Tribi di sonja lanta

E miho sonjonan ta esunnan cu bo ta sonja lanta!
Bo tabata sa?

Tribi di sonja lanta
Tribi di sonja lanta

Bo sa cu nan ta bisa cu e miho sonjonan ta esunnan cu bo ta sonja lanta, cu bo wowo habri.
Sera bo wowonan un rato asina y bay bek den e tempo cu bo tabata un mucha.
Pensa riba lo siguiente: ‘Kico bo kier a bira dia bo bira grandi?’
Bo a logra esaki? Pakico si of pakico no?
Awo habri bo wowonan y pensa pa bo mes, si ainda bo tin e mesun sonjo of deseo.
Kico bo lo kier hasi pa logra loke bo a sonja di dje y podise te hasta un tiki mas!

Scirbi nan pa bo mes den un schrift of notebook.
Repasa nan tur dia. Ki stap bo kier of por tuma awe?
Hasi’e sin miedo!

Y majan atrobe hasi e mesun ehercicio.
Y otro majan.
Y tur dia cu ta sigi.

E miho sonjonan ta esunnan cu bo ta sonja lanta!
Bo tabata sa?

Ban hunto hasi nos sonjonan pa nos bida realidad.
Tambe pa nos comunidad.
Y pa nos mundo!

Exito!
Bo mag comparti bo experencia cu e lesadornan di Comprondiendo Bida riba e pagina di Facebook.

Ingrid Werleman

Por ta cu preocupacion ta stroba bo soño…

Tempo ta pasa…con hopi a cambia den bo bida? Prome parti di un entrevista na 2010 cu Dr. Jaime Falconi, neurologo y psichiatra.
…Hopi hende ta drumi malo… nos sa cu tin hopi cos cu no ta klop den nos bida, pero nos no ta busca yudansa…nos ta prefera di wanta e berguensa y kibra nos cabes, keda sin drumi…

Jaime Falconi

Tempo ta pasa…con hopi a cambia den bo bida? Prome parti di un entrevista na 2010 cu Dr. Jaime Falconi, neurologo y psichiatra. Tanten dr. Falconi ta felismente penshona y ta duna su cooperacion riba peticion.

Dr. Jaime Falconi, neurologo y psichiatra Arubiano tin e tema aki como un punto di atencion grandi. E no ta solamente un problema serca hende grandi, pero pa hopi tempo caba e ta un fenomeno cu nos ta wak tambe serca hobennan y te hasta serca muchanan hopi chikito.

Di con?
• Pasobra nos custumbernan di biba a cambia, consecuentemente tambe nos ritmo di drumi.

Antes nos tabatin 2 of 3 canal di television. Awendia nos tin cable y dish cu un cantidad grandi di canal, 24 ora pa dia. Nos tin internet, ADSL 24 ora pa dia. Y….nos tin menos control di majornan kico nan yiunan ta hasi, ora cu lo mihor pa nan ta pa nan ta drumi. Mayornan ta traha warda, nan tin nan propio preocupacion y tempo a bira moderno. Muchanan tin hopi mas libertad cu antes, talves demasiado pa nan propio bienestar y felicidad.

• E constelacion di nos famianan a cambia. Nos tin hopi mas famia di un solo mayor. Esaki ta nifica mas obligacion riba lomba di un solo mayor. Pues tambe mas preocupacion. Mamanan cu ta lanta nan so cu nan yiu no ta un tarea facil, placa hopi bes no ta yega, yiunan ta mas rebelde. Y e mama na final di dia y prome cu e pega soño ta ocupa su mes cu e problemanan cu e mester soluciona mayan. E no tin hopi sosiego berdadero. Con bon e por drumi realmente e ora? Y bo por culp’e si e ta irita pa un periodo largo? Un situacion cu hopi biaha ta bira algo cronico, sin cu e mes ta realisa… E ta subi cama 12 or anochi, ta pega soño 1 pa 2 or madruga…Cuanto ora di soño un persona asina ta haya pa dia? Probablemente pa 5 of 6 or ya e mester ta ariba su pia pa prepara muchanan pa bay scol…

• E control social den nos comunidad a cambia. Nos ‘privacy’ ta sagrado, nos murayanan a bira hopi halto y nos no ta mete cu bida di otro. Di otro banda nos no ta preocupa cu otro mas tampoco… Ni nos ta duna otro un man asina hopi mas… Ni nos kier scucha conseho mas…nos sa cu tin hopi cos cu no ta klop den nos bida, pero nos ta prefera di wanta e berguensa y kibra nos cabes, keda sin drumi, cu busca yudansa…

• Consecuentemente nos ta cay den un circulo vicioso, cu nos curpa no ta haya e sosiego necesario…nos no ta drumi bon, nos no ta drumi suficiente y nos no ta funciona bon…pasobra nos curpa y mente no ta haya e chens pa recupera su mes… Nos mester di pildo pa drumi?

