Ora dolor di hende ta bira sensacion…

Un tata hoben a tira su pareha y mama di su yiu casi mortal. Nos isla parse ta biba di un hi-lite pa otro, pero no ta saca conclusionnan na nivel structural. Kico a bay robes?

amorUn tata hoben a tira su pareha y mama di su yiu casi mortal. Un tragedia cu ta duna espacio pa cada hende traha su propio version. Cada hende tin su propio splicacion. Poco ta lesa di e cosnan den comunidad cu ta hasi posibel pa hendenan cu un dia a stima otro por jega na e excesonan aki. Kico ta pasa den e cabes y curason di un hende ora e ta comete un acto asina? Poco ta lesa ki nos comunidad por sinja di un otro tragedia mas. Nos isla parse ta biba di un hi-lite pa otro, pero no ta saca conclusionnan na nivel structural. Kico a bay robes?

Na famia di Chaldira forsa, na Chaldira e forsa vital pa biba pa su yiu y como ser humano cu dignidad. Y na su pareha e sabidura pa refleha cu violencia nunca a trese solucion pa un problema.
Y na nos comunidad…laga nos sostene e famia cu nos pensamento y boluntad y unda cu nos por, planta un simia di bondad.

Unda nos kier bay como comunidad???


Den anjanan 1990 y pico mi tabata involvi den e projecto ‘Aruba, Vision 2005’. Un projecto pa haya opinion di comunidad, grandi y chiquito den ki direccion nan lo kier pa Aruba bay. E pregunta pa contesta tabata ‘con bo kier wak Aruba na 2005?’ Ora a jega na anja 2005 parse cu nos tabata mas leu di e vision aki cu tempo cu a hasi e pregunta.  E projecto ‘NosAruba 2025’ tabatin mesun meta. Pero atrobe, no a duna tanto balor na e bos di pueblo, un bos cu speransa di cada un cu a expresa nan opinion.

Hubentud semper ta paga e prijs…Nan lo cosecha…
loke e grandinan den comunidad a sembra…

Esaki ta lastima, paso nos hubentud merece miho. Nan no ta nos futuro, nan ta nan propio futuro. Pero e hermentnan cu nan tin ta loke nos ta laga atras pa nan. Pesey ta bon pa nos coy mas conciencia. Conciencia con nos ta biba… con nos ta papia… kico nos ta hasi…ki ehempel nos ta duna den cada rol di nos bida… No solamente como mayor, pero tambe como trahador, como doño di trabao, como maestro di scol, clero, trahado pa hubentud y asina por sigi menciona.

Nos muchanan tin e derecho di biba den un comunidad unda e bienestar general ta na prome lugar, no e ambicionnan personal di e adultonan. Como adulto nos mester bira mas  emocionalmente madura. E madures aki por guia nos pa hasi cosnan mas grandi cu nos mes. Pa no perde nos mes mas den actitud di un teenager cu apenas ta explorando mundo! A bira tempo pa nos lanta for di soño y actua cu nos intelecto, nos curason y nos sentido comun? Na honor di nos yiunan….y nan mayan… Un mayan cu ta di nan… Nos tarea ta pa sembra e bon simia… Abo ta cla???

Leave a Reply

Your email address will not be published. Required fields are marked *