Influencia di taboe riba comunidad – Drs. Piternella

Drs. W.R. Piternella…E influencia di ‘taboe’ riba nos bida.

Den bida diario masha poco nos ta para keto riba ‘taboenan’ cu ta rondona nos biba y cu tin su influencia riba esaki.  Si bo paga tino  bo ta ripara cu tin ‘taboenan’ cu ta hunga un papel den henter e comunidad, pero tambe  y tambe tin ‘taboenan’ cu gruponan, manera un famia of personal di un empresa,  y  individuonan ta crea pa nan mes.

Ki  ora nos ta papia di ‘taboe’?

‘Algo’ ta wordo considera como taboe ora  ta prohibi pa papia di dje, uz’e of haci algo cun’e.  Bo por puntra bo mes si tin motibo pa esaki.  E prohibicion aki no necesariamente ta nota un of otro caminda. Hopi biaha e ta mara na custumbernan cu ta pasa di generacion pa generacion. Tin motibonan pa esaki. E motibonan aki ta relaciona na miedo pa wordo confundi, of miedo cu esaki ta lanta sentimientonan of anhelo  cu no por wordo controla y cu por causa danjo  na e orden cu ta existi den comunidad.

Kico ta e funccion di e taboe?

Pues, e taboe tin un funccion importante: e ta regula nos comportacion ora ta trata di ‘algo’ cu ta prohibi pa wordo desmantela den e comunidad o den e mundo di un grupo of un individuo.

Bo ta ripara esaki den bida diario?

For di chikito muchanan ta haya tende, of ta ripara na comportacion di e adulto(nan) riba kico si of riba kico no ta permiti pa papia of pa uza of pa hasi. Alolargo e taboenan aki ta bai forma parti di e bida diario di e persona. Tuma, por ehempel, e topico di “sexualidad”.  No ta custumber cu ta papia libremente riba e topico aki. Loke mayoria biaha – door di mayoria persona – ta wordo  bisa di e topico mester cubri e preguntanan cu ta pidi e informacion concerni. Pero, ta resulta cu loke a wordo bisa no ta duna e informacion necesario na un manera comprendibel.  E custumber ta duna cu papia riba e topico por lanta curiosidad cu na su turno por lanta un anhelo, y…….. asina por sigui. E miedo ta existi e ora ey cu esaki por causa danjo na e persona, su famia y alolargo e comunidad. Asina tin mas temanan di bida cu ta taboe. Pensa riba, entre otro, euthanasia, abortus, malesanan mortal, handicap fysico of mental.

E mesun miedo aki pa expone locual pa x-motibo bo kier tene pa bo mes, un of mas persona, of den caso di un famia  expone esaki na otronan den comunidad ta forma un taboe cu ta keda dirigi e comportacion di esun of esnan concerni nan bida largo.

Por kibra e silencio?

E momento cu nos trata pa comprende pakico algo ta un taboe y trata na cambia esaki, nos ta kibrando e ideanan falso cu ta rondona e taboe aki. Pero, loke ta pasa di generacion pa generacion pa medio di custumber no ta facil pa cambia. Esaki lo tin di bai paso pa paso.  Den caso individual hopi biaha e taboe ta cai back riba ideanan erroneo cu e persona mes por a crea y e taboe ta wordo uza pa defende e balor propio di e persona (pa cual tin e miedo cu elo perd’e si eno mantene e taboe).

Aruba, 13 november 2010