Tabata dialuna mainta cu mi a lesa cu atardi lo tin un misa pa pidi Dios descanso pa e alma di Mitch Henriquez. Y atardi mi a bay misa di Noord, pa mustra mi convivencia. Tambe pa den mi silencio conecta cu mi Dios, cu mama Maria y pidi pa forsa pa e famia y husticia Divino den e caso di Mitch Henriquez. Mi a brasa e mama di Mitch y ta pensa den mi mes ‘Ki dolor e mama aki mester tin den su curason na e momentonan aki’. Despues den e vigilia pafor di misa, mi ta wak e mama, para cu un bela den su man banda di e potret di su yiu cu a muri bou circumstancianan asina violento y mi ta pensa ‘Ki balente e mama aki ta, di por para akinan cu un bela pa su yiu, mientras su curason lo ta kibra den mil pida’.
Cherry, e ruman muhe di Mitch ta contami ‘Senjora, mi ruman ta un hende cu ta semper jolly, semper e ta trese alegria unda cu e ta. Di tur hende, e no a merece un morto asina’. Mi ta di acuerdo cu Sherry, maske mi no a conoce Mitch personalmente, pero mi a bay riba e pagina di Facebook di Mitch Henriquez y akinan mi ta topa un persona simpatico, cu alegria den su postnan. Un hende cu expreshon simpatico. Mi ta topa tambe un banner di juni 2014 cu ta bisa ‘No matter what, in victory or defeat. Hup Holland Hup.’ Y mi ta pensa con cruel destino tin ora ta.
Mi ta sende mi bela y resa hunto cu tur presente. Maske jena cu dolor, e anochi ta tambe hopi sereno cu e luna cla riba e imagen di Cristo den cura di misa. Union di famia y hendenan cu a bin hunto pa comparti nan sentimento na un forma digno di nos Aruba chikito. Vooral e presencia di su hendenan di Noord a resalta. Mi a bay cas bek cu un curason mes pisa cu lihe. Y mi ta refleha riba e palabranan di Mitch su ruman ‘Di tur hende, e no a merece un morto asina.’ Pakico Mitch, mi ta pensa? Ami ta kere cu e misterionan di bida ta hinca den e mente Omnipotente di Dios. Den mi curason mi ta spera cu e morto cruel y inhusto di Mitch por mustra hendenan rond di mundo cu violencia no ta e caminda. Y cu tambe na Aruba cada un di nos por hasi intentonan tur dia pa pensa cu e mente di Dios den cada cos cu nos hasi. Ami ta kere cu Dios lo pensa semper cu amor, cu husticia, cu compashon y tolerancia. Y Dios lo pensa tambe cu alegria di bida, loke nos por sinja di Mitch.’ Cu Mitch haja su pas den e Reino di Dios y cu su famia haja forsa pa surpasa nan dolor y consuelo cu husticia a prevalece den e investigacion cu a ser hasi.
Ingrid Werleman