Crimennan hororoso y e sonjo cu nos por sonja ainda

Un mama turista ta ser sospecha di a hoga su 2 yiunan den e badkuip di un hotel luhoso na Corsow. Hororoso… Con un mama por jega asina leu? Kico nos por hasi pa evita crimennan asina?

angel wardador
abo ta un angel wardador?

Un mama turista ta ser sospecha di a hoga su 2 yiunan den e badkuip di un hotel luhoso na Corsow. Hororoso… Con un mama por jega asina leu? Algun luna pasa na Belgica un mama a entrega keho cu su 2 yiunan a disparse. Despues di investigacion profundo a resulta cu e mama mes a mata nan, kap nan na mochi y pone e mochinan den su freezer hunto cu e resto di carni. Con un mama por hasi algo asina???

Tin un tecnica spiritual cu jama Ho’oponopono cu ta sinja nos cu cada cos cu nos encontra, nos ta parti di dje y co-creador di e situacion na un forma of otro. Claro, no directamente… pero den e esencia di unda nos mundo ta bayendo, abo a jega di puntra bo mes, kico bo por hasi pa cambia e rumbo den uno mas positivo y di pas?  Ho’oponopono ta sinja nos tambe cu nos ta parti di e solucion tambe dor di traha na pordon y amor pa cada situacion. Esaki nos por hasi cu solamente cuater frase cortico. ‘Mi ta sorry’, ‘pordonami’, mi ta bisa bo danki’, ‘mi ta stima bo’.

Bida no ta perfecto, pero pa esun e ta mas imperfecto cu pa e otro. Importante ta si nos por usa e bon momentonan pa inspira nos ora cosnan no ta bay bon. Esaki no semper ta logra y e ora hendenan ta jega na extremidadnan, maske cu normal nan por tabata bon hende. Pesey ta importante pa nos por pensa kico ta pone hende jega na extremidadnan y kico tabata e ultimo gota cu a pone e glas pasa over. Na momento cu nos por jega compronde pakico, nos por cuminsa juda pa cura e herida colectivo di humanidad.

Mi mes ta pensa cu ta bon pa nos cada un wak con nos por juda pa ta e lus den caminda di un otro cu ta cana den scuridad of cu tin hopi dolor den su bida. Ban wak con nos por usa e forsa di nos curason un poco mas pa juda otro. Esaki por cu cosnan simpel. Duna un hende un sonrisa. Bisa ‘bondia’. Stima bo famia. Juda bo yiunan discubri nan talentonan. Pero mas cu tur cos sonja atrobe pa por sinja nos yiunan sonja atrobe tambe. Tuma tempo pa traha bo sonjonan. Nan tin algo magico. Wak’e  cu e wowo di un mucha. Un cos cu no ta facil pa hopi hende ta pa cambia nan mindset moral. Pesey, purba bay mas diep, bay na e feeling cu bo kier ta. Bay na e ‘core’, e motibo real pakico… sinti bo mes asina y poco poco bo lo actua segun e actitud aki.

Ban traha hunto na crea mas energia di amor y pas den mundo… e ta juda mas cu condena esun cu a hasi e actonan hororoso describi aki riba. E muchanan lo no biba bek cu nos condena. Podise un ajudo den e momento di mas dificil si por a evita nan morto.

 

Leave a Reply