• Nos ta biba den un mundo yen di desordo. Nos kier hasi hopi cos, sali bay hopi caminda, nos kier cumpra hopi cos, nos yiunan kier hopi cos. Nos kier un television riba cada camber? Talves nos por cuminsa realisa cu tin un otro manera pa anda cu bida?

• Nos forma y orario di come a cambia. Nos ta come mucho laat, cu cuminda mucho vet. Si bo ta bay drumi cu un stoma yen, con bon esaki por juda bo pa drumi sosega?

(E ta sigi majan…)

E sonjo di Green Vibes…

Waiting…. for a miracle to come….

soppi di berdura local…no mas?

Mi no ta corda exactamente ki dia Green Vibes a habri su portanan. Mi sa cu su benida a hasi mi curason super contento. Porfin, un tienda dedica na fruta y berdura local y productonan cu por juda nos cada un sinja planta. Mas contento ora mi a jega e prome biaha y a topa tur e bakinan yen di tur sorto di berdura fresco. Mi a cumpra na smaak y a traha tur sorto di receta cu mi mes a inventa. Soppi di e berdura cu mi a cumpra, pasobra soppi di berdura semper ta smaak bon. Mi a traha veggie bitterbal, stoba di berdura y garbanzo. Ki contento mi tabata dia mi a topa cu e patianan chikito, mes chikito y dushi manera mi padushi Cojashi tabata planta den su cunucu.

Pero un dia mi a topa Ari, e donjo y e la conta mi di e contratiemponan cu e ta topa. Esta tristo con un hoben cu a hinca tur loke e tin y su alma den su pashon pa plantacion tin cu lucha pa por wanta cabes riba awa. Mi persona y otro cliente fiel tabata jud’e cu promocion via nos pagina di Facebook y palabra di boca.

Nos a keda bin bek, pero nos tambe tabata ripara cu e surtido tabata bira cada bes menos. pero toch nos a keda mantene speransa. Finalmente Ari a anuncia cu Green Vibes lo sera pa fin di april.

e delaster compra na Green Vibes?!

Esaki tabata mi e ultimo biaha cu mi a haja dushi milon local, pampuna di botter y tomati cu no ta smaak awa. Mescos cu ami, mas cliente fiel ta spera di por sigi haja fruta y berdura di The Landfarm cumpra na un otro forma, podise manera e groenteboernan antes tabata pasa bende den e becindadnan na Hulanda.

Nos ta spera riba un man cu por juda, un milager, algo, pero pa e dushi berdura y frutanan di Green Vibes por sigi jega den nos cushina… Nan ta pa cuminsa organico, non GMO y di nos propio suela y cultiva for di e pashon di un yiu di tera.

Nos ta spera….

Ingrid Werleman

Ayera nochi mi a sonja

Sonjonan ta duna nos hopi contesta riba nos bida. Cosnan cu nos a pasa aden. Escogencianan cu nos ta hasi…

sonjonan di inocencia
sonjonan di inocencia

Ayera nochi mi a sonja

Cu mi ta atrae den mi bida

Hendenan cu ta stima so

Mi a puntra mi mes dicon

Mi sonjo a contesta mi

‘Paso abo a sinja stima bo mes’

Di berdad…

Bo ta atrae unda bo ta

Cu bo mente y curason

~ Ingrid Werleman

April 18, 2013

Drumi dushi cu un ehercicio di relajacion

Tin hopi forma pa bo haja un dushi sonjo… Ata aki un tip balioso! Cu Danki na Victor Hunt.

drumi dushiE ehercicio aki bo por hasi ora bo ta bay drumi. Bo ta drumi riba bo cama cu bo curpa full plat y bo ta purba di tene henter bo curpa keto, pero tambe bo mente. Paga lus, drumi riba cama y sera bo wowo. Awor bo ta pone bo mannan na banda di bo curpa y bo planta di man poni p’ariba. Awor bo ta bay pone atencion riba cada parti di bo curpa. Pone tension prome pa despues laga los y relaha. Concentra prome riba bo pianan. Pone tension prome riba bo pianan pa despues laga los y relaha. Despues hasi mescos cu bo enkelnan, bo batata di pia, bo barica, lomba, mannan, schouder, nek y bo cabes. Awor wak si ainda bo ta sinti tension un caminda den bo curpa. Bay na e lugar aki y relaha bo mes. Concentra riba bo rosea y hasi un esfuerso pa relaha bo mes completamente. Awor cu tur tension a sali di bo curpa, bo por relaha bo mente tambe.
Continue reading “Drumi dushi cu un ehercicio di relajacion”

Ehercicionan contra Insomnia

Den dianan di fiesta di fin di anja, tin basta hende cu no ta drumi bon. Esaki por tin hopi motibo. Por ta nan a fiesta di mas of pa motibonan personal. Pa tur di nan un articulo cu tips con pa logra toch pa drumi un sonjo saludabel. Cu danki na Victor Hunt.

stress y insomniaPor ta ya caba bo a dal un dushi banjo of bo a lesa bo buki favorito of bo a resa, pero toch bo no por pega sonjo.
Tin hopi motibo pakico bo no ta drumi bon. Si bo a caba di pasa den un experencia traumatico y bo ta pasando den hopi emocion, ta masha normal cu bo no ta drumi bon. Pero pa majoria hende preocupacion ta e motibo principal pakico nan no ta drumi bon.

