E rol di afirmacionnan pa crea abundancia… felicidad y placa
Nos a sinja cu placa ta corumpi, tanten cu placa ta djis un pida papel cu nos ta usa pa entrecambio di servicionan. E placa no ta culpabel pa loke hende ta hasi cun’e. Antes nan tabata cambia producto of servicio. Corda riba e custumber bieuw di paga lomba. Asina hopi famia Rubiano a jega na nan cas. Nan tabata juda otro na turno pa construi un cas pa nan famia. Un bunita custumber cu ainda tey den cierto famianan…
Afirmacionnan ta pensamento y ponencianan positivo cu ta yuda bo focus bo sub conciencia riba bo poder y abilidadnan pa obtene loke bo ta desea di e profundo di bo curason.
Scoge un pensamento basico pa bo mes. Por ehempel: ‘Mi ta un persona balioso, mi bida ta importante… ami ta scoge pa ta felis.
Pesey si bo bida ta tranca un caminda, stop di worry, miho wak ki accionnan bo por tuma pa crea cambio.
Hopi hende ta preocupa nan mes di futuro, enbes di biba e presente. Stop di biba den futuro, esaki ta aumenta e miedonan. Confia cu loke bo ta pasando aden, ta e oportunidadnan cu abo mes a crea pa siña bo lesnan.
Semper kere den bo mes, sea positivo, maske tur hende rond ta negativo. Mustra cu bo ta logra, paso abo ta kere den bo mes…
Corda cu no tin victima den bida, ta abo ta scoge pa hunga e rol di victima.
No pensa riba problema, pero wak bida como un reto y oportunidad pa crese. Pensa pa bo mes con bo ta scoge pa mira mundo.
Ehempelnan di afirmacion:
Afirmacion 1: ‘Semper mi tin mas placa drentando cu ta saliendo’.
Placa ta un entercambio di energia entre abo y e mundo rond. Pero wak pa bo no blokea e fluho di energia aki den bo bida. Bo por blokea e fluho di placa den bo bida dor di bo simpel pensamento cu ‘bida la un lucha’.
Afirmacion 2: ‘Placa ta lora, core suavemente den mi bida. Mi ta prospero’.
Si esaki ta e caso, sea agradecido, bisa danki pa loke bo tin. Corda spaar un poco di bo placa. Usa bo sano huicio…
Afirmacion 3: ‘Mi ta permiti mi mes di tin mas cu mi a tribi di soña cu ta posibel’.
Anto ora placa cuminsa lora na gran cantidad den negoshi, no primi brake, pero reta bo mes pa pensa ilimita, naturalmente, no a costo di otro. Pensa bon con pa bo por handle e. Corda comparti e abundancia cu esunnan cu a yuda bo hay’e.
Afirmacion 4: ‘Mi ta bibando den un mundo abundante. Tur cos ta perfecto den mi mundo.’
Parcialmente saca for di e buki ‘Creating Abundance’ di Sanaya Roman.