Articulo – Page 5 – Comprondiendo Bida

‘Papa Francisco ta pidi pordon pa danjo causa dor pastornan cu a abusa di mucha’.

Abuso Sexual awe den corant Diario, Casualidad of Intencionalidad.

Riba pagina 36 ta sali un pagina di Comprondiendo Bida cu e tema ‘Stop abuso sexual ta cuminsa cu educacion y informacion’. Riba pagina 54 ta sali un otro articulo ‘Papa Francisco ta pidi pordon pa danjo causa dor pastornan cu a abusa di mucha’.

Papa Francisco a expresa como prome Papa den historia un opinion hopi fuerte contra abusonan sexual den iglesia catolico cu a persigui iglesia Catolico pa mas di 2 decada.

Di parti di Comprondiendo Bida nos ta satisfecho cu porfin un Papa a duna un ‘NO’ fuerte na loke pa asina tanto anja a worde poni bou tapijt den iglesia Catolico y tambe otro iglesianan. Papa Francisco a bisa cu ‘mucha no ta cos di hunga’ y cu lo bin cu sancionnan fuerte.

Pronto nos lo bin cu un articulo cu mas detaje riba e declaracion di Papa Francisco. Tambe nos ta spera cu Papa Francisco lo por inspira tambe gobernantenan dim undo pa paga mas atencion na e inhusticia grandi contra mucha aki.

E morto di un hoben studiante y violencia cu ta jama mas violencia.

Mi no kier perde speransa den mi Aruba, dushi Tera, e isla cu a mira mi nace. E isla cu a inspirami pa pensa cu un dia nos por TA e ehempel di ‘un isla felis’.

Un hoben Canades, studiante di medicina na Aruba ta sali pa gosa y ta haja su morto a base di un discushon y golpi dor di e security di un nightclub. Na Aruba, mi dushi Tera. Un ehempel mas di violencia cu ta birando normal riba nos isla chikito? Kico nos lo conclui si nos analisa e bida nocturno riba nos isla? Nos ta tende e mesun tipo di reaccionnan ora algo similar pasa. ‘Hopi erg’. ‘Esaki no por’. ‘Castigo pisa mester cay’. Tur esaki, sin investiga si na nos isla chikito podise tin demasiado libertinaje den bida nocturno. Nos kier imita paisnan grandi sin mira si nos tin e infrastructura, mentalidad, regulacion, disciplina y etica di trabou necesario. Poder ta un cos peligroso ora e no ta sostene pa norma, balornan y reglanan cu ta pone tambe limitacionnan con leu un hende por jega cu su autoridad. Cu e cosnan aki ta pasa den paisnan grandi tambe? Sigur! E ora nos por puntra nos mes ‘unda nos kier bay cu nos progreso na Aruba?’. Puntra nos mes ‘kico nos ta considera normal’, ‘ki actitudnan nos ta dispuesto pa acepta y kico no’. ‘Con hopi nos kier inverti den training di comunicacion y enteraccion humano (people skills) di e hendenan cu nos ta tuma na trabou.

E nivel di servicio na Aruba no semper ta cuadra cu e imagen cu nos tin den exterior. E amabilidad y cariñosidad di e hendenan cu ta brinda servicio hopi biaha no ta esun cu a hasi Aruba famoso. Cheap labor, falta di training y crisis mundial sigur ta hunga un rol. Tur esaki lo keda mescos si nos no cuminsa pensa na un nivel mas cosmopolitano, pero manteniendo e karakter local. Un nivel cu por a evita e caso lamentable aki. Podise ta bon pa nos pensa cu excesonan di violencia lo por stop ora hendenan ta haja mas satisfaccion den nan trabou.

