Mi tabata un mucha chikito…preparando pa Pasco, e fiesta mas grandi di anja pa mi. mi ta corda cu awa semper tabata jobe, net prome cu nos sali bay misa di 12 or anochi. Ami y mi rumannan hunto cu Padushi Coyashi den auto di Mookin. Nos no tabata haja e awasero fastioso, solamente e sapatonan nobo y e meanan cu falchi cu ta keda tur muha tabata menos leuk. Pero como mucha bo tabata obedecido y ta bay bo misa sin protesta.
Misa semper tabata bunita dorna cu lus y e pesebre cu e ninjo Hesus cu e strea na halto smper tabata tin un magia cu n’e. Awe, hopi anja pasa, Hesus a nace den un stal. 
Pakico Hesus a nace, ainda bo no sa como mucha of en todo caso, bo no ta echt compronde. Ami en todo caso,no! pero e solo echo cu Hesus ta un baby, drumi den un stal pober tabata hasi un impacto riba mi.
Mas despues den les di catiesashi mi a bin compronde cu Hesus a nace pa despues muri pa mi picanan na crus. Aunke e momento ey ami no por a imagina mi mes ki pica mi lo por tabatatin.
Despues di misa nos tabata bay na cas di Madushi y Padushi. Mi ta corda cu mi mama y mi tanta y omonan semper tabata t’ey pa ricibi nan bendishon di Pasco di Padushi. Despues nos tabata haja bolo di tres color y un poco refresco pa bolbe bek cas, kita panja y bay drumi.
Mainta nos ta lanta, banja y bisti panja pa sali y ta bay den grupo bishita e bisinjanan, tanta y omonan. Casi tur caminda bo ta haja mesun bolo pa come. Nan ta sirbi’e den un tajo di carton cu su sunchi, pruim y poco chewees na banda. Pa bebe nos tabata haja refresco y si nos tin suerte nos mag di scoge cua color.
Cu mi yiunan nos a mantene e custumber di bay misa di 12 or y tambe e bishitanan di famia. Despues di misa di anochi henter famia ta topa na cas di May. E Pasconan di mi inocencia…momentonan di oro…