Podise bo no por hasi masha hopi na e problema mes, pero aki nan tin algun tips cu por traha pa bo:
1. Esaki ta un ehercicio leuk, pa bo hasi’e cu 2 hende. Busca un hende cu bo ta confia. Si bo no tin un hende cu bo por confia, realisa cu ta bon pa bo busca amistad cu bo por confia. Si ta necesario, busca judansa profesional. Sinta cara cara pa otro y pone un holoshi pa ring despues di mei ora. Abo ta cuminsa conta e otro persona tur loke ta molestia of preocupa bo. E otro persona ta scucha y tin tur atencion pa bo den e mei ora aki. E ta sacudi su cabes y ta scucha cu su curason, pero no ta duna mucho comentario. Despues di mei ora boso ta cambia e rol y abo ta scucha e otro cu mes tanto atencion. Bo por palabra pa hasi esaki un biaha pa siman of pa luna. E ta alivia!

Majan nos ta duna bo un otro ehercicio… corda bin bek!

Auto y sonjo y ken ta maneha e auto di bo bida

Hopi biaha nos ta laga un otro hende determina con nos mester ta, sin mira nos propio potencial. Nos auto ta kibra den dos y e ora numa nos ta corda cu nos mester a mantene mas miho… mescos ta conta pa nos mes! No warda te ora bo kibra den dos pa mantene bo mes. Realisa kico bo ta bal. ‘Esaki ta conta pa bo auto tambe’, Ricardo, donjo di C.A.R.S. ta bisa mi cu su sonrisa di semper.

Ad Cars Automall - ken ta core e auto di bo bida
Mi ta corda cu na un workshop tocante e nificacion di nos sonjonan, hopi hende tabata conta nan sonjo den cua un auto ta aparece. Un meneer a conta di un sonjo unda e auto ta kibra den dos, significando asina e kiebra cu tin den su bida na e momento ey. Un otro a conta di un auto cu ta cuminsa bula mescos cu avion. Ami a conta di un sonjo di un auto cu mi ta core aden, pero mi no sa di ken e ta… e pregunta tabata ‘ta ken ta stuur/maneha e auto di mi bida?’. Oeps…mi no sa, pasobra mi no sa di ken e auto ta…

Hopi biaha nos ta laga un otro hende determina con nos mester ta, sin mira nos propio potencial. Nos auto ta kibra den dos y e ora numa nos ta corda cu nos mester a manten’e mas miho… mescos ta conta pa nos mes! No warda te ora bo kibra den dos pa mantene bo mes. Realisa kico bo ta bal. ‘Esaki ta conta pa bo auto tambe’, Ricardo, donjo di C.A.R.S. ta bisa mi cu su sonrisa di semper.
Continue reading “Auto y sonjo y ken ta maneha e auto di bo bida”

Dr. Jaime Falconi: Pensando riba Sonjo

Na ocashon di presentacion di www.comprondiendobida.com dr. Jaime Falconi a papia riba ‘Bibando den temponan cu ta cambiando y pakico hopi hende no ta drumi bon’ a capta hopi atencion.

dr Jaime FalconiNa ocashon di presentacion di www.comprondiendobida.com dr. Jaime Falconi a papia riba ‘Bibando den temponan cu ta cambiando y pakico hopi hende no ta drumi bon’ a capta hopi atencion. E la mustra cu tin hopi preocupacion cerca hendenan y tin hopi soledad. Tin hende cu ta drumi poco ora pa dia of nan ta drumi pendiente di ki ora e jiu ta jega cas of di e problemanan di majan. Un sonjo asina no ta laga bo sosega y bo ta lanta mes cansa cu ora bo a bay drumi. Un hende mester di un sonjo profundo pa laga e curpa y mente sosega. Pesey ta importante pa bo entrega bo mes na e sonjo. Drumi cu lus no ta bon, e ta stroba e centro di bo sonjo. Problema cu sonjo na Aruba a crese pasobra Aruba ta manera un parke di lus anochi. Hende cu tin problema pa entrega nan mas na sonjo, por usa musica relajante, meditacion, yoga pa logra e sonjo cu ta duna descanso di berdad. Realisa cu un hende cu ta drumi mucho poco ta muri mas trempan. Esaki ta un realidad cu no por trese cambio den dje.
Continue reading “Dr. Jaime Falconi: Pensando riba Sonjo”