Amor…un palabra demasiado grandi pa describi, sinembargo un accion y actitud asina simpel cu e ta tuma un solo decision.
Aunke hopi biaha nos no ta conciente amor ta e sentimento cu nos cada un tin cada dia cu nos lanta di nobo y realisa cu ‘atrobe nos tin e regalo di bida pa un dia mas…’…aunke… hopi bes nos ta lubida di bisa ‘danki’ pa esaki.
Amor ta e angel cu nos ta topa tur dia di nobo, ora un otro ser humano hasi nos sinti cu nos ta ‘bal’. Amor ta ora un otro reconoce nos trabou, nos amistad, nos existencia… Amor ta respet, comunicacion entre ami y abo… Amor ta tolerancia, gratitud…amor pa tur loke ta existi…
Amor ta e aire cu nos ta respira…amor ta e shelo, e luna y e streanan cu ta duna lus na e scuridad di anochi…
Amor ta speransa den un mundo cada dia mas miho, na cual ami por aporta y abo tambe…amor ta e bendicion di por topa bondad tur dia atrobe riba nos caminda di bida.
Amor ta duna sin spera nada bek… di purba di hinca nos mes den e sapato di e otro y purba sinti su dolornan, su duda y preocupacionnan… amor ta pa celebra e logro y alegria di e otro…
Kico mas ta amor?
Podise djis e sonrisa riba bo cara y e ‘bondia’ na cada hende cu bo topa…of podise e cambio di mente y espiritu… pa sa cu cada dia ta un regalo cu bida ta duna bo y manda e fuente di amor cu ta existi den bo pa tur otro hende den mundo cu por usa un tiki mas amor den nan bida… den dianan di fiesta aki… ilumina mundo cu bo amor…
Amor ta Dios mes…y E refleha den abo?
Loading ...