Nos famia ta e cuna pa sinja etica…

Kico muchanan ta sinti falta di dje den nan educacion y bida na cas, na scol, den nan iglesia of den nan bario? Amor, disciplina, norma, balor, instruccion, etica?
Nos famia ta e cuna pa sinja etica, segun un presentador na radio…
Si, berdad, e tin rason, etica, amor, disciplina… formacion…informacion…

mucha y etica ‘Un ser inteligente ta e principio di tur cos’ – Jean Jacques Rousseau

Mi tabata scuchando un programa riba famia y etica. Hopi interesante pa scucha cu como nacion nos tin cu tuma ensenjansanan riba etica y moral na serio. E presentador ta puntra: ‘E problemanan social y personal por tin di hasi cu ja nos no ta paga asina hopi atencion mas na balornan manera respet, integridad, responsabilidad? Kico ta bon y kico ta malo? Nos ta duna contenido na e palabranan aki ora nos ta splica nos yiunan na palabra chikito kico nan ta nifica. Tambe ta bon pa duna nan ehempel di bida diario, p.e. pa no mishi cu cosnan cu no ta di bo, maske con chiquito e por ta manera un pen di propaganda (no horta). Ta importante pa sinja nos yiunan kico ta nos bon custumbernan, p.e. cuminda hende ora bo topa nan riba caminda (bisa ‘bon dia, senjora’ of ‘meneer’).’

Berdad, e cosnan aki no ta asina dificil, pero si nan ta duna un mucha educacion civico y social. E ora pakico no hasi’e mas hopi cu ta posibel? Ta bon pa tur nos lidernan ta conciente cu den cada situacion nan ta e ehempelnan pa e pueblo. Cu nan forma di papia, nan forma di actua, di reacciona y te hasta cu nan forma di bisti. Esaki ta conta tambe pa cada adulto. Na Aruba nos ta ripara cu hopi biaha nos ta alega mas y mas di nos propio custumbernan y ta adapta mas y mas ehempel di television, internet y di otro paisnan.

Si nan ta basa riba bon etica, hopi bon, pero ora violencia y inmoralidad ta e tema, kico e ta sinja nos y nos yiunan? Educa etica ta tambe tarea di medionan di comunicacion ora nan ta selecta ki cantica cu ki texto nan ta transmiti, ki programa nan ta manda den aire. E presentador di e programa riba etica y famia ta bisa cu tin asina tanto muestra di falta di etica den nos mundo. A menciona banconan, lidernan den posicionnan clave cu ta cay for di gracia dor di nan actitud personal. Nan a pensa prome cu nan a actua? Y e muchanan jong cu ta bira miembro di gang y ta participa na actividadnan violento?

Kico e muchanan aki a sinti falta di dje den nan educacion y bida na cas, na scol, den nan iglesia of den nan bario? Amor, disciplina, norma, balor, instruccion, etica?
Nos famia ta e cuna pa sinja etica, segun e presentador…

Si, berdad, e tin rason, etica, amor, disciplina… formacion…informacion…
Ban cuminsa Aruba…

Leave a Reply