1. Scoge algun tema pa traha na dje den e anja nobo…. No hasi mucho proposito, paso hopi biaha bo no ta corda nan tur y bo ta lubida di traha na nan. Pesey e ora miho bo scoge un tema central… por ehempel… bo kier biba mas saludable of bo ta traha mas tempo pa famia. Si bo tin e tema defini, ta mas facil pa cada biaha bo keda corda riba dje. Pone e tema riba un pida papel y peg’e na lugarnan cu bo ta bay hopi. Band’i bo spiel, riba frigidaire, den banjo, kamber, etc.
2. Prepara bo mes pa re-programa bo curpa y mente…. Despues di tur e dianan di fiesta, prepara bo mes pa detox bo curpa un poco, comiendo soppi y salada despues di 1 januari.
Purba come saludabel, stop di huma, usa menos alcohol posibel. Corda cu Carnaval ta den porta atrobe. Hasi ehercicio y tuma momentonan di silencio. Si por medita un poco. Duna bo curpa y mente chens pa bin bek den balansa sano y dushi.
Nos ta biba den un mundo yen di desorden y toch hopi biaha ta asina dushi pa nos busca e silencio… e silencio ta trankilisa y ta crea energia nobo. Di otro banda den nos mundo di desorden, silencio por ta tambe un enemigo grandi. Silencio ta libera mes tanto cu e por hinca nos den su prison. Silencio ta bira un prison ora nos no por papia riba cosnan cu ta molestia nos of ta hasi nos dolor. Silencio ta ruman di secreto y yiu di taboe. Silencio ta stroba palabranan di sali, paso e ta hasi oreanan di un otro dolor. E ta un di e cosnan cu mas ta danja relacionnan, den ki forma cu ta. ‘Mi no kier tende,’ ‘no ta berdad’, ‘bo ta ganja ‘, ‘mi no kier sa’, ‘awo ki no’ y asina ta sigi hui pa berdadnan cu no ta nace nunca paso nos no ta tribi di cana den e sapato di e otro y purba sinti su dolor.