Celulitis…. nos por evit’e of cura di dje?

Celulitis ta mas complica cu e simpel vet cu un curpa ta acumula normalmente, pesey e no ta kita tampoco cu un dieta normal. Celulitis ta un combinacion di vet, awa y stofnan toxico cu keda pega bou di e cuero y no tin caminda pa circula. Ta pa e motibo aki e no ta los ni cu e dieetnan mas streng. Esaki contrario na vet normal cu si ta kima cu dieta.

E tratamento di celulite ta depende di e nivel di e celulite. Tambe e ta depende di e calidad di e cuero y di e custumbernan di bida.

Su causanan ta diferente: hormonal, hereditario, falta di movecion, hasi mucho trabou sinta, alimentacion cu hopi caloria, hopi hariña, mucho poco fruta y berdura, stress, embaraso y obesidad.

Dor di mantene e cuero hidrata: más hidrata un cuero ta, mas jong e ta mustra y cu un tono mas bunita.

Come segun custumbernan bon equilibra y regular. Come semper na mesun ora y mesun cantidad. Evita cuminda gevries pa hopi tempo y fast food.

Drumi minimo 6 ora y maximo 8.

Preveni stress den bo bida: e ta causa un fluho exagera di adrenalina den bo curpa cu ta contrae bo cuero. Esaki na su beurt ta hasi cu bo cuero no ta haya suficiente circulacion di sanger. Esaki ta pone bo cuero mustra dof y sin bida.

Come productonan natural: specialmente esunnan cu hopi fibra pa asina bo tin un bon digestion y pa bo tripa traha bon. Usa mas poco salo posibel. Salo ta hasi cu bo curpa ta retene mas awa cu tin mester. Controla con hopi vet bo ta come (batata hasa, saus y pastechi y cuminda stoba; Elimina bebida manera thee, koffie, chuculati, refresco, alcohol y productonan frozen di bo dieta diario.

Hasi mitar ora di ehercicio minimo tur dia, por ejempel un dushi caminata. Masashi ta hunga un rol hopi importante pa preveni y controla celulitis. Bo por tuma un masashi cu un crema cu ta  contene carnitina, aminofilina, vitamina C y alga.

Generalmente hende no ta realisa cu nan ta hajando celulitis, te ora cu e ta asina avansa caba y ta bira mas dificil pa kit’e. Pesey corda e famoso dicho cu den e caso aki ta hopi aplicabel: ‘miho preveni…cu lamenta!’.

Come y biba saludabel y ta conciente pa logra y mantene e curpa cu ta pone abo sinti bo mes bon.

Exito!