Haja sa mas di Fundacion Autismo Aruba

Fundacion Autismo Aruba ta brinda servicio di sosten na mayornan cu yiunan cu autismo na Aruba. Alabez ta duna informacion tocante e trastorno aki, pero mas important eta enfoca riba concientisacion di Autismo na Aruba.
Fundacion Autismo Aruba a keda oficialmente funda door di algun mayor cu yiunan cu Autismo na Aruba. E soño di tin un lugar caminda nan mes por reuni y experencia contacto cu otro mayornan, hunto cu nan yiunan pa haya sosten di otro y sinti aceptacion total, a bira realidad. Asina tambe conceptonan di concientisacion tocante Autismo a forma y a establece e fundacion cu te awendia ta den crecemento constante. E crecemento aki a culmina cu un simposio di calidad internacional, asina cumpliendo cu un di metanan principal di e fundacion cual ta brinda informacion pa eleva e profesionalidad y servicionan na personanan cu Autismo na Aruba.

FAA tin diferente proyectonan andando conhunto cu voluntarionan entusiasma di e fundacion y tambe cu colaboracion di otro instancianan. E terenonan cu e proyectonan aki ta cubri ta consisti di sosten na mayornan, educacion, recreacion, integracion, cuido, screening, sondeo y un plan di strategia nacional.
FAA continuamente ta organisa y participa na diferente actividadnan di concientisacion. FAA tin su portanan habri pa mayornan, profesionalnan y studiantenan cu tin mester informacion tocante autismo y diferente areanan cu esaki ta afecta e persona den su funcionamento. Riba nan website www.autismoaruba.org tin mas informacion tocante nan servicionan.
FAA no ta haya sosten financiero di gobierno y ta depende hopi di ayudo di voluntarionan en combinacion cu donacionnan pa por ta activo. Personanan cu ta sinti pa duna un man na e fundacion aki ta bon bini pa hasi un cita cu nan.