E sonjo di Green Vibes…

Waiting…. for a miracle to come….

soppi di berdura local…no mas?

Mi no ta corda exactamente ki dia Green Vibes a habri su portanan. Mi sa cu su benida a hasi mi curason super contento. Porfin, un tienda dedica na fruta y berdura local y productonan cu por juda nos cada un sinja planta. Mas contento ora mi a jega e prome biaha y a topa tur e bakinan yen di tur sorto di berdura fresco. Mi a cumpra na smaak y a traha tur sorto di receta cu mi mes a inventa. Soppi di e berdura cu mi a cumpra, pasobra soppi di berdura semper ta smaak bon. Mi a traha veggie bitterbal, stoba di berdura y garbanzo. Ki contento mi tabata dia mi a topa cu e patianan chikito, mes chikito y dushi manera mi padushi Cojashi tabata planta den su cunucu.

Pero un dia mi a topa Ari, e donjo y e la conta mi di e contratiemponan cu e ta topa. Esta tristo con un hoben cu a hinca tur loke e tin y su alma den su pashon pa plantacion tin cu lucha pa por wanta cabes riba awa. Mi persona y otro cliente fiel tabata jud’e cu promocion via nos pagina di Facebook y palabra di boca.

Nos a keda bin bek, pero nos tambe tabata ripara cu e surtido tabata bira cada bes menos. pero toch nos a keda mantene speransa. Finalmente Ari a anuncia cu Green Vibes lo sera pa fin di april.

e delaster compra na Green Vibes?!

Esaki tabata mi e ultimo biaha cu mi a haja dushi milon local, pampuna di botter y tomati cu no ta smaak awa. Mescos cu ami, mas cliente fiel ta spera di por sigi haja fruta y berdura di The Landfarm cumpra na un otro forma, podise manera e groenteboernan antes tabata pasa bende den e becindadnan na Hulanda.

Nos ta spera riba un man cu por juda, un milager, algo, pero pa e dushi berdura y frutanan di Green Vibes por sigi jega den nos cushina… Nan ta pa cuminsa organico, non GMO y di nos propio suela y cultiva for di e pashon di un yiu di tera.

Nos ta spera….

Ingrid Werleman

E morto di un hoben studiante y violencia cu ta jama mas violencia.

Mi no kier perde speransa den mi Aruba, dushi Tera, e isla cu a mira mi nace. E isla cu a inspirami pa pensa cu un dia nos por TA e ehempel di ‘un isla felis’.

media internacional

Un hoben Canades, studiante di medicina na Aruba ta sali pa gosa y ta haja su morto a base di un discushon y golpi dor di e security di un nightclub. Na Aruba, mi dushi Tera. Un ehempel mas di violencia cu ta birando normal riba nos isla chikito? Kico nos lo conclui si nos analisa e bida nocturno riba nos isla? Nos ta tende e mesun tipo di reaccionnan ora algo similar pasa. ‘Hopi erg’. ‘Esaki no por’. ‘Castigo pisa mester cay’. Tur esaki, sin investiga si na nos isla chikito podise tin demasiado libertinaje den bida nocturno. Nos kier imita paisnan grandi sin mira si nos tin e infrastructura, mentalidad, regulacion, disciplina y etica di trabou necesario. Poder ta un cos peligroso ora e no ta sostene pa norma, balornan y reglanan cu ta pone tambe limitacionnan con leu un hende por jega cu su autoridad. Cu e cosnan aki ta pasa den paisnan grandi tambe? Sigur! E ora nos por puntra nos mes ‘unda nos kier bay cu nos progreso na Aruba?’. Puntra nos mes ‘kico nos ta considera normal’, ‘ki actitudnan nos ta dispuesto pa acepta y kico no’.  ‘Con hopi nos kier inverti den training di comunicacion y enteraccion humano (people skills) di e hendenan cu nos ta tuma na trabou.

E nivel di servicio na Aruba no semper ta cuadra cu e imagen cu nos tin den exterior. E amabilidad y cariñosidad di e hendenan cu ta brinda servicio hopi biaha no ta esun cu a hasi Aruba famoso. Cheap labor, falta di training y crisis mundial sigur ta hunga un rol. Tur esaki lo keda mescos si nos no cuminsa pensa na un nivel mas cosmopolitano, pero manteniendo e karakter local.  Un nivel cu por a evita e caso lamentable aki. Podise ta bon pa nos pensa cu excesonan di violencia lo por stop ora hendenan ta haja mas satisfaccion den nan trabou.

