~ Rio Grande, den ora di dolor nos ta realisa hopi cosnan di balor.
Bibando den un comunidad den movecion continuo, nos tin di acepta cu e unico cos sigur den bida ta cambio. Completamente berdad! Pero, nos por acepta tambe cu nos historia a hasi nos loke nos ta awe. Tin cosnan cu ta caracterisa un pueblo. Cosnan cu ta hasi un pueblo sinti orgujoso di nan mes y nan ancestronan.
Awo nos sa cu un di e cosnan aki ta e edificio di Rio Grande na Noord. Ora a haja sa cu a basha e edificio di Rio Grande abou sentimentonan emocional a domina riba nos isla. Sentimentonan di rabia, tristesa,cuestionamente, di no por kere.
Nos a haja sa tambe cu eigenlijk no tin un ley cu por evita cu edificionan historico por bay perdi na un forma cruel asina. E boet di 1000 florin cu ta duna pa destrui edificionan historico lo no stroba niun inversionista cu hopi placa pa no basha un edificio abou.
Tin reglanan estricto pa protega naturalesa den Parke Arikok. Dicon no tin reglanan mes estricto pa protega nos herencia cultural? Pa paisnan riba e lista di herencia cultural mundial esaki ta un honor y un punto strategico den mercadeo di nan pais como destinacion turistico. Herencia cultural ta e palabra cu ta describi e monumentonan historico, objetonan arceologico, archivonan y documentonan di un pais y su ciudad y paisahenan. Den hopi pais esaki ta regla pa ley y supervisa pa profesionalnan den e materia. Nos herencia cultural ta hasi nos conciente di nos cultura y nos historia. Pesey ta importante pa nos cuida y preserva nan.
Si ta berdad cu gobierno, e instancianan concerni y e donjo nobo tabatin asina hopi aprecio y balor pa e edificio di Rio Grande, anto nos por puntra nos mes si no tabatin un otro manera pa a jega na un solucion unda tur partido involvi por a haja nan mes?
Por a comunica miho?
Instancianan concerni por a duna mas prioridad na e caso aki?
Bibando den un comunidad unda mas y mas nos ta perdiendo nos identidad como Aruba y Arubiano, lo jega un dia unda di berdad nos ta bisa “A jega ora pa proteha loke ta di nos y di nos ancestronan?”
Nos lo no haja Rio Grande nunca mas bek manera e tabata cu su material di construccion, su historia, su energia, recuerdo y memorianan. Pero podise, djis podise nos por sinja un les di e sabor amargo aki?