Ta mas sabi pa nos stimula un actitud cu nos t’ey pa sirbi otro, pa ta cordial cu otro. Ta sabi tambe pa sa mas di e poder di pensamento, cu ta sinja nos cu cos bon lo atrae mas cos bon. Nos lo no stop violencia cu un actitud di mas rigides. E hendenan cu tin poder, con chikito cu e por ta, lo tuma poder den nan man ora nan ta haja esaki necesario. Esaki ta e ley di selva, e instinto humano ora un sociedad no a sinja su hendenan pa biba segun balornan humano eleva. ‘No reaciona, pero entermedia pa situacionnan no escala’. Imagina bo un sociedad unda ta incentiva y duna ehempelnan noble. Unda ta educa y guia e hende pa e bira na prome lugar un bon ser humano. ‘Trata cada hende, manera abo kier ser trata’. ‘Imagina bo cu e tabata bo yiu, con bo lo a sinti?’. Esaki ta empatia of afinidad cu bo prohimo. Mi no kier perde speransa den mi Aruba, dushi Tera, e isla cu a mira mi nace. E isla cu a inspirami pa pensa cu un dia nos por TA e ehempel di ‘un isla felis’.

Ingrid Werleman, www.comprondiendobida.com

E sonjo di Ingrid Werleman ta entre e 300 sonjonan cu ta entrega awe na Rey Willem Alexander di Hulanda.

Ora cu a anuncia cu Prins Willem Alexander lo bira Rey di Reino Hulandes a bin cu un campanja unda pueblo di henter Reino Hulandes por a manda un sonjo cu lo por inspira e Rey nobo den e tarea noble aki. Di tur e sonjonan ricibi un hurado, consistiendo di 16 persona conoci lo scoge e sonjonan mas inspirativo, sorprendente y comprendibel. Di un total di 6.500 sonjo ricibi a scoge 300 den e categoria aki cu lo aparece den e ‘Droomboek ter inspiratie voor de Koning’.

E sonjo di Ingrid Werleman ‘Un Reino di famianan felis’ tambe ta entre e 300 sonjonan den e buki y e ta bisa: ‘Mi ta hopi honra di ta entre e 300 sonjonan cu ta bin den e nationale droomboek den e categoria ‘inspirerende dromen’. E ta un sonjo scirbi for di e mucha chikito den mi cu tabata kier ta un fee y hasi tur hende felis. Mi a duna gran parti di mi bida como adulto na e sonjo aki dor di duna informacion. Prome via di un talkshow, sigi pa revista y publicacion riba mi website www. comprondiendobida.com. Meta semper ta pa juda crea un mundo mas bunita. Aunke tin ora e realidad ta mustra diferente mi nunca lo perde fe cu hende semper ta busca felicidad den su curason.

Mi sonjo pa nos Reino ta esaki:

‘Un Reino di famianan felis’.

Mi ta mira un Reino di famianan felis. E pareha Royal ta na cabes di tur famia. Nan ta hasi semper nan esfuerso pa ta un inspiracion. Lo forma un think tank cu ta consisti di hendenan motiva di cada pais di e Reino. Nan lo duna conseho con pa logra e meta precioso aki.

Un Reino felis unda hende tin dedicacion sincero pa otro. Tur dia tur hende ta cuminda otro cu un sonrisa. Un ehempel pa henter mundo, unda hendenan ta respeta otro. Unda muchanan ta biba contento y ta creativo. Cada mucha ta sinti su mes un prins y prinses den e mundo bunita cu nos ta biba aden.

Majornan ta traha oranan felxibel y tin suficiente tempo pa dedica na nan famia. Nan ta haja informacion y guia den cosnan cu nan no ta corda asina bon mas. Tata y mama ta delibera hunto riba kico ta miho pa nan famia, pa nan pais y pa henter e Reino. Mi ta lanta fo’i sonjo y mi sa…mi sonjo por ‘TA!’

Eugenia Ingrid Werleman, Aruba

Mi a scirbi ‘mi sonjo di famianan felis’ cu e mucha chikito cu mi tabata den mente. Mi ta spera cu e lo inspira hopi hende pa duna e poco of hopi cu nan por duna pa logr’e. pasobra mi ta kere cu si nos cada un biba for di e birtudnan cu nos cada un a nace cu nan, nos lo logra. Cosnan simpel manera sentido di husticia, tolerancia, compashon y amor.
Awe 5 di september 2013 ta entrega e prome ejemplar di e buki na Rey Willem Alexander na Palacio Het Loo na Apeldoorn. Na e ocashon aki e autornan di e 300 sonjonan escogi ta invita. Na e ocashon aki lo tin tambe un exposishon di un seleccion di e sonjonan den e cura di e palacio. Ingrid Werleman lo ta presente acompanja pa su yiu major Ralph Albertus, kende semper a sostene su persona den su trabou di scirbimento.