Ta mas sabi pa nos stimula un actitud cu nos t’ey pa sirbi otro, pa ta cordial cu otro. Ta sabi tambe pa sa mas di e poder di pensamento,  cu ta sinja nos cu cos bon lo atrae mas cos bon.  Nos lo no stop violencia cu un actitud di mas rigides. E hendenan cu tin poder, con chikito cu e por ta, lo tuma poder den nan man ora nan ta haja esaki necesario. Esaki ta e ley di selva, e instinto humano ora un sociedad no a sinja su hendenan pa biba segun balornan humano eleva. ‘No reaciona, pero entermedia pa situacionnan no escala’.  Imagina bo un sociedad unda ta incentiva y duna ehempelnan noble.  Unda ta educa y guia e hende pa e bira na prome lugar un bon ser humano. ‘Trata cada hende, manera abo kier ser trata’. ‘Imagina bo cu e tabata bo yiu, con bo lo a sinti?’. Esaki ta empatia of afinidad cu bo prohimo. Mi no kier perde speransa den mi Aruba, dushi Tera, e isla cu a mira mi nace. E isla cu a inspirami pa pensa cu un dia nos por TA e ehempel di ‘un isla felis’.

Ingrid Werleman, www.comprondiendobida.com

 

E Arubiano Balente, un rasa cu no ta muri…

Tin hopi Arubiano Balente ta traha mas cu un trabou pa por juda nan famia. Yiunan cu ta jena saco den supermercado pa juda nan mama of tata sin trabou. Aruba ta jen di Arubiano Balente, un rasa cu no ta muri…

e arubiano balente‘Dia di Obrero’ na Aruba, un dia pa celebra e orguyo y satisfaccion cu nos tin den nos trabou. Mi kier refleha un tiki riba e forma con nos ta experencia trabou awendia. Tin ora sa tende reclamo di nos hendenan, specificamente e Arubiano original. Cu esaki mi ta compronde e Arubiano cu ta bin di majornan cu a nace na Aruba pa diferente generacion tras di otro.

Ta ser bisa cu ya e Arubiano, no ta mes balente cu antes. Esey tin hopi di hasi segun mi cu e forma cu bo kier wak bida. Mi ta kere e Arubiano no a bira menos balente. Mi ta kere cu e comunidad a cambia, mescos cu a sosode den hopi otro nacion y mirando e cualidadnan di e Arubiano, e la dicidi cu e kier move pa un otro tipo di trabou. Esaki a hasi cu a bin trabounan liber den ramonan pa cua mester a busca trahado di exterior.

Ora ta papia di e Arubiano Balente, ta importante pa determina den ki aspecto ta papia. Mi ta pensa bek cu ora mi a bay entiero di sra. Toya y mi a mira hopi Arubiano Balente. Sorry, Arubiano ‘Super’ Balente. Pa cuminsa mi ta corda e speech di e pastor hopi bon cu a papia di sra. Toya, pa hopi hende tambe mama Toya cu a dedica su bida na su fe, su Dios y su iglesia catolico. Mama Toya, naci na Corsow, pero pa mi un Arubiano ‘Super’ Balente. Mi ta corda tambe un senjora grandi sinta mi dilanti den misa, di baina e por cana, su lomba ta tur dobla, pero e tabata hasi su esfuerso pa lanta para, hinca rudia y a hasi su esfuerso pa bin duna su saludo final na sra. Toya. Otro Arubiano Balente.

