8 di Maart y un mundo cu mesun derecho pa tur

Na caminda pa Maart 8, Dia Internacional di Hende Muhe: Nos tur tin un sonjo, pa tin un bida felis. Circumstancianan di bida por evita esaki. Y toch nos tur tin derecho di sigi sonja… e ta e unico forma cu un dia nos por jega mas cerca di nos sion:’Un mundo cu mesun derecho pa tur’…

hende muhe den lus
hende muhe den lus

Na caminda pa Maart 8, Dia Internacional di Hende Muhe:

Nos tur tin un sonjo, pa tin un bida felis. Circumstancianan di bida por evita esaki. Y toch nos tur tin derecho di sigi sonja… e ta e unico forma cu un dia nos por jega mas cerca di nos vision:’Un mundo cu mesun derecho pa tur’…

Den un comunidad ideal:

1         E famia ta central.

2         Tin oranan di trabou flexible y posibilidad di traha part time y traha for di cas.

3         Tin bon condicionnan di trabou secundario.

4         Tin training di personal riba contenido di trabou.

5         Tin training di personal riba desaroyo personal y calidad di bida (stress/wellness).

6         Tin judansa social cu ta tene cuenta cu e realidad di e trahado y ta traha na prevencion, na lugar di traha curativo. Esaki ta nifica cu ta warda pa problema escala prome cu duna judansa. E ora ta laat y ja danjonan ireparabel por a tuma lugar cu tin ora no por cura mas, cu tur bon intencion di mundo.

7         Tin un bon structura di coperacion bou habitantenan y judansa di instancianan social y educativo den bario cu ta sali for di e necesidadnan di e habitantenan mes.

8         Ta stimula hendenan muhe pa copera cu otro y si ta necesario traha den forma di coperativa.

9         Ta duna informacion y educacion na majornan con pa lanta nan jiunan segun e declaracion internacional di derechonan humano y derechonan di mucha.

10     Ta stimula un mente critico y asertivo cerca e hende muhe cu hopi biaha ta cabes di famia. Asina e por educa su jiunan di chikito pa sa nan derecho y ta evita manipulacion di instancianan y personanan individual.

11     Poniendo e hende muhe central den desaroyo di un pais ta e unico forma pa un dia jega mas cerca di e ideal pa bira ehempel pa mundo.

12     Ta honra no solamente e hende muhe cua bira exitoso dor di un carera briyante, pero tambe e hende muhe cu a lanta su hopi yiunan su so fregando vloernan di otro hende, lorando man cu bolo y snacks y bibando di un suma minimo di asistencia social. Tambe e grupo grandi di hende muhe cu ta juda otro den silencio, ta resa y pidi pa otro den silencio. Hende muhe ta e curason cu ta laga nos sociedad briya y vibra.

Cu honor y Dignidad pa tur muhe

Ingrid Werleman

 

 

 

Natalie, di adicto pa modelo di speransa…

Natalie no tabata ‘djis’ un adicto mas, pero un ehempel cu semper tin un caminda pa un bida miho. Natalie, un bida cu a inspira…

Natalie, di adicto pa modelo di speransa...
Natalie, di adicto pa modelo di speransa…

Natalie, un bida cu a inspira…Mi a conoce Natalie hopi anja pasa, den anjanan 90. Caminda mi a conoce Natalie ta mescos cu hopi hende, como adicto riba caja, pidiendo placa pa cuminda. Buscando trabou di parti flyer pa e por haja poco placa. Natalie tabatin algo special, e tabata comparti su storia di bida. Natalie semper a bisami cu e kier a cambia su bida, pa por tin su yiu cerca dje, pero cu esaki ta asina dificil una bes cu bo drenta den e bida di droga. Natalie tabata conta di su dolor di bida, cu e sa cu e ta hasi su famia dolor, pero tambe di su amor pa hende. E ta conta semper aserca cu e no ta un mal hende, cu e ta stima hende. Mescos cu hopi hende tin ora mi ta dun’e placa of trabou pa parti flyer.

Natalie tabata e personahe riba e potret cu a gana e competenciadi potret ‘Nos hendenan’ na ocashon di 30 anja di Checkpoint Color. E scolnan a haja camara pa laga nan alumnonan saca un potret di nan gusto cu ta refleha amor of algo impresionante. Devah Leenheer tabata e mucha muhe di 12 anja den 6e klas cu a capta un momento den bida di Natalie cu di berdad, berdad a bisa mas cu un miyon palabra. Tabata un potret di Natalie para dilanti di un palo di lus ta come un ijscream. Patras di Natalie tabata mira e edificio di Royal Plaza. E potret a gana pasobra e tabata refleha un contrast asina grandi entre e desaroyo cu Aruba tabata pasando aden y un hende cu no por a haja su lugar den e rapides di desaroyo. Den wowonan di Natalie por a mira e bashi y tristesa di un ser humano cu no a haja su caminda den un mundo sano.

Hopi anja a pasa y mi a topa Natalie atrobe na un anochi di fiesta di Viva La Donna Day, un evento pa trese alegria y beyesa den bida di hendenan cu cancer. Mi a topa un Natalie cu a rehabilita y nos a hiba un bunita combersacion. Natalie a conta Edjean Semeleer y ami tocante su cancer, tocante su bida cu a cambia danki na Adopt an Addict Foundation. E ora a bira cla pa mi dicon semper mi a para y scucha Natalie. Natalie no tabata ‘djis’ un adicto mas, pero un ehempel cu semper tin un caminda pa un bida miho.

Natalie a duna contenido na su palabranan di kier un bida miho y Dios a pone e hendenan corecto riba su caminda pa jud’e. Natalie a cumpli cu loke por ta un mision grandi den bida, pa inspira otronan pa no tuma e caminda di droga. Natalie a modela na e Pink Runway, e iniciativa di Merveline Geerman cu a bira un evento nacional dor di e sosten di Mary Jo Foundation. Den comiensa di siman cancer a gana e bataja cu Natalie tabata bringando cu sosten di asina tanto hende cu ta admir’e y stim’e. E potret aki riba ta refleha pa mi un titulo cu mi a scirbi pa un otro articulo ‘Mi ta muhe, mi tin cancer y mi ta bunita…‘ Cu Natalie drumi dushi den brasa di nos Creador, cu pas y alegria companja su alma den e mundo spiritual.

E dulsura den bo propio curason

Amor ta tambe bisa hende ‘bondia’ ora bo topa nan, maske bo no conoce nan. Esaki ta bon custumber Arubiano. Bon dia, con ta bay, danki, un brasa, mi ta stima bo, mi por juda bo?

dulsura den bo curason
dulsura den bo curason

Topa e dulsura den bo propio curason…asina bo por haja e dulsura den cada curason! ~Rumi

Awe tabata ‘Dia di San Valentin’, un dia cu nos ta mustra nos amor y carinjo na hendenan cu ta rondona nos. Hopi hende ta demostra esaki cu regalo, un flor, un cena hunto.

Ayera nos por a mira cu un capa grandi di Groenland a smelt. Consecuencia di esaki lo ta cu e nivel di lamanan rond di mundo lo subi. Esaki ta bin dor cu e clima ta birando mas y mas cayente. Esaki ta puramente dor di actitud di e ser humano. Dia di Amor y Amistad por ta un dia tambe pa nos pensa riba nos amor pa e mundo unda nos ta biba.

Amor ta un palabra grandi… eigenlijk no un palabra, pero un actitud, un principio di bida.

Amor ta tambe bisa hende ‘bondia’ ora bo topa nan, maske bo no conoce nan. Esaki ta bon custumber Arubiano. Amor dor di cuida bo bestianan na un forma digno. Amor dor di respeta e derecho di e otro. Amor dor di e sonrisa riba bo cara ora mi cumpra den bo tienda. Bon dia, con ta bay, danki, un brasa, mi ta stima bo, mi por juda bo?

Eynan ‘Amor’ ta cuminsa… den e cosnan simpel di tur dia…y hunto nan ta resulta den un otro forma di mira bida…naturalesa y nos mundo!

Ohala tur dia ta dia San Valentin!

Kita cansancio di Carnaval cu un dushi masashi cu 10% di descuento

Indira Skincare ta join Comprondiendo Bida pa juda bo kita cansancio di Carnaval cu 10% di descuento! Ta dushi ora bo caba di cana, baila y gosa Carnaval pa tuma un dushi masashi

kita cansancio Special pa Dialuna fb
Love your Body

Indira Skincare ta join Comprondiendo Bida pa juda bo kita cansancio di Carnaval cu 10% di descuento! Ta dushi ora bo caba di cana, baila y gosa Carnaval pa tuma un dushi masashi cu ta juda bo relaha pa cuminsa e siman di trabou fit fit atrobe. Special pa hasi esaki posibel Indira Skincare ta join Comprondiendo Bida pa ofrece bo un dushi masashi cu ta relaha bo di cabes te pia. Pasobra Carnaval ta laga ful bo curpa bon cansa!

E special aki ta conta pa dialuna despues di Carnaval Grandi. Pero si bo no por bin riba dialuna, bo por jama pa book e pa un otro dia den siman.

Jama pa Book 584 6263 of 593 4821. Indira Skincare  ta situa na Savaneta 91, net pariba di Winter Garden Supermarket. Y corda bisa cu bo a haja sa via Comprondiendo Bida pa haja bo 10%!

Stima bo curpa na un forma positivo… dun’e un dushi masashi!

Rikesa den simplesa. Ayo, tante Gerda.

Ayo, Amiga Gerda
Ayo, Amiga Gerda

Hopi curasonnan na Aruba a keda den shock cu e noticia di bo traspaso pa e mundo spiritual, Gerda. ‘Tante Gerda, na unda bo ta?

Tante Gerda a inspira hopi mucha desde comienso di Tele Aruba cu su programa pa mucha. Tante Gerda, Gerda de Groot, amiga cu tabata tey semper pa hopi hende. Gerda, un persona cu semper ta impresiona cu su presencia y aparencia. Un dama cu clase y curason di oro. Semper cu un smile riba su cara. Semper dispuesto pa juda den hopi organisacion y den hopi funcion. Dunando di su hopi talento sin pidi nada bek.

‘Tante Gerda, na unda bo ta? Bo a bay pa sigi hasi muchanan felis den shelo? Bo a bay pa papia cu e muchanan tocante amor, mescos cu bo a hasi, tante Gerda, aki na mundo di hende?. Bo a bay pa conta e hendenan den shelo con bunita Aruba ta y con hopi bo ta stima Aruba? Con special bo ta haja Aruba? Tocante historia di Aruba, e pais cu abo a scoge como e pais di bo curason.

Bo a bay pa conta e mucha y adultonan tocante e grandesa di nos Universo y cu nos tur ta uni? Bo a bay pa comparti bo amor pa naturalesa cu e hendenan den shelo? Splica nan e importancia di Amistad? E importancia pa ta lief pa otro y pa e bestianan cu ta rond di nos…

Bo a bay pa splica pakico ta importante pa ta semper representable y hasi cada trabou cu dedicacion? Bo ta papia na radio y ta presenta ‘E Bon Noticia’ caminda cu bo ta?
Tur esakinan ta talento, cualidadnan y birtudnan cu hopi di nos a experencia y sinti cerca bo.

Danki pa hasi e mundo aki mas felis y mas bunita. Cana dushi den e Universo cu tanto bo ta stima, bula halto den e mundo sin limite, plama amor, medita hopi, sigi sinja, sinja nos, drumi dushi, amiga… Ajo, tante Gerda…bo ta keda pa semper den Aruba su nos curason.