E buki lo contene tambe un seleccion di potretnan di e ceremonia di aceptacion di e trono dia 30 di april. Cu esaki e buki di sonjo pa nos Rey ta bira tambe un documento historico.

Een koninkrijk van gelukkige families, Photo: Ralph Albertus — Een koninkrijk van gelukkige families.

Ingrid Werleman, Photo: Ralph Albertus — Ingrid Werleman

Elis Juliana – rikesa den pobresa

Cuanto cos nos por conta di e ‘grandi’ Elis Juliana. Riba su website tin asina hopi bunita cos bunita scirbi di su bida.

Un grandi di Kòrsou i Antia a bai sosegá. Elis Juliana, konosí komo Òmpi Elis pa un gran mayoria di nos pueblo a fayesé mardugá di 23 di yüni na edat di 85 aña. Elis a sa di yuda nos pone paso na manera sistemátiko pa nos subi seru di sabiduria i di para pa loke nos ta. Un palabra di konsuelo pa su famia i pa henter pueblo di e islanan ku a yega di forma Antia hulandes. Resientemente el a risibí un doktorado honorífiko di Universidat di Kòrsou pa e gran trabou ku el a hasi riba diferente tereno ku tin keber ku identidat, literatura, antropologia, arkeologia, arte gráfiko, i arte plástiko.

Un tiki di e bida di e mucha Elis Juliana:

Opservadó:

For di mucha Elis ta un opservadó minusioso. E ta drenta Jonge Wacht kaminda e ta haña un disiplina masha útil pa su futuro, e ta deklará. “Verkennerij ta pa esnan ku plaka. Nan tabata mira Jonge Wacht komo sekundario. Pero bo ta lesa revista, literatura ku bini for di Hulanda, manera Hou en Trouw. Bo ta siña mil i un kos, pero esun prinsipal: bo ta haña un balor propio ku bo imaginashon di logra algu…un dia, e gana di subi. I tòg bo n’ ta sinti bo inferior pa motibu di bo pobresa na kas. P’esei semper m’a keda konsiderá mi situashon pober na kas komo un rikesa. Straño no, e mésun pobresa ekonómiko ei ta un rikesa mental. Pasobra bo ta haña bo ta inventá, eksplorá bida sin sèn.” Juliana ta kanta den kor Zingende Jeugd na Pitermai, e ta toka den banda di Jonge Wacht i kanta den kor di misa di Pitermai.

Bola

Den mi bola di kristal
mi ta mira den futuro.
Den mi orea sapu ta yora
un kantika di mizeria.

Mi ta mira mi próhimo
disfrasá na eskeleto
lorá den klechi di papel
ta kana tene na muraya.

Mi ta mira un pareha
ta gatia subi trap’i Kranshi.
Madrina a keda ’bou ta pela
kabaron di awa dushi.

Mi ta mira un entiero.
Kuater hòmber ku machete
ta karga morto di moral
lorá den blach’i ramakoko.

Mi ta mira kakalaka sali
fo’i pipanan frusá di Isla.
Un imahen kibrá ta parti
komunion pa totolika

I den fondo leu ayá
lamá di dignidat a seka.
Nos ta hunga ‘tapa kara’
Hasi bèrgwensa ta pa Dios.

Elis Juliana OPI-III:82

Ruben y Julian, angelitonan di ken nos por sinja lesnan balioso pa juda muchanan na mundo.

‘Mi ta sigur cu nos por sinja algo di situacionnan tragico. Mi ta sigur cu no ta necesario cu muchanan mester muri pa causa di negligencia di instancianan cu lo mester tin bienestar di mucha na prome lugar’.

