Ta hopi tristo pa lesa frecuentemente, podise demasiado frecuente cu abuso sexual ta topico di casonan dilanti hues. Casonan unda padrasto, omo, tata, ruman, coach cu ta abusa di menornan di edad. Hendenan sin escrupulo, moral y decencia cu no ta realisa con nan por kibra bida y destrosa almanan di un otro ser humano. Abuso emocional y sexual no ta di awe, ni di Aruba so, tampoco e ta mara na status social, rasa, religion, entrada, ni educacion. Lastimamente e ta parse di ta un di e cosnan inperdonabel cu hendenan ta sigi comete, bou di e excusa di ‘mi tabata burachi’, ‘e mucha mes a busca’, ‘e muchanan awendia ta madura asina tempran’, ‘mira con mucha chiquitonan awendia ta bisti. Ta fout di e mama si algo asina pas’e.’ Tur ta excusanan cu e abusador ta inventa pa laba su consenshi di algo cu nunca por ser papia bon. Den caso di abuso di mucha tin hopi gradacion, hopi forma, hopi color, pero semper mesun dolor y berguensa pa e mucha y e hendenan rond di dje cu di berdad ta stim’e. Podise pesey abuso di mucha ta un di e taboenan mas grandi den comunidadnan rond mundo, tambe na Aruba. Casi sigur e taboe y e berguensa aki ta entre e motibonan principal pakico specialmente abuso di mucha ta sigi existi. Simplemente pasobra ta tene tur cos scondi pa asina ‘otro’ hende no haja sa. Lastima, pasobra finalmente e no ta juda ningun hende, ni e abusador, ni e victima. Lastima cu tin hendenan adulto cu no ta realisa cu un mucha chiquito ta puro inocencia cu Dios y bida a duna na hendenan adulto pa cuida y guia y hiba nan na un bida sano y felis.
Sinembargo abuso di mucha ta kibra e carera di bida aki den hopi caso. Mi ta bisa ‘den hopi caso’, lagando asina un espacio pa e ciniconan cu ainda ta existi y ta bisa cu tur loke ta papia tocante abuso di mucha ta ‘exageracion’. Den nan pensamento of teoria un mucha por pasa den hopi cos y despues sigi un bida normal gewoon, pasobra toch e ta chiquito y e ta lubida tur loke e la pasa aden ora e bira grandi. Probablemente esakinan ta hendenan cu nunca a interesa pa informa nan mes di e desaroyo psicologico di e ser humano. Nos conoce tambe e hendenan cu ta adopta custumbernan di otro paisnan unda ta normal cu un mucha tin aceso na materialnan pornografico, pasobra asina nan ta siña acepta nan propio sexualidad desde chiquito. E hendenan aki mester realisa cu TUR cos tin su momento den bida di un ser humano, sexualidad den pareja tambe y e ‘no’ ta cos di mucha. Den todo caso, no den mi opinion. Tambe tin hende cu ta bisa cu e ‘odipo complex’ ta algo masha normal. Incest ta hasta ancra den hopi religion. Mundo a bolbe haja un sacudi cu e caso na Texas unda adultonan ta forsa muchanan adolecente pa casa y haja yiu cu nan. Y laga nos no lubida e hendenan cu ta busca e muchanan jong, tanto mucha muhe como mucha homber pa juda nan den nan deseo di keda jong pa semper den nan rol di ‘sugar daddy’.
Lastima, pasobra e hendenan aki no ta realisa cu nan por causa heridanan profundo den e alma di un mucha of un adolecente, pio cu heridanan na e curpa humano cu por cura despues di tempo. Ta conoci den literatura riba abuso sexual cu e victimanan tin cu cana un caminda largo y tin biaha imposibel pa rescata nan mes, rescata nan balor propio pa un dia hiba un bida normal, den caso cu esaki logra. Ta conoci cu muchanan victima di abuso sexual por hasi daño fisico y psicologico grandi na nan mes. Mescos ta conoci cu den bastante caso e abusador ta cay bek den e actitud abusivo, te hasta despues cu e la basha hopi awa di wowo di supuesto arepentimento dilanti hues y te hasta despues di haja terapia intensivo. Abuso sexual no ta straño den nos comunidad, basta hende riba nos isla a jega di haja nan mes confronta cu frescuranan di hendenan straño den nan niñes, pero tambe tin biaha di hendenan hopi cerca di nan, nan propio famia of hendenan den cua un mucha tin hopi confiansa den su actividadnan social. Pesey ta bon pa hendenan interesa den e tema informa nan jiunan con pa defende nan mes, con detecta señalnan di tempran y pa por garantisa e criaturanan cu Dios a pone bou nos cuido…e bida cu nan merece…’un bida felis’…