Asina mi por sigi menciona hopi ehempel di ‘E muhe Arubiano Balente’ cu ta lora man na cas pa por cria nan yiunan. E yiu Arubiano Balente cu despues di su trabou, ta bay cas y cuida pa su mama malo. Tin hopi Arubiano Balente ta traha mas cu un trabou pa por juda nan famia. Yiunan cu ta jena saco den supermercado pa juda nan mama of tata sin trabou. Aruba ta jen di Arubiano Balente, un rasa cu no ta muri…

Cu cada dia di trabou ta jena cu satifaccion y honorabilidad pa tur hende cu stima Aruba…

Comprondiendo Bida cu workshop ‘Comprondiendo y Birando e Cambio den Bida’

Despues di e anochi ‘Pensando riba Bida’ durante cua a presenta e projecto ‘Comprondiendo Bida’ hopi hende a pidi pa organisa un actividad unda por profundisa mas riba e temanan cu a bin padilanti.
Esaki lo bira e workshop ‘Comprondiendo y Birando e Cambio den Bida’

e oradornan na workshop Comprondiendo BidaDespues di e anochi ‘Pensando riba Bida’ durante cua a presenta e projecto ‘Comprondiendo Bida’ hopi hende a pidi pa organisa un actividad unda por profundisa mas riba e temanan cu a bin padilanti. Pa e motibo aki lo organisa un workshop cu e tema ‘Comprondiendo y Birando e Cambio den Bida’.
E anochi aki lo concentra riba 3 tema cu ta ‘Amor, kico e ta?’, ‘Tips pa un sonjo saludable’ y ‘Cuminda y Calidad di Bida’. E prome tema ‘Amor, kico e ta?’ lo ta na encargo di Belquis Moreu y Ingrid Werleman. Lo trata amor como actitud basico den bida y atraves di historia di e ultimo 200 anja mira dicon nos a perde e coneccion cu nos tabatin cu bida den su totalidad.
Continue reading “Comprondiendo Bida cu workshop ‘Comprondiendo y Birando e Cambio den Bida’”

Spiritualidad y trabao…. Por combina…

drs. ing. Edsel Lopez, director PriceWaterHouseCoopers den Comprondiendo Bida, e revista edicion 2001 ta contesta riba e pregunta si Spiritualidad y trabao…. Por combina…

drs. ing. Edsel LopezParti di un entrevista cu drs. ing. Edsel Lopez, director PriceWaterHouseCoopers den Comprondiendo Bida, e revista edicion 2001

Spiritualidad y trabao…. Por combina…?`Claro cu si!’ segun Edsel. ‘E caminata aki a pone mi defini hopi bon pa mi mes kico spiritualidad por nifica pa mi trabou’. Edsel, cu ta director di e oficina di ‘PriceWaterHouseCoopers’ na Aruba ta bisa: ‘Na nos oficina mi ta haya importante pa traha na e ‘team spirit’. Den nos oficina mester tin como sifuera un bala di energia positivo ta circula tur ora. Esaki ta nifica cu nos lo traha ‘hunto’ na resolve tur situacion, tambe esunnan dificil.

Y Edsel ta kere firme den e expresion: ‘Bo ta atrae loque bo ta’, dor di esaki e ta kere cu semper bo lo haya bo den situacionnan y cu hendenan cu ta pas cu bo personalidad, cu e cosnan cu abo, ta proyecta den bo bida.
Continue reading “Spiritualidad y trabao…. Por combina…”

‘Zeven Bronnen van Arbeidsvreugde’

Resumen na hulandes di e workshop organisa pa Aruba Human Resources Association ‘Zeven Bronnen van Arbeidsvreugde’, facilita pa Johan Koop, coach certifica di e ‘zeven bronnen van arbeidsvreugde’ y gradua den maneho di personal na Universidad di Groningen.

Johan Koop - AHRA

Recientemente Aruba Human Resources Association a tene un workshop riba entre otro ‘Zeven Bronnen van Arbeidsvreugde’, e siete fuente di orguyo y placer den trabou. Esaki ta un concepto desaroya pa Kees Kouwenhoven cu tabata un senior consultant di PWHC y ken na cierto momento den su carera a sinti e necesidad pa busca kico por trese bek e aspectonan aki den trabou. A base di investigacion y pruebanan cientifco a desaroya e programa aki cu ta un exito na diferente paisnan rond mundo.

E workshop pa AHRA a ser facilita pa Johan Koop, coach certifica di e ‘zeven bronnen van arbeidsvreugde’ y gradua den maneho di personal na Universidad di Groningen.
Continue reading “‘Zeven Bronnen van Arbeidsvreugde’”

A.H.R.A. cu workshop interesante riba zeven bronnen van arbeidsvreugde

Aruba Human Resources Association cu workshop interesante riba ‘zeven bronnen van arbeidsvreugde’, e siete fuente di orguyo y placer den trabou.
Desde comienso di humanidad trabou a hunga un rol importante den bida di e ser humano. Trabou tabata un proceso hopi individual, si nos corda tempo cu trabou tabata un ofishi.

johan koop y roy winterdaal di AHRAAruba Human Resources Association cu workshop interesante riba ‘zeven bronnen van arbeidsvreugde’, e siete fuente di orguyo y placer den trabou.
Desde comienso di humanidad trabou a hunga un rol importante den bida di e ser humano. Trabou tabata un proceso hopi individual,  si nos  corda tempo cu trabou tabata un ofishi. Nos por corda cu nos a sinja tocante di  ‘gilde’, conoci pa nan dedicacion na nan ofishi. Esaki tabata tempo cu un hende tabata traha un holoshi di comienso te fin, pa menciona un ehempel. 

Continue reading “A.H.R.A. cu workshop interesante riba zeven bronnen van arbeidsvreugde”

Beauty with Style na januari cu estudio nobo pa pedicure special pa Aruba

Beauty with Style ta start na januari 2011 cu estudio nobo pa pedicure, basa riba e situacion y necesidadnan na Aruba… www.comprondiendobida.com

Beauty with Style ta start na januari 2011 cu estudio nobo pa pedicure, basa riba e situacion y necesidadnan na Aruba…

Un estudio cu Beauty with Style ta coordina ya pa algun aña ta e estudio pa pedicure.

Estudio di pedicure modelo nobo lo ta basa riba e situacion y necesidadnan na Aruba. Esaki pasobra na Aruba tin situacionnan cu ta hopi specifico pa nos isla. Pa e motibo aki ta invita tur hende interesa den e estudio di pedicure medico pa inscribi pa e estudio aki cu ta cuminsa na januari.

Martine Koeten, directora di Beauty with Style ta splica cu ainda hopi hende no sa e diferencia entre pedicure medico y pedicure cosmetico. Basicamente loke e competencia di un pedicurista  cosmetico ta pa corta y lak huñanan saludable, esta e cuido basico.

Continue reading “Beauty with Style na januari cu estudio nobo pa pedicure special pa Aruba”

Kico bo kier bira ora bo bira grandi? Juda bo yiu descubri su talentonan

What do you want to be when you grow up? Help your child choose a ‘happy’ profesion by Marisol Krosendijk, psychologist … www.comprondiendobida.com

Scirbi pa drs. Marisol Krosendijk, psicologa

Kico bo kier bira ora bo bira grandi? Esaki ta un pregunta cu muchanan ta haya nan mes confronta cun’e na scol of na cas. Hasta muchanan den scol basico ta haja  e pregunta aki. Pero en realidad ta resulta cu hopi tiki hende despues den nan bida ta bai kies pa e trabou cu nan tabata soña cun’e na chikito. Esaki ta si acaso nan por kies.

Aunke bida ta cambia cu tempo y soñonan tin biaha ta keda na un ilushon, toch ainda hopi mucha ta kies pa profesionnan cu ta basa ariba nan imaginacion: bombero, piloto, juffrouw, meneer, hungado profesional di futbol, dokter y hasta mermaid ta algun di e profesionnan mas cotisa.

Continue reading “Kico bo kier bira ora bo bira grandi? Juda bo yiu descubri su talentonan”

Biba sin stress? Crea balansa den bo bida…

How to live without stress? Create balance in your life…on www.comprondiendobida.com

Den bida tin hopi situacion cu por duna nos stress. Problema den famia, morto di un ser keri, divorcio, retiro di trabou, soledad, placa… Si abo tin stress corda pa tuma bo keho na serio. Pero mas importante tuma accion pa elimina e causanan…

Con? Planea tempo liber. Esaki ta ‘tempo pa bo mes… ABO’. Hasi cosnan cu abo ta haja leuk y cu ta relaha bo. Bay cana den mondi, bay lama, busca silencio… bay sinta na Alto Vista… loke ta pone bo sinti bon…

Stop di pensa cu abo ta responsabel pa felicidad di tur otro hende.

Stop di pensa cu tur cos lo fracasa si abo no hasi nada. Cu otro palabra, stop di carga mundo riba bo schouder…

Continue reading “Biba sin stress? Crea balansa den bo bida…”