sali pa loke bo ta kere aden. Esaki ta un caminda cu ta exigi refleccion y refocus continuo. No e caminda di mas facil. Mi no tin e contesta pa mi mes tampoco si e ta esun mas satisfactorio pa nos crecemento interno.

Awe ta un dia cu mi ta pensa hopi riba kico mi kier. Mi ta scroll riba mi pagina di Facebook y mi ta puntra mi mes si esey ta e caminda unda mi kier ta.

Mi silencio ta guia mi na un caminda. Mi no sa unda. Mi ta bisa  Spiritu Santo danki pa su inspiracion pa mi jega na e lugar cu ta hasi mi curpa, alma y espiritu felis.

Djis pa awe, hasi un accion di amor y caridad. Pa un hende, pa naturalesa, pa e mundo, pa Dios…

Felis Dia di Spiritu Santo pa bo!

 

 

E felicidad chiquito…

Ohala mas hende por realisa cu traha mas pa haja mas cos, no necesariamente lo hasi nos mas felis… como hende… nos no brasa nos television, ni nos BB, ni nos Facebook… nos por brasa otro hende… Ken abo a brasa awe?

ransley - xummer happy kids
ransley y xummer, muchanan felis...

Mi ta corda cu algun anja pasa mi a scirbi e articulo ‘Cuanto mi ta bal?’. Tabata un tempo meimei di mi buskeda pa mi contestanan di bida. Awe, mi sa con hopi mi ta bal, den mi mesun bista, sin importa kico otro hende ta pensa di mi. Tin mes tanto berdad cu tin hende riba mundo, pues e berdad lo cambia continuamente. Pa mi tambe. Mi ta di bishita cerca mi yiunan y mi nietonan na Hulanda. Y mi ta sinti felicidad den cosnan chiquito den e bida di tur dia, escogencianan personal. Mi ta encanta di sinta y combersa cu mi nietonan. Combersa di berdad, scucha otro, hasi cos loco cu otro, hari di e profundo di nos curason. Cosnan simpel, pero di un grandesa infinito. Mi nieto Ransley mester bira un clown dokter, pasobra tur caminda cu e jega e ta conquista curason di cada hende, grandi y chiquito… su ruman Xummer ta puro ternura y hunto nan ta entretene henter un publico…

 Mi ta bay bek den tempo y ta realisa con hopi mi tabata busca felicidad pafo di mi mes… con hopi mi tabata busca pa haja mi balor den e reconocimento cu otronan lo duna mi.  Awo mi ta realisa cu ami ta e unico fuente berdadero di mi felicidad dor di escogencianan cu mi ta hasi y e sentimentonan cu mi ta scoge. Biba den e e presente. Pensa bon di mi mes y di otronan. Dios ta puro amor, amor puro y si ami ta yiu di Dios ami tambe ta igual. Y mi ta scoge pa cambia e felicidad grandi pa e felicidad chiquito, unda di berdad e ta bal… podise ta den e chiquito, tin e felicidad grandi!!!

 Mi ta realisa cu ami ta di e generacion cu kier a trese cambionan grandi den e mundo cu mi ta biba aden, mas husticia social, mas conciencia pa cuida nos medio ambiente, rescata nos balornan sano, stimula un mente critico. Mi a dedica hopi ora na mi idealnan, mi tabatin menos tempo cu mi a desea pa pasa cu mi yiunan. Pero nunca ta laat, pa refocus.

 Mi a sinja hopi den e lunanan cu a pasa. Mi a contempla bida y contempla mi mes. Mi a sinja lesnan balioso, cu no a bin den mi bida por nada. Mi ta riba e caminda di e lus… no mas duda… awo mi sa, kico mi ta bal!!! Mi bal ‘Felicidad!’

 Ohala mas hende por realisa cu traha mas pa haja mas cos, no necesariamente lo hasi nos mas felis… como hende… nos no por brasa nos television, ni nos BB, ni nos Facebook… nos por brasa otro hende… Ken abo a brasa awe? 

Balor y lus….

Mi tin gan’i  core… duro duro…
Rumbo pa mi liberacion…
Los… los …los…
Los di mi rol di victima….
Radiante den mi propio gloria…
Los di mi pasado…
Los di e dolornan…
E complejonan di inferioridad…
Los di mi ansha y miedonan…
Leu…leu di nan tur…

Y cerca di e lus!

~ Ingrid Werleman, sept. 2010

 

Balor y lus….2

Awe mi ta radiante…

Briyando…

Den e lus…

~ Ingrid Werleman, juli 2012

 

Ashaira Holistic Centre cu lesnan di Karin Krügel pa bo crecemento spiritual

Anja 2012, e anja di cambio pa humanidad. Shelo tin hopi asistencia cu nan kier duna nos. Nos tin cu sinja conecta y habri pa ricibi. Pero mas cu tur cos, sinja pidi y respeta….

divine power

Please be informed on Karin Krügel’s follow-up lessons, which will take place according to the next schedule:

• 3rd of April: Man made in Gods image, Thought-forms, Character development, the purpose of Life, the Ultimate Destiny of Man
• 10th of April: The principle of Spirit, Spirit and the Principle of Gender, Reincarnation, Life and Death, Karma, Dharma
• 17th of April: The Unseen Reality of Angels, Guardian Angels, Angels of Healing, Examples of conscious co-operation with the realm of Angels
• 24th of April: The unseen Reality of Nature Spirits, the Four Elements of Earth, Water, Air and Fire, Man’s connection with the Elements of Nature, Conscious co-operation with the realm of Nature Spirits
• 2nd of May: Love: the Force!, Man’s super-sensory Powers, the Existence of a Path of Hastened Attainment, the Great Teachers of Wisdom and the existence of perfected man, the Power of Unity and Oneness of all Life, World Spirituality

Location: Layex building room 117.
Time: 7.30 to 9pm

We inform you that there is a fee involved in these lessons: fl. 100,– for the total of these five lessons. This is to help cover the expenses of the rent and beverages.

These follow-up lessons are open to those who have followed the two introductory lessons “Who am I” and “The Law of Cause and Effect”, either in October last year or in January this year. If you have been present at only one of the intro lessons and have a keen interest in the follow-up lessons, you are welcome to join. The same counts for those who through spiritual work or studies have an affinity to the subjects presented. The idea is to partake in all five lessons.
If you would like to participate please register with Thea van der Kuyp.

E-mail: ashairahc@gmail.com
Tel: 585 3759
Cel: 567 1086

E anochi di mas scur

Confrontacion y liberacion. Con hopi nan tin di hasi cu otro? Brasa bo sombra y habri camina pa lus…

anochi scur di mi alma

Mi lo kier haja balentia un dia
Y cana den anochi scur scur
Cu e scuridad di mas intenso cu ta existi
Pia abou y sin miedo
Cu wowo hancho habri
Y confronta tur mi sombra y mi karmanan
Di e bida aki y bidanan pasa

Mi kier topa boso cara cara
Y kima boso den e anochi di mas scur
Y manda boso pa semper pa e lus di pordon
Y di e forma aki keda liber
Y bira un alma sin historia

Un blaachi nobo y limpi
Den e historia di mi bida
Lo cuminsa y mi lo cana pa semper
Direccion di e lus
Y bula halto
Como un alma libera
Darma por fabor
Absolve mi karma
Guia mi pa e lus
Di mi propio escogencia
Y liber pa semper

Ingrid Werleman – Dec 28, 2011

Dios

Pa Es cu ta kere den Dios, ningun explicacion ta necesario. Pa esnan cu no ta kere den Dios, ningun explicacion ta posible. – Autor: Desconoci (kizas ta Dios mes)

Mi ta marca bo number pa yamabo paso mi sa cu tur ora bo ta contesta pa scucha mi palabra. Bo number ta facil pa corda como cu…..

al figaroaAutor: A. Figaroa ©

Pa Es cu ta kere den Dios, ningun explicacion ta necesario. Pa esnan cu no ta kere den Dios, ningun explicacion ta posible.

Autor: Desconoci (kizas ta Dios mes)

Mi ta marca bo number pa yamabo paso mi sa cu tur ora bo ta contesta pa scucha mi palabra. Bo number ta facil pa corda como cu mi ta yamabo tur dia, si no ta pa agradeci, ta pa yamabo danki, pidibo conseho of pidi forsa pa otro. E unico yamada cu mi tin hasi ta cu mi man y mi bos. For di mi frenta na mi pecho y schouder pa schouder: “Na nomber di Tata di Yui y di Spirito Santo, Amen. Y bo sa ken mi ta haya na linea pa conte tur cos …?
Continue reading “Dios”