Ruben (9) y Julian (7), e morto di e rumannan aki a conmove Hulanda y mas aja di e fronteranan di e pais. Gruponan di boluntario mas grandi cu nunca a duna nan tempo cu e speransa pa haja e muchanan ainda na bida. 19 di mei ta haja e curpanan sin bida den awa. Una bes morto cay, ta mucho laat pa nos wak atras. Y ora nos bay investiga e judansa cu a pidi y no a haja, nos ta lamenta. For di investigacion a sali afor cu desde 2009, e instancia ‘Advies- en Meldpunt Kindermishandeling’ a constata cu e disunion entre e majornan ta causa violencia mental cerca e muchanan. Despues di divorcio esaki a bira tambe violencia fisico. Y toch hopi biaha a conclui cu e kehonan di e mama no tabata ’asina serio’. Na april 2013 esaki no a cambia. Den e 4 anjanan aki 10 instancia tabata involvi den e caso. Tabata referi e mama di un instancia pa otro. Y finalmente ora a dicidi di tuma pasonan drastico pa e seguridad di e 2 rumannan, e tata a comete suicidio riba e dia cu e mester a presenta pa discuti e pasonan cu lo bay tuma. E muchanan tabata bou su custodia e dia aki.

Ta surgi e pregunta cerca mi si instancianan cu t’ey pa duna asistencia social traha un tiki mas cu nan curason y menos cu nan cabes, e resultado por tabata diferente? …Kizas! Nos por sinja algo pa preveni mortonan inecesario?

Maske mi no ta trahando ya pa hopi anja den trabou social institucional, semper mi a keda hasi trabou social boluntario cerca hendenan cu bati na mi porta pa judansa. Pesey mi ta haja jammer cu no solamente na Hulanda, pero tambe na Aruba tin storianan con instancianan oficial no semper ta comunica suficiente profundo pa jega na un situacion cu ta beneficioso pa tur partido. Lastima cu hopi biaha ainda ta warda te ora un situacion escala pa enterveni. Na Aruba tin majornan cu a acudi pa judansa na instancianan oficial y ta haja como contesta cu mientras un mucha no ta problematico of hasi algo contra ley, e no ta bin na remarca pa judansa. Of mescos den caso di e rumannan aki no ta considera e keho basta serio. Mi ta corda mi contacto cu instancianan social pa asuntonan legal di familiarnan den pasado tabata uno amargo, sin atencion pa kico ta e interes di e muchanan involvi. Esaki no a cambia mucho si mi tende algun storia den e temponan aki. Na Aruba poco biaha hende ta sali pafo cu nan experencia, pasobra nan tin miedo di represaja.

Mi sa cu nos ta bibando den un tempo di crisis, pero ta importante pa nos pone mas atencion na e peligernan cu muchanan ta core dor di no haja e judansa adecuado. Hajando guia adecuado nos muchanan por florece tambe paso nan sa con pa sobresali maske nan ta biba den famia cu problemanan moderno. Si muchanan ta central di berdad, lo percura pa nan haja e miho cuido cu nan merece segun e decreto di derechonan di mucha. E derecho pa por crese sano y contento. (Derecho nr. 2: Oportunidad pa por desaroya optimalmente riba tereno cognitivo, fisico y social-emocional.)

Si nos muchanan ta na prome lugar, podise Ruben y Julian ainda lo tabata bibo. Cu Dios tuma nan den su Reino como angelitonan di ken nos por sinja lesnan balioso pa juda otro muchanan na mundo.

Pa mas info di e caso di Ruben y Julian, lesa:

http://www.nrc.nl/nieuws/2013/05/19/reconstructie-nrc-veiligheid-ruben-en-julian-al-vier-jaar-in-het-geding/

Buscando e balansa di e accidente mortal y asesinato den ultimo simannan.

Mas nos afirma e negativo, mas nos ta atrae. No duna scuridad mas forsa cu e tin di su mes. Mas nos ta entretene nos mes cu ne, mas e lo crese. Esaki ta ley di Universo. Nos forsa como hende ta juist pa haja forsa inspirativo bek den momentonan di conflicto. Ta aki e curason humano ta florece.

lus y scuridad — lus semper lo core e scuridad

Mas nos afirma e negativo, mas nos ta atrae. No duna scuridad mas forsa cu e tin di su mes. Mas nos ta entretene nos mes cu ne, mas e lo crese. Esaki ta ley di Universo.

Nos forsa como hende ta juist pa haja forsa inspirativo bek den momentonan di conflicto. Ta aki e curason humano ta florece.

Jammer, pasobra nos por sinja tambe di sabiduria. Pero hopi biaha hende ta bira comfortabel y ta lubida cu bida no ta esey so. Loke a pasa cu Hermin Wiels ta un expreshon mas di loke ta reinando na nos mundo. Hopi polarisacion y pensamento y deseo negativo.

Te dia nos para keto y cuminsa bolter e balansa cu nos pensamento y accion, nos lo por mira un cambio. Pero e ora di curason. E ora hendenan manera Hermin Wiels, Pim Fortuin, John Lennon, Martin Luther King, John f. Kennedy, Hesus y asina hopi mas lo no a muri por nada.

E ora nos sa cu cosnan malo por hiba nos na e curason di pas y amor cu ta hinca den cada un di nos

Aruba, no lag’e jega nunca asina leu y asesinato di sr. Wiels

Hopi trustu, kruel, lamentabel i bergonsoso e horibel asesinato di Sr. Helmin Wiels. Ta duna miedu, miedu di nos mes hendenan. Nos komunidat ta manera kos ku a bira siegu. Siegu i ignorante. Siegu pa òrden, siegu pa komprenshon i siegu pa positivismo. Hasta siegu pa e amor ku nos tin ku praktiká pa traha riba e futuro pa nos yunan, pa nos mes, i pa nos pais.

sr. Hermin Wiels... sosega na pas — sr. Hermin Wiels… sosega na pas

Ta asesina sr. Helmin Wiels cruelmente mientras e ta bay cumpra un soppi. Hopi hende ta den shock. Cosnan cu nos no ta spera mas den nos mundo civilisa. Y toch, nos mundo ta jen di violencia. Nos mundo ta jen di bondad tambe. Unda pa busca e solucion?

Un comentario di un amigoe aprecia di Corsow: Robert Coffie

Hopi trustu, kruel, lamentabel i bergonsoso e horibel asesinato di Sr. Helmin Wiels. Ta duna miedu, miedu di nos mes hendenan.

Nos komunidat ta manera kos ku a bira siegu. Siegu i ignorante. Siegu pa òrden, siegu pa komprenshon i siegu pa positivismo. Hasta siegu pa e amor ku nos tin ku praktiká pa traha riba e futuro pa nos yunan, pa nos mes, i pa nos pais.

E loke ku nos ta eksperensiando ta un futuro sin amor. Un futuro ku lo yega i desaroyá ku odio-propio.(en bes di amor-propio i amor pa nos pais)

Un emoshon di odio asina lo kaba ku bo, kimabo manera un pida karbon kayente. Ademas e emoshon aki lo lo no destruí bo so, e lo destruí bo komunidat kompleto.

Odio ta kousando hopi problema den mundu, i riba nos pida baranka Korsou tambe, pero te ainda mi no a ripará ku odio a resolvé niun di nos problemanan na drechi.

Tin biaha nos ta kere ku odio ta e arma pa ataká otronan. Pero odio ta un kuchú di dos banda, i e malu ku nos hasi na otro, nos ta hasi’e na nos mes , i sin duda na nos komunidat.
A yega ora pa nos para ketu i reflekshoná riba kon nos tin ku bai traha riba nos komunidat.

Mi komunidat ta mi famiya, e komunidat di e maestro(a)nan òf esnan den enseñansa ta nan alumnonan, e komunidat di esnan enkargá den deporte ta nan atletanan, komo doño òf lider di un empresa bo komunidat ta bo empleadonan. Siña nan i dunanan e ehèmpel kon pa ta un dushi hende, siña nan balor i normanan. I abo komo lider siña bo mes e kosnan aki promé.

Ban kuminsa awor i no laga pa aki un par di aña nos tin ku bisa KU NOS TABATA dushi hende.
Mi ta spera ku e siman aki nos por reflekshoná riba bondat i AMOR i ku lo reina pas duradero na Korsou.

robert coffie - trainer — robert coffie – trainer

Danki Robert pa permiti nos usa bo refleccion. Ohala cu hopi hende les’e y comparti’e bou nan amigonan. Y mas cu tur cos bib’e y bir’e! ~ Comprondiendo Bida

Stima y Respeta bo Mama!

dia di mama tera — Bisa danki na Mama Tera pa duna bo un luga pa existi.

Djis pa awe

No tira sushi riba caja

No tira sushi den lama

No tira sushi den bo cura

Djis pa awe

Piki cada cos sushi cu bo ta topa riba caja

Piki cada cos sushi cu bo ta topa band’i lama

Piki cada cos sushi cu bo ta topa den bo cura

Djis pa awe

Hole un flor

Planta un mata of stek den bo cura

Bisa danki na Mama Tera pa duna bo un luga pa existi

Tur dia di Dios…

Sinja bo yiu pa hasi mescos…

Awe ta ‘Dia di Mama Tera’

Stima y Respeta bo Mama!

…Cu amor pa e planeta riba cua mi ta cana y hala rosea…

~ Ingrid Werleman

Con abo lo sinti si tabata bo yiu

Na Aruba: Hues ta pidi 2 aña di prison pa homber cu a abusa di su propio yiu muher menor di edad. Imagina bo cu ta bo yiu. Con bo lo a sinti?

Na Aruba:

Hues ta pidi 2 aña di prison pa homber cu a abusa di su propio yiu muher menor di edad. Imagina bo cu ta bo yiu? Con bo lo a sinti?

Imagina bo kico a pasa den e mente di e mama. Ora hues a dicta sentencia, despues cu hues tabatin ful un declaracion di e mucha cu pruebanan medico.

Cosnan cu ta pone stoma di un hende bolter; cosnan cu lo sali solamente di un mente hopi perverso.

Hues a bisa e tata cu e ta kere e declaracion di e mucha y toch ta pidi solamente 2 anja di castigo.

Kico ta pasa den e mente di un tata cu no ta respeta ni su propio yiu? Di con niun protesta di instancianan cu tin mucha como grupo meta?

Si nos no ta defende e derecho di nos muchanan, ta ken su derecho nos ta defende anto?

Para keto un rato y pensa: ‘Con ami lo sinti si tabata mi yiu?’

Yui di Profecia

E caminda di inocencia pa e crus di Hesus… kico e por inspira bo pa bo caminda di bida? Un bunita storia di Al Figaroa

Den e temporada prome cu mi a nace

Odio tabata reina, no den balansa cu amor

Rumornan di guera constantemente entre nacionnan

E siman prome cu mi a nace

Un Lider cu ta yama su mes Rey

A saca un ordo pa comete genocida

Pa no cay den su gara malbado

Mi mayornan cu ayudo Divino

A embarca pa un pais desconocido

E dia prome cu mi a nace

Mi mayornan, un simpel carpinte y mama di cas

Ta pasa bati na tur porta buscando posada

E anochi cu mi a nace

Un strea grandi iluminante na horizonte a aparece

Hunto cune tres Mago y varios wardado di carne

Na kiko y kende tur

Mi mester duna danki awe

Pa tur e regaldonan laga atras

Mi infancia mi a pase

Manera tur otro mucha

Scol hunga drumi

Tempo mi a cuminsa desaroya

Mi tambe a rebeldia

Mi tabata splika scuritura bieu na Sabionan

Durante mi adolecencia

Mi a hasi loke nos tur ta hasi

Sali for di cas y busca un bida

Den diferente cuidad ariba un pelgrima

Demasiado mi a mira, hopi amigo mi a crea

Durante mi lectura y evangelionan duna

Ateista o Sceptico reconocenan

Bo tin di sinja biba cu tur

Aunke despues di tanto milagronan

Hopi nan a sinja, hopi mi a sinja nan

Pagado di belasting

Duna Cesar loke ta di Cesar

Den e temporada cu mi a profetisa

Duda tabata grandi, nada compara

Cu un curason puro y habri

E simannan despues cu mi a profetisa

Lidernan di diferente nacion , hunto cu mi propio

A saca un ordo contra mi pa arestami

Pa no sigi hunga cu nan wega malbado

Mi a entrega cu Divino ayudo

Algo ya caba bibo, mi escrito destino

E dia cu mi a profetisa

Por ultimo biaha cu mi ultimo rosea

Ta dia cu na cruz nan a clabami

E dolor ainda mi ta sintie

Pero mi curason ta alegra ora mi pensa

Cu tres dia despues, boso sonrisa atrobe mi por mira

Na kiko y kende tur

Mi mester duna danki awe

Pa tur e regaldonan laga atras