Mi a tuma off un par siman pa pensa kico ta pone mi sinti mi ful bon y oke cu mi mes. Un proceso di busca, para keto, keda den silencio, pensa, no pensa…sinti, no sinti…
Sinti kico? Combersa cu hende… hasi nada… puntra opinion. Pero eigenlijk pakico? Generalmente mi ta hasi toch loke ta sinti miho.
Ta laat den madruga. Mal tempo ta cuminsa bati pafo, strena y lamper. Mi ta sinti mescos cu shelo ta habri pa pone mi sinti cu porfin mi a jega (un biaha mas) na e conclushon cu e unico sentido di bida ta pa bin aki na mundo pa pasa un experencia. Un experencia kico ta nifica pa ta na bida, pa TIN bida. Tur e cosnan grandi y importante cu mi kier a hasi con hopi balor di berdad nan lo tin? Hende ta scoge cada un su destino toch. Esey ta conta pa ami tambe. Hende cu conoce mi bon ta bisa mi cu semper mi ta dirigi mi accionnan riba otro hende y no riba mi mes. Mi ta pensa mucho riba otro hende…nan ta haja cu un dia mester jega pa mi cuminsa pensa mas riba mi mes. Berdad? Kico ta mi felicidad personal?
Busca felicidad segun mi ta nos meta principal den bida. Tur hende ta busc’e. Pero podise esey ta e meta di bida? Djis busca? Djis experencia e buskeda, e caminda… manera e muchanan chikito cu ta cana y ta paga tino na cada detaye chikito… Poco poco sinja pone orden den bida y sigi cana e caminda… Discubri nos talento y hasi algo cune, sin duna mucho atencion na ajera ni majan… biba awe… pasobra toch nos sa cu bida ta djis pa tin e experencia kico e ta pa ta na bida. Mescos cu e mucha chikito, djis sinja, sin husga. Pordona e dolor y aprecia e momentonan felis. Podise no tin bon, ni malo, solamente momentonan. Y un dia shelo ta bira trankil atrobe y lo tin pas den bida di cada hende…
Ta bay pa mi topa e esencia di mi ser y sa cu tur cos ta bon… mescos cu e muchanan chikito. Nan ta djis cana y explora… danki bida pa e momentonan… e biahe di amor di berdad a cuminsa… e